Mesup ni (22/9), Ủy ban Thường vụ Quốc hội  ginum biai hukum taneh riya  (pasiam veik). Lac jabat peih ngak bruk khik ramik karja ka gah taneh riya, Akaok mintri Tài nguyên song Môi trường Trần Hồng Hà brei thau: Danak dak hukum taneh riya (pasiam veik) pamong tal bruk khik ramik yaom taneh ka cambaih laih, tantu song lagaih song drak pasa, piah bhap bini song doanh nghiệp hu mbuan lagaih. Bruk klak khung yaom taneh lac njauk hu song pandar yaom taneh jiak song darak pasa jang. Yaom taneh hu  batabiak  yaok thun  atau dalam tuk biến động labaih 30%, dalam  6 bilan ye njauk duah thau veik  yaom taneh.

Hadei di tuk pathau khan hu palih ruah tame tui jalan pilih ruah diem pacacah tamat THPT saong pilih ruah tapa dom jalan karei, tukvak ini, labaih 40 sang bac đại học di dalam taneh ia pathau khan pabak ngan haong yaok ribau urang. Tanut diem taduan harak gar pilih ruah pabak di dom sang bac kuhria tui yaok jalan pilih ruah, dalam nan, ngan haong jalan pilih ruah tui tanut diem pacacah tamat trung học phổ thông, tanut diem taduan harak kuhria meng 15 diem tal labaih 22 điểm. Tanut diem taduan harak gar tui jalan pilih ruah tapa bruk bac taa di pakat phổ thông di dom sang bac jeng meng 16 diem tagok. Tukvak bo dom sang bac taduan harak pilih ruah pabak meng urak ini tal puac bilan 9 saong akaok bilan 10.

Bí thư Tỉnh ủy An Giang Lê Hồng Quang pal akaok kapul ngak bruk di  tỉnh, bahrau nao rivang brei pandap tadhau yuh Lễ Sene Dolta thun 2022 di mikva  Khmer di dom baha dok di  huyện Tịnh Biên. Ong Lê Hồng Quang brei thau, tuk vak tapa, yaom lac dang anak rilo kan kandah, srau kadau di jit  COVID-19, min hu bruk jum pataom gauk, kham merat yam tapa kan kandah, jit COVID-19 hu pasang iek siam, kinh tế - xã hội dok dalam tỉnh hu patagok. An Giang urak ni hu labaih  93.000 mikva bangsa Khmer, meblah jiak  4,2% menuac urang dalam tỉnh; mikva duik rai rilo meng lac bruk ngak nong, dok di  65 baha  Phật giáo Nam tông Khmer.

Akaok UBND tỉnh Bình Thuận bahrau mbaoh tangin tame Sarak mek harei 10/10 yaok thun lac Harei salih số di tỉnh. Harei ini hu peih tabiak yaok thun piah jhul samar bruk peih ngak dom bruk ka salih số pakat negar di dalam tỉnh. Gam tui di nan jeng peih ngak dom jalan ba tabiak, dom bruk di Sarak ka 10 harei 18/3/2022 di Ban Chấp hành Đảng bộ tỉnh Bình Thuận (mbang XIV) ka bruk salih số tal thun 2025, kuhria tal thun 2030. Gam haong nan jeng paglaong hatai saneng di rahra dalam tỉnh ka bruk ngak, makna saong kein laba di bruk salih số jang yau bruk jhul samar hu mbaok tame dalam hệ thống chính trị, hu mbaok di taong abih rahra.

  UBND tỉnh Đồng Nai bahrau pal akaok mbang ginum biai pasang iek harak gar salih bruk pandar glai peih ngak danak dak Tatua  Phước An, pambuak haong  huyện Nhơn Trạch song ban Phú Mỹ (tỉnh Bà Rịa - Vũng Tàu). Tong abih tih phun jien buh tabiak ka danak dak tatua  Phước An lac jiak  4,9 ribau tỷ đồng meng kadung jien trung ương song tỉnh Bà Rịa - Vũng Tàu. Tui kuhria, bilan 12-2022, tatua Phước An hu padang ngak dalam 5 thun. Piah peih ngak danak dak, gah huyện Nhơn Trạch brei mek veik labaih 4ha jao ka po padang ngak, dalam nan hu labaih 3ha glai pala  song jiak 1ha mbaok ia.

Bruk sarau kadhau pandap mbang di dunya lac dom asal kadha praong di dom mbang ginum biai di Mbang nyaom Đại hội đồng Liên hợp quốc mbang 77. Dom urang par akaok dom taneh ia di dunya saong dom chuyên gia jak ba dom kham marat samar drah piah langyah dom bruk lahik an ninh pandar mbang di dunya. Bruk mesuh gauk di Nga saong U-crai-na, lac dua taneh ia pablei ngũ cốc, khak drak tabiak negar langiu praong abih di dunya ngak trak damak jang bruk sau kadhau pandap mbang, yau dahlau deih njauk kan kandah di jit ruak Covid-19 saong biến đổi khí hậu. Labaih 15% bruk caga khik piah ngũ cốc di U-crai-na njauk lahik meng di tuk bruk mesuh gauk rahtabiak. Dom chuyên gia kakei lac bruk kleh klaoh dom mbang pajeng khak drak meda ngak kan kandah biak trak damak tal bruk yuak kuak di dunya dalam harei hadei.

  Mintri Y tế Thái Lan hu tabiak panuac khan ka bruk pabha veik jit ruak  Covid-19 meng "ruak njom mbak kan kandah"  jeng "ruak njom mbak brei tui iek " meng di harei  1/10, kayua jit  Covid-19 dalam taneh ia dok hu siam veik. Dom jalan ngak di pasak khik ramik  jit  Covid-19 di  Thái Lan hu pasang iek tui jalan pháp lý, y tế, pathau khan song khik ramik tui jalan dong ka bhap bini hu rai duik siam mekre. Nội các Thái Lan khang hatai yah klak jit  Covid-19 tabiak truh harak dom ruak njauk oh brei tame negar, ngan song tuai negar langiu, song brei adat ka tuai dok ruak  Covid-19 hu tame Thái Lan.

Jit praong Covid-19 hu jhul gah kinh tế di Australia tame mbang suy thoái camriep dalam 30 thun tapa, tuk tỷ lệ lạm phát yaok thun hu tagok tal 6,1% di puac bilan 7 – tanut glaong abih dalam dua piluh thun jaik di ini. Yaom pandar daok tagok glaong di Australia kayua yaom pandap mbang, xang manjek, sang danaok saong yaom jien y tế jeng tagok. Dalam nan, yaom sang danaok hu tagok 20,3% dut saong thun dahlau, yaom xang manjek tagok 32%, dalam tuk yaom jien duh ka y tế tagok 7,8%. Langiu di nan, bruk cagar chuỗi cung ứng, pambuak tal jit ruak Covid-19, atau yaom jien pajeng saong yaom khak drak tagok glaong jeng rik tame bruk patagok taong abih tih dom pandap panda pandar./.

Urang lang: Thu Thao & H.Pha – 22/09/2022