Rajaei birau ba tabiak Sarak 75/2023/ NĐ -CP pasiam veik, pabak dom asar kadha di Sarak 146/ 2018/ NĐ-CP ba tabiak cambaic laic saong tacei pato jalan peih ngak dom asar kadha di Hukum BHYT. Sa dalam dom asar kadha hu pabak dalam Sarak nan lac urang bangsa takik di dom palei biak kan kandah di bhum urang bangsa takik saong bhum ceik vaktu 2016 – 2020 bo dom xã nan oh daok dalam angan dom xa bhum II, bhum III; palei pala biak kan kandah di bhum urang bangsa takik saong bhum ceik vaktu 2021 -2025 tui bruk ba tabiak di Thu tuong Rajaei meda hu daong  jien blei BHYT.

Urang ngak nong tỉnh Vĩnh Long daok yuak padai Thu Đông. Meng hu langik tasik siam lagaih, nan ye padai yuak hu 6 tấn/ha, yaom padai tagok glaong nan ye mikva urang ngak nong bui sambai lo. Bilan padai Thu Đông ini, urang ngak nong tỉnh Vĩnh Long trun pajaih hu labaih 35.800ha padai, tagok jaik 40% duk haong bilan Thu Đông thun blaoh haong dom pajaih padai bhian ngak yau ye OM5451, OM18. Piah khik kajap năng suất, chất lượng padai, tukvak tapa, gah ngak nong tỉnh Vĩnh Long kakei urang nong bhian tui iek mblang hamu, pandar pajaih padai xác nhận; ba ilamu kỹ thuật tame pala, ngak. Gam haong nan, patagok bruk pambuak gauk tui chuỗi giá trị, rik daong dak padang bhum padai tamo, brah siam piah pablei tabiak negar langiu. 

Mban Bangsa tỉnh Kiên Giang pambuak saong Sang bac Cao đẳng Luật mien Nam birau peih tal pasram pabak ilamu ka bruk langyah ba siam ka urang di bhum palei ngan haong 80 urang hu ngan je dalm bhap bini bangsa takik di dom huyen Hòn Đất, Châu Thành, Gò Quao, Giồng Riềng, An Biên saong TP. Rạch Giá. Dom urang nan hu pasram dom ky nang roh duah, pabak tame saong ba pandar hukum dalam dom  bruk lakhah tok diuk tok pasang saong baoh sang, taneh riya, langyah di bhum palei; ilamu ba tabiak jalan ngak, bruk dang akok nyaom biai, ndem meyai di labik hu mbaok rilo manuac, ngak bruk tui kapol nyaom, jalan sahaneng hadah krah, duah saong langyah khaw tin…Tapa tal pasram, daong urang hu angan je dalam bhap bini bangsa takik di tỉnh Kiên Giang paglong akaok sahaneng, bruk ngak , gam haong karja palei jak ba bhap bini peih ngak siam jalan tacei ba di Đảng, hukum di Karja ngak brei takik bruk yak ba gauk tagok pakat angaok.

Bộ Chỉ huy Bộ đội Biên phòng tỉnh Sóc Trăng pambuak bruk haong Sang bac Trung cấp Paly Nam Bộ di Sóc Trăng bahrau peih tal pato pasram paglaong sap Khmer thun 2023 ka urang jakar, urang lin di Bộ đội Biên phòng tỉnh. Hu mbaok tame bac tal sap Khmer mbang ini hu 85 urang lac sĩ quan, urang lin daok ngak bruk di Bộ Chỉ huy saong dom đồn Biên phòng, oh ka hu bac sap Khmer. Tal bac peih tabiak dalam 25 harei haong 200 mon bac, hu bac di labik Bộ Chỉ huy Bộ đội Biên phòng tỉnh saong bac online tapa mạng Internet kayua gru pato di sang bac Trung cấp Paly Nam Bộ dang pato.

Sở Ilamu, The thao saong Dulich tỉnh Dak Lak birau peih tal pato bruk taong main chieng saong alat ragam bangsa Ê Đê ka bhap bini bangsa takik xã Cư Pơng, huyện Krông Búk. Dalam tukvak meng harei 26/10 mbiah tal harei 21/11, 25 urang bac lac bangsa Ê Đê umo meng 13 thun tal 43 thun di buôn Kbuôr, xã Cư Pơng hu mbaok tame tal pasram lac 2 nghệ nhân: Y Gôt Ayun saong Y Roh Niê yaih khan ka ilamu kong chieng Tay Nguyen saong dom janih alat ragam di bangsa Ê Đê nan lac: Đinh buôt, đinh năm, ki pah… tacei pato, patua veik ky nang taong chieng-paoh pasar, alat ragam bangsa.

An ninh di ban ine Bruxelles, Bỉ hu khik catang dahlau di tukvak dom urang dang akaok Liên minh châu Âu taom gauk ginum biai. Ini lac Nyaom biai pakat glaong abih di 27 urang dang akaok dom taneh ia Liên minh châu Âu kuhria meng di tuk patuh tabiak bruk mesruh gauk di Gaza. Yaok ratuh cảnh sát hu ieu pataom piah khik caga labik ngak bruk di Hội đồng châu Âu – labik peih nyaom biai. Dom labik jaik taphia nan jeng hu pacang veik, takik brei menuac nao mai. Asal kadha mbang nyaom ini, langiu di bruk daong Ucraina, bruk di Gaza hu urang dang akaok Liên minh châu Âu biak caik hatai sangk apiah ba tabiak panuac ndom haong gauk ka bruk ini. Dalam tuk hu dom taneh ia ndom tal quyền tự vệ di Ixraen, dom taneh ia karei jeng suh sah ka bruk sron mbon di urang Palestin saong bruk srau kadau gah ngak pahla dak harei dak trak damak di Gaza.

Anek manuac mbuan lahik bruk pasang iek ngan haong trí thông minh nhân tạo (AI) dalam rilo bruk.  Ini lac khaw tin hu Thủ tướng Anh Rishi Sunak ndem meyai hoang gah bao chi harei 26/10 tuk bac tui sa harak pathau khan hu Rajaei Anh peih ngak birau ini. Tui Thủ tướng Anh, yaom lac trí thong minh AI meda jhul pakhang bruk cak rok kinh te, paglong preih meriak gauk di anek manuac  saong langyah dom bruk bo anek manuac bhian sahaneng tal, min nyu jeng ba mai dom bala saong bruk huac kandah birau. Thu tuong Anh brei thau, taneh ia ini padang sa Viện An toàn ka tri thong minh AI akaok meti di dunya saong meda peih sa nyaom biai ka trí thong minh AI di adit anak.

Rajaei Japon daok pamaong tal bruk daong dom doanh nghiệp taneh ia ini tame saong patagok dom bruk pablei salih di dom taneh ia daok cakrok di Nam Bán cầu. Tui nan, Japon hu jalan daong 140 tỷ yên (samu labaih 930 triệu đôla) ka dom Cty taneh ia langiu hu mbaok tame dom darak pasar di Nam Bán cầu, dalam nan hu dom taneh ia châu Phi, châu Mỹ Latinh saong dom taneh ia daok cakrok di châu Á. Tui Mintri Kinh tế Japon, dom jalan ngak piah patagok talei pambuak bruk di Japon haong dom taneh ia di Nam Bán cầu. Pok jien daong meda daong ka dom Cty Japon patagok bruk pablei tabiak negar langiu atau patagok bruk pabak dom kaya pandap praong. Tui kuhria, pok jien daong hu ba tame kadung jien karja pabak tame thun jien padai ini./.