Patui veik danak mbang nyaom ka adat hukum bilan 8, harei ini, Ủy ban Thường vụ Quốc hội brei panuac tame danak dak Hukum pacang caga bruk rao jien. Kuhria meng thun bloh tal ini, rilo jalan ma-in mbia tapa jalan online njauk taong tayah. Jaik abih dom jalan talei me-in mbia ini jeng hu pambuak tal jien ao saong bruk rao jien. Pagap yau jalan ma-in mbia tapa hệ thống Evol ngan haong paok jien lac labaih 30 ribau tỉ đồng; jalan peih bruk main mbia tapa blah Nagaclubs.com ngan haong paok jien labaih 87 ribau tỉ đồng. Kayua yau nan ye, bruk pasiam dom adat ka pacang caga rao jien, abih di nyu nan lac bruk peih ngak Hukum pacang caga rao jien hu pasiam veik lac sa dalam dom bruk hu makna praong piah pacang caga bruk rao jien, pacang caga bruk tham nhũng.

Tổng Liên đoàn Lao động Việt Nam brei thau, yaom lac, tui kuhria hu labaih  3,4 triệu urang ngak ginup  tanut taduan jien dong pah sang  trọ tui sarak ka  08 di Thủ tướng rajaei, min, tal abih harei  15-8, dom tỉnh, ban bahrau mbaoh tangin brei peih jien ka 1,2 triệu urang ngak haong yaom jien abih tih lac 876 tỷ đồng. Mintri LĐTB-XH brei thau, bruk taduan harak hồ sơ  bahrau,  hu kreik veik; tuk vak anak tal dom tỉnh ban peih bruk dong ka dom urang hu harak hồ sơ nộp tame meng dahlau di harei  15-8, bo oh ka taduan hu jien dong.

Urak ini, urang nong tỉnh Tiền Giang daok ba tangin tame yuak padai bilan Hè Thu 2022 dalam bui sambai kayua padai njauk, pablei hu yaom. Abih di nyu nan lac dom bruk ngak padai chất lượng glaong, padai hữu cơ, urang nong hu laba glaong jang. Tal urak ini, urang nong yuak hu jaik 10.000 ha padai dalam abih tih mblang taneh jaik 22.000 ha, năng suất tui kuhria mek hu labaih 6 tấn/ha, glaong jang dut haong tukvak ini thun blaoh jaik 0,5 tấn/ha. Ngan haong yaom padai glaong jang dut saong thun dahlau labaih 400 đồng/kg, yaom khak drak, jru khik caga phun pala di tanut glaong min urang nong jeng daok hu laba.

Tui panuac khan di dom urang peih radaih, di jaik abih dom bilac thu phí dalam negar, urak ni, jeng dok bruk radaih hu tuah  thẻ thu phí tự động oh padeih (ETC), tài khoản giao thông dok jien, min oh tapa hu  bilac. Urang peih radaih abih rilo tuk vak  padeih di bilac , piah urang ngak bruk meng tangin. Mintri jalan mbak pajeng ba hu panuac pandar  Tổng cục jalan mbak Việt Nam  tacei pato ka  Tổng công ty Đầu tư patagok jalan nduac samar  Việt Nam, dom po ngak mbang  BOT song dom urang pabak  dịch vụ samar pasang iek, ramik pasiam lỗi kỹ thuật di hệ thống, abih di nyu nan lac lỗi oh taduan mbaok thẻ định danh di radaih.

  Harei 17/8, Ủy ban Pasang iek Trung ương brei thau bruk kỷ luật Yam ndok 2 sang iek ruak ban Thủ Đức saong quận Bình Tân tui jalan cảnh cáo saong khiển trách kayua ngak suan bruk pablei salih pandap panda di Công ty Việt Á saong bruk to yaom. Pambuak tal bruk ngak suan ini, Uỷ ban Pasang iek Thành ủy TP.HCM hu kỷ luật khiển trách ong Võ Tuấn Trường, Bí thư Đảng ủy, Yam ndok sang iek ruak quận Bình Tân; ba tabiak truh di Đảng ngan haong ong Nguyễn Minh Quân, Bí thư Đảng ủy, Yam ndok Sang iek ruak ban Thủ Đức. Gam haong nan, cảnh cáo dom manuac urang dalam mban par akaok  Sang iek ruak.

Dom mbang njom ruak đậu mùa khỉ dok tagok khang di grauk labik di dunya pataom rilo di dom urang đồng tính likei. Ni lac panuac ndom di  Tổng Giám đốc gah  Y tế dunya   Tedros Ghebreyesus di sa mbang  nyaom di kapul nyaom ni, rah tabiak di harei kabroi. Urak ni, hu labaih  35 ribau urang njom ruak  đậu mùa khỉ di 92 taneh ia  di dunya, dalam nan hu 12 urang metai. Anak bruk ni, Tổng Giám đốc gah Y tế  dunya hu panuac ieu dom taneh ia di dunya patagok dom bruk  y tế cộng đồng siam lagaih, taphia di jalan jhul pakhang bruk klauk  jru  vắc-xin.

Gilang paraik Khik caga New Zealand harei kabroi brei thau lac tagok yaom jien laba payua veik 0,5 điểm tagok labaih 3%. Ini lac mbang tagok yaom jien laba ka 5 dalam thun ini saong lac jalac jalan pasang iek jien ngoại tệ biak catang abih bo New Zealand pandar kuhria meng di tuk tabiak rai sarak jien padai yau urak ini.

Kuhria tal harei 17/8, urang metai kayua khuah glai di  Algeria  tagok tal 26 urang. Urak ni, gah pacang pandam pui  gam song bruk dong di kapan haoh pandam pui dok kham merat pasang iek dom mbang khuah. Dahlau di nan, sa thun , dom mbang khuah glai di  Kabylie di taneh ia ni, ngak brei takik di abih  65 urang metai./.

Urang lang: H.Pha & Thu Thảo -18/8/2022