Mesup 19/9, Ủy ban Thường vụ Quốc hội peih pakak mbang nyaom ka adat hukum. Akaok mintri Thông tin Truyền thông Nguyễn Mạnh Hùng puac harak pathau khan ka danak dak  hukum  Giao dịch điện tử pasiam veik. Sa kadha bahrau prong di danak dak lac peih prong bruk pasiam veik, pandar gam ka bruk brei harak chứng nhận quyền pandar taneh; quyền ngak po sang song dom taneh riya sang danaok karei, harak ka bruk thừa kế, harak  tut angan kết hôn, harak  ly hôn, harak  khai sinh, hara khai tử song dom harak gar karei karei. Yau nan bruk  pandar  giao dịch điện tử “pacang sre” tong abih dom bruk di rai duik. Bruk peih prong ni iek tui công nghệ số hu caga bloh, bhian randap, siam mekre, pabak hu bruk batabiak.

Kapul 22 urang lac menuac hu angan je saong urang jakar ngak bruk bangsa di An Giang bahrau hu mbang nao bac megru ilamu di Cà Mau, Bạc Liêu haong Sóc Trăng. Dom urang nan hu klah rabha ilamu pathau khan, jak ba bhap bini bangsa takik hu mbaok tame patagok kinh tế, khik ramik saong patagok ilamu meng kan di bangsa. Tui mBan Bangsa tỉnh An Giang, bruk ngak ini piah daong ngak siam bruk jak ba bhap bini bangsa takik ngak njauk tui dom sarak di Đảng, hukum di Karja.

Sở pato megru song  mban bangsa  tỉnh Bà Rịa-Vũng Tàu bahrau peih danak dak taom gaok ndom nyai nao mai di dom urang pal akaok  tỉnh hong gru pato, saong anek saih sang bac Phổ thông bangsa bac gam dok tỉnh. Dom panuac ba tabiak caong lac brei sangka buh jien tabiak ka sang bac ngak dom bruk yau ye: ramik ngak pasiam dom jaman, padang rilo jang dom mblang main di gah langiu, pabak dom trụ ia menyum pak di vòi, jalan ia pandiak, piah palagaih ka dom adei dalam bruk main sambai. Gam song nan, daong duah bruk ngak ka anek saih, sinh viên bangsa takik.

Harei 19/9, lambaok Mban khik ramik danak dak Mỹ Thuận (Mintri jalan mbak pajeng ba) brei thau makna suai padang ngak tatua Rạch Miễu 2 lac kayua suai jao brei taneh. Tal urak ini, Bến Tre bahrau jao mbaok taneh hu jaik 27%; Tiền Giang jeng bahrau hu 2,7%. Dahlau di nan, dalam mbang ngak bruk haong mBan Khik ramik danak dak Mỹ Thuận, UBND tỉnh Bến Tre hu tacei pato dom huyện pataom tame langyah khang bruk peih mbaok taneh, lang talaih tavak tavaiy. Hu thau, tatua Rạch Miễu 2 tapa kraong Tiền, pambuak 2 tỉnh Bến Tre saong Tiền Giang, hu yaom jien buh tame ngak labaih 5.175 tỉ đồng, hu peih ngak di puac bilan 3/2022, tui kuhria hu ngak salah di thun 2025.

Kapul  Chữ thập đỏ tỉnh Đồng Nai bahrau peih danak dak iek ruak, brei jru saoh song brei pandap ka bhap bini di 2 xã: Phú Thịnh song  Phú Lộc (huyện Tân Phú). Dalam danak dak, 300 urang dalam boh sang sarak karja, boh sang bangsa takik, urang umo taha, sang kan kandah, hu iek ruak, brei jru, song taduan pok pandap hu yaom  600 ribau đồng. Tong abih phun jien ka bruk ni lac 180 triệu đồng.   

Tổng thống Mỹ Joe Biden ndom lac bol bala Mỹ meda khik caga Đài Loan (Trung Quốc) meyah bhum taneh ini njauk “tấn công”. Panuac nan brei mboh bruk biak takik hu di karja Mỹ ka bruk Đài Loan, hu ba tabiak dalam tuk karja Tổng thống Biden daok tabiak bruk ieu Quốc hội taneh ia ini brei tapa bruk pablei phao ndao yaom 1,1 tỷ USD ka Đài Loan (Trung Quốc). Tukvak tapa, bruk catang tagok di Mỹ saong Trung Quốc tagok glaong hadei di tuk urang jakar ngak praong di Mỹ nao ravang Đài Loan.

Mintri dom bruk  xã hội Indonesia brei thau , rajaei negar ni hu dong ka labaih  946.800 uranaih metui, yaok adei taduan hu  200 ribau  rupiah (labaih  300 ribau đồng) yaok bilan. Gam saong nan hu dong  334 ribau urang umo labaih 80 thun, abih di nyu nan lac dom urang umo taha dok sa drei. Dalam bilan 12/2022, jiak 99 ribau urang yaoh jo jeng taduan hu jien dong. Dahlau di nan, rajaei  Indonesia tabiak bruk brei dong jien mbaok ka labaih 20 triệu boh sang duah hu jien takik di grauk labik dalam taneh ia.  Dalam bilan  7, bruk  lạm phát di  Indonesia tagok  4,94%, tanut glong di abih  dalam 7 thun tapa.

Takik di abih 19 urang metai saong 8 urang karei njauk rambus trak dalam sa bala angaok jalan nao mai di Nigeria tuk 2 sruh radaih paoh gauk haong sa sruh radaih pajeng pandap di ban ine A-bu-ra (Abuja) harei 18/9. Bala nan mboh lac kayua dom urang peih radaih biak samar tapa tốc độ brei adat saong tapa mbaok suan. Angan di dom urang metai oh ka hu khan brei thau kayua daok cang dut iek ADN. Bala radaih paoh gauk bhian rah tabiak di Nigeria kayua pajeng biak rilo jang, jalan oh siam saong urang peih radaih oh ngak njuak tui adat khik caga salamat mangaok jalan./.

Urang lang: M.P & H.Pha -19/9/2022