Di nyaom biai online pakat negar ka bruk pacang caga jru phin kayua Mintri Công an peih tabiak di dah page harei 10/3, Ủy viên Mintri Chính trị, Thủ tướng Rajaei Phạm Minh Chính brei thau lac, piah jhul khang bruk peih ngak Danak pacang caga jru phin tukvak 2021-2025 Mintri Công an njauk peih ngak siam bruk di drei lac jabat thường trực ka bruk pacang caga jru phin; Pataom tame mesuh metak, taong tayah dom labik njauk kan kandah ka jru phin; Paglaong bruk pambuak haong dom jabat hu pambuak tal khik ramik catang urang pandar suan adat hukum ka jru phin. Thủ tướng jeng ieu kakei, Mintri Quốc phòng, khik ramik catang gah jalan tapen negar; pambuak haong dom kapul Công an piah pacang caga jru phin meng atah, abih di nyu nan lac bhum tapen negar, di mangaok tasik.

Urak ini, urang ngak nong di dom tỉnh, ban miền Tây yau Hậu Giang, Sóc Trăng, Bạc Liêu, Cần Thơ... daok yam tame bilan yuak padai đông xuân. Bilan padai thun ini, mikva urang ngak nong di miền Tây hu bui sambai jang meng hu njauk padai saong pablei hu yaom. Tui kuhria dom tỉnh ini yuak salah padai đông xuân dalam bilan 3. Yaok ha hu meng 7 tấn meteh tal 8 tấn. Saong tui yaom padai yau urak ini, urang ngak nong hu laba meng 25 tal 30 triệu đồng/ha.

Meng hadei di Nguyên đán tal urak ini, yaom lac langik tasik oh lagaih, min rilo urang taong cap ikan di Ninh Thuận hu tabiak tasik taong mek ikan. Bruk peih ngak di dom bilan akaok thun ba tal bruk siam lagaih ka gah taong cap kaya ikan. Anak bruk kuhria cak rok patagok di gilai công suất praong saong caik sản lượng ikan tagok glaong, Chi cục Kaya ikan tỉnh Ninh Thuận daok caga dahlau peih dom tal pato urang peih gilai, máy trưởng, urang nao gilai, daong ka bruk taong cap di dom sruh gilai hu siam lagaih. Gam tui di nan, pachreih urang taong ikan paglaong bruk nao tasik, peih praong mblang tasik taong cap ikan, pandar dom ilamo taong cap ikan bahrau, pambuak saong peih bruk taong cap di dom mblang taong cap ikan hu siam lagaih.

Dalam dom harei ini, yaom pabui diuk gam gam trun ngak ka urang raong pabui di Bà Rịa-Vũng Tàu gaok rilo kan kanda. Yaom lac yaom pabui trun khang, min jien sahui raong pabui yaok harei yaok tagok. Urak ini, yaom haleik tagok labaih 100 rabau đồng sa bao 50kg, daok di tanut 350 rabau đồng sa bao ka pabui menek, labaih 400 rabau đồng sa bao 50kg ka pabui ralow. Tui yaom pandap mbang yau nan haong prein iek glang, kuhria meng tuk raong tal tuk pablei tagok meng 5 triệu meteh tal 5 triệu 700 rabau đồng sa drei. Meyah bruk ini dui atah , dom labik raong sit mbuan nao tal bruk kreik pabah mbang.

Dalam dom bruk di harei pataom cà phê Buôn Ma Thuột mbang ka 8, dah page ini, di ban Buôn Ma Thuột Hiệp hội cà phê Buôn Ma Thuột hu peih pakah harei pakacah lai cà phê angan je Việt Nam thun 2023. Hu peih tabiak meng harei 10 tal harei 13/3, mbang pakacah hu pataom mbaok hu 33 urang pakacah meng 9 tỉnh ban dalam taneh ia. Mbang pakacah piah duah mboh, pok mayaom, yaih khan thaot bingu dom urang naih gheih dalam bruk lai cà phê; Yaih khan, cak rok patagok gah cà phê angan je Việt Nam, ilamo cà phê Việt Nam rik tame bruk patagok bruk pandar caphe dalam taneh ia saong patagok yaom di gah cà phê Việt Nam.

Dalam var nyaom 3 Mbang nyaom ka 1 Quốc hội Trung Quốc mbang 14 peih tabiak tuk mesup ini (10/3), hu abih tih phiếu buh brei, ong Tập Cận Bình, ndih tapui thun 1953, hu pok ngak veik Akaok negar nhiệm kỳ ka 3 tal thun 2028 saong lac Chủ tịch Quân ủy Trung Quốc. Vaktu ka 3 di Chủ tịch Tập Cận Bình hu tamat di thun 2028. Hu thau, Quốc hội Trung Quốc mbang XIII hu brei tapa dom asal kadha pasiam veik Hukum negar jeng di mbang nyaom ka 1 di bilan 3/2018, dalam nan hu gam bruk klaak pacang hadom nhiệm kỳ ngan saong urang ngak Chủ tịch nước.

Pasak pasang iek saong pacang caga jit ruak (CDC) di Mỹ bahrau ini hu brei thau lac hu labaih 300 urang di mangaok sruh gilai du lịch suai harei meng bang Texas di Mỹ tal Mexico hu mboh dom bruk oh siam ka prein yava yau ye takhaoh ta-aok saong aih traoh. Công ty peih sruh gilai hu pataom dom mẫu janih nerak di dom urang gaok dom kan kandah di jalan tung pruac piah payua tal bilik dut iek di CDC piah ngak cambaih laih ka jit ruak. Gam tui di nan jeng brei thau lac ruak ini meda lac kayua norovirus, sa janih virus tung pruac ngak tabiak.

Jabat khik ramik chất lượng kaya nong taneh ia di Argentina brei thau, jit cúm menuk ada di taneh ia ini daok rah tabiak dalam srau kadau tuk dom menuk ada metai saong ba nao am cuh klaak tagok tal 260.000 drei dalam dom harei jaik ini. Kuhria tal harei 9/3, dalam 200 drei mboh yau njaom cúm menuk ada di Argentina, hu 40 drei mboh lac dương tính. Dom jabat chức năng taneh ia ini mboh lac ruak ini njaom mbak meng dom janih cim par mai. Rajaei Argentina brei padeih bruk pablei tabiak negar langiu dom janih menuk ada./.