Akok UB bhap bini Ban raya HCM birau ba tabiak bruk palih ruah urang jakar, kong chuc, vien chuc njauk mbang tui sarak “ urang naih joi”. Sarak nan hu brei ba tame pandar tui Sarak 25/2023 di HĐ bhap bini TPHCM. Kadha biak gheih hu mboh di Sarak 25 nan lac tuk urang jakar, kong chuc, vien chuc hu ba angan tame sarak “urang naih joi” meda taduan hu mbang ralo sarak daong di ban raya. Yau ye: hu daong meng tal 4 mbang jien bilan biar kuhria tui bhum; mbang tui jien bilan pabak veik kuhria tui bruk ngak hu salah; daong jien pah sang tagok tal 7 trieu dong sa bilan. Langiu di nan,  dom urang jakar nan hu palih ruah brei nao megru paglong ilamo, daong jien megru pasram.

Uan raok harei Katê di urang bangsa Cam agama Ahier, lambaok UBMT Negar Viet Nam tỉnh Bình Thuận hu mai rivang, tadhau ayuh Kate dom ong Adhiar, ong paseh, urang hu angan je di dua huyen Tuy Phong saong Bắc Bình. Di dom labik hu mai rivang, kapol urang jakar  hu rivang, alin pandap ka 20 halau janeng, urang hu angan je saong kapol  Hoi dong halau janeng Balamon tỉnh. Muk Bố Thị Xuân Linh – Akok Ủy ban MTTQ Việt Nam tỉnh caong khin, ngan haong angan je di drei, dom ong Adhiar, ong paseh, halau janeng, urang hu ilamo patui veik ngak brei patagok ilamo siam gheih meng kan di bangsa drei; patagok kinh te, hu mbaok tame khik brei salamat xa hoi, rik daong dom bangsa  dalam tỉnh peih ngak siam dom bruk hu ba tabiak piah cakrok patagok bruk ngak mbang kinh te- xa hoi. 

UBMT Negar Viet Nam xã Châu Lăng, huyện Tri Tôn, tỉnh An Giang pambuak haong urang ngak pahala mai meng TPHCM peih bruk jao brei radaih juah ka dom adei anek saih bangsa Khmer di harei Sene Dolta thun ini. Danak dak hu jao brei ka 20 adei anek saih sang kathaot, yaok adei sa sruh radaih juah, kuhria tui jien abih tih 32 trieu dong. Tapa nan, daong dom adei hu nao tal sang bac, jeng yau rik tame gam haong karja palei ngak brei tani tanat raidiuk xa hoi.

Urang ngak hamu tỉnh Hậu Giang tam drak hu labaih 27.700 ha padai Thu Đông, dalam nan ralo taneh hamu padai daok sroh nerang jaik  tathak saong tal tukvak si yuak. Yau nan min, hajan gam gam ngak padai jaoh jaleih truh daok takik asar, dalam tuk nan jien mac nyuk tathuak ia tabiak, jien yuak tagok ba tal mikva khat lahik jien biak ralo. Anak bruk kuhria mboh dahlau ia angaok dom kraong, ribaong meda tagok glong  kayua hajan tathaiy, ia ndik, So NN & PTNT tỉnh Hậu Giang iew karja dom bhum palei dalam tỉnh pakhang bruk pasang iek saong ngak pakhang dom ar pacang kraong ribaong, binek ia piah khik brei tathuak ia sumu ka dom mblang hamu.

Kong an tinh Đồng Nai birau ba tabiak kaoh tui hukum, chap mek kareik 2 urang ngak bleik saleih karja di bhap bini. Dahlau di ini harei 30/8,  Kong an tỉnh duah mboh, tapa tangi sua 2 urang nan hu mbaok tame kapol khung bo “ Rajaei  pakat negar Viet Nam tuk nan” di Mỹ. Dua urang nan lac Nguyễn Viết Tú saong Trịnh Bá Hạnh daok di Ban Biên Hòa. Harei negar 2/9,  jabat chuc nang mek hu yaok rituh blah hala dok hu thaok jalan sọc, mac tinh, may in, cakak bruk khin ngak sraw kadau. Mbiah tal harei 30/9, Jabat  An ninh pasang iek brei chap mek, duah thau labik daok di dua urang nan. Camereip dom urang taduan bruk ngak suan, brei ngak tui hukum langyah, chap mek.

Anh hu jeng negar akok meti dalam Nyaom dom taneh ia kong nghiep patagok G7 brei padeih ngak điện meng dang. Sang mac điện meng dang puac abih di Anh  hu brei kareih pabah mbang, padeih labaih 140 thun ngak tabiak điện meng dang di taneh ia ini. Bruk cakak trun điện dang piah trun takik tathuak thak nerak sang camin di Anh trun meteh  kuhria meng thun 1990. Anh hu ba tabiak jalan khử carbon  dalam gah ngak điện di thun 2030. Taneh ia ini kham tal thun 2050 ngak brei oh daok nerak tathuak tabiak. 

Sa mbang taong meng to birau rah tabiak di sieu thi pak Thượng Hải, Trung Quốc di melam  30/9, ngak 3 urang metai saong 15 urang karei njauk rambuac. Tui canh sat di pak nan, urang taong meng to lac likei umo 37 thun, chap hu di labik nan. Ini lac sa dalam dom bruk taong meng to biak trak di Trung Quoc dalam thun ini. Meng bilan 5 tapa, sa mbang taong meng to jeng rah tabiak di ban Hiếu Cảm, tỉnh Hồ Bắc, ngak 8 urang metai saong  sa 1 njauk rambuac.

Meda hu 600 urang metai kayua ribuk Helene, ribuk tuh tame Florida - Mỹ adit dahlau, ngak khat lahik trak di 10 tieu bang. Mỹ hu brei labaih 3.500 urang ngak bruk caga pambuak dom bang saong daong ka dom bhum gaok kan kandah kayua  ribuk. Dom bruk kham merat saong daong di dom pakat tieu bang saong pambuak dom bang daok hu peih ngak. Hu jaik 600 urang pabak brei mai labik gaok kan kandah kayua ribuk dalam dom harei anak tal. Dom kong ty bao hiem kuhria mboh dahlau khat lahik kayua ribuk nan labaih 15 ty do la tagok tal 100 ty dola./.