Di Mbang nyaom, Akaok Quốc hội ieu peih ngak catang Sarak 178 ka bruk pasang iek quyen pacang caga tham nhũng, tiêu cực dalam bruk padang ngak hukum. Kakei dom urang dalam Ủy ban TVQH brei mboh cambaih asal kadha, jalan ngak, hatai sahaneng, oh plaih nyaih dom bruk cuang kandah, mbuan rah tabiak bruk lih tame, mek kein laba meng sarak. Gam tui di nan jeng brei thau lac akaok thun 2025 meda peih mbang Ginum biai adat hukum, piah ginum biai dalam jang, tantu cambaih jang piah paglaong chat luong, nao tame dalam bruk padang ngak hukum.

UBND tỉnh Đồng Nai bahrau tabiak jalan ngak daong ramik pasiam sang daok ka bhap bini bangsa takik. Tui nan, meng ini tal bilan 11, tỉnh Đồng Nai brei daong ramik ngak pasiam 9 baoh sang ka dom sang urang bangsa Cam, Hoa, Khmer lac sang kan kathaot, sang jaik si kan kathaot, sang bahrau tabiak truh kan kathaot. Yaom jien daong rilo abih lac 40 triệu đồng ka sa baoh sang. Bruk daong sang daok hu daong ka bhap bini dom bangsa takik samar tani tanat raidiuk, rik daong khik kajap an sinh xã hội di dalam tỉnh. 

Urang ngak nong huyện Tân Phước, tỉnh Tiền Giang hu peih mbaok taneh, pala hu jaik 15.400 ha manaih chuyên canh, yaok thun brei baoh manaih labaih 300.000 tấn, praong abih di bhum kraong Tiền. Urak ini yaom manaih pablei baoh janih 1 hu urang kak kaiy pataom blei tal 11.000 đồng/kg, glaong abih meng nan mai. Tui yaom ini, yaok ha manaih mikva hu laba labaih 200 triệu đồng, kaoh abih phun jien daok laba labaih 100 triệu đồng, glaong jang dua mbang thun blaoh. Kayua phun manaih chuyên canh, hadei di dom thun hu laba, urang ngak nong padang hu bruk mbang ngui hu khang kadang, jeng lac urang kaya mada di bhum taneh Đồng Tháp Mười klak saoh dahlau daih.

Tui yaok pataom, meng thun 2015 tal urak ini, di tỉnh Bạc Liêu rah tabiak 38 mbang glut jaleih taneh, glut jaleih takai kraong, takai tasik atah abih tih labaih 3.600 met. Daok di dom labik karei dalam bhum ĐBSCL jeng hu tabiak panuac samar drah ka bruk glut jaleih takai kraong. Di tỉnh Bạc Liêu hu tabiak panuac samar drah ka glut jaleih ar tasik biển Đông. Di tỉnh Cà Mau meng akaok thun tal ini hu labaih 20 mbang glut jaleih. Daok di ban Cần Thơ hu 24 mbang glut jaleih katai kraong, atah abih tih jaik 830 m.  

UBND tỉnh Long An bahrau tabiak bruk samar drah glut jaleih takai kraong Vàm Cỏ Tây labik di puk Voi Đình, xã Thủy Đông, huyện Thạnh Hóa ngan haong tanut biak khang. Labik glut jaleih ini atah labaih 32m, taneh njauk glut jaleih tui janih hàm ếch saong mbang dalam tame jalan tuh bê tông 3m, dalam meng 4 - 5m, ngak kan kandah tal raidiuk di labaih 100 urang. Tui So Ngak nong saong patagok palei pala tỉnh Long An, bilan thu 2023 - 2024 bruk El Nino ngak ka labaih 8.150 sang rahra njauk kurang ia pandar. Meng caga dahlau saong samar drah peih ngak dom jalan langyah pacang caga, nan ye tỉnh Long An oh njauk kan kandah, khat lahik kayua langik pandiak, njom ia mbak..

Tamat Thế vận hội Paris 2024, Trung Quốc saong Mỹ jeng mek hu 40 huy chương ameh. Dua taneh ia mbang camereip gam dang dhi 1 dalam angan mek hu huy chương ameh Olympic. Phaok akaok kapul thể thao Trung Quốc lac Châu Tiến Cường taong yaom, ini lac bruk siam di abih dalam sajarah dom giải pakacah taneh ia langiu di Trung Quốc, saong brei thau lac, kapul Trung Quốc hu rilo salih bharau khang ka dom janih pakacah, dom mbang pakacah saong dom huy chương ameh, jeng yau dom tỉnh hu pato pakai saong hu urang pakacah mek hu huy chương ameh

Dom menuac ruak glo akaok pak Nhật Bản tagok glaong jang 3 mbang dut saong 20 thun dahlau. Tapuk mbong thun 2024, brei thau lac, dom urang ruak taong ruak ngoai tru gaok dom janih ruak tam than yau tram cam, sarau kadau rami ramik saong sarau kadau bruk mbang huak tagok tal labaih 5 trieu 860 rabau urang di thun 2020, gam haong jeng njauk caik hatai lac, dom bruk ngak brei catang tagok hu biak rilo, meng pandar rilo online, bruk ngak trak damak,  dom bruk gah raong, pato anek bik.

Tui sa roh duah bahrau hu ba tabiak khan brei thau, jaik 400 triệu menuac mangaok dunya njauk ruak COVID-19 dui atah. Abih tih yaom jien iek glang prein yava  saong jien lahik nao di urang ruak kayua ruak kik oh nao ngak bruk hu, lac jaik 1000 tỷ đô la Mỹ di mangaok dunya yaok thun, nan lac samu 1% yaom kinh tế dunya. Langiu di nan, bruk taong ruak ka yaok ratuh triệu urang ruak covid 19 dui atah jeng daok gaok kan kandah tuk dom urang praong di dunya njauk COVID-19 dalam tukvak atah tagaok tal 6%.