Ủy viên Mintri Chính trị, Bí thư Thành ủy TP.HCM Nguyễn Văn Nên haong kapul ngak bruk hu nao rivang, alin pandap Tết di urang pan akaok Ndang, Kanja ka labaih 200 sang kan kathaot, sang gaok kan kandah di ban Biên Hòa saong 200 urang ngak gaok kan kandah di tỉnh Đồng Nai. Tui nan, tỉnh Đồng Nai jeng jak ba hu 90 tỷ đồng alin pandap ka labaih 149.000 sang kan kathaot saong urang ngak, tui kuhria, yaok paok meng 500.000 đồng tal 1 triệu đồng. Langiu di nan jeng buh tabiak 30 tỷ đồng alin pandap ka 30.000 urang ngak gaok kan kandah. Liên đoàn Lao động tỉnh daong 467 harak ve radaih pui, harak ve kapar haok ka urang ngak gaok kan kandah rilo thun ka oh hu nao palei mbang Tết.

Mban Thường vụ LĐLĐ tỉnh Sóc Trăng bahrau peih ngak danak dak “Tết jum pataom - Xuân daong gauk” thun 2024. Tapa nan, mBan peih bruk hu jao labaih 6.300 pok pandap brei ka đoàn viên, urang ngak, tui yaom jien abih tih lac labaih 3 tỷ. Tỉnh ủy, UBND tỉnh alin hadiah 400 paok pandap ka urang ngak, kuhria tabiak yaom jien abih tih lac 490 triệu. UBND tỉnh hu daong labaih 79 tấn brah brei ka 5.300 urang ngak, samu 1 tỷ 200 trieu. mBan Thường vụ LĐLĐ tỉnh Sóc Trăng hu alin hadiah 40 baoh sang Công đoàn brei ka dom đoàn viên, tui yaom jien lac 2 tỷ.

Piah pabak bruk nao mai di tuai damuai, Ga Sài Gòn daok brei pabak 9 sruh radaih pui, saong daok pandar rilo sarak daong ka tuai, yau ye trun yaom harak ve ka dom urang dalam sarak karja, Amaik Việt Nam anh hùng, urang umo praong thun, thương binh, urang jaoh jo trak,…; trun 5% yaom harak ve mbang mai ka tuai tuk blei harak ve nao mai; abih di nyu nan lac sinh viên meda trun yaom meng 10% tal 20% yaom harak vé. Mblang radaih Miền Tây kuhria mboh lac dom tuai mada tagok labaih 29%, tui nan brei hu tal 15.220 radaih pabak ka 420.000 tuai. Piah plaih nyaih bruk meriak gauk, dom mblang radaih peih bruk pablei harak ve tapak di labik saong tui jalan online luac harei malam.

Yaom lac jit aih craoh pabui Châu Phi di xã Xuân Đông (huyện Chợ Gạo, tỉnh Tiền Giang) daok trun joa min karja palei ini jeng daok khik dom bilai dut iek jit saong daok tui iek piah samar pacang abih jit ruak ini. Meng bilan 11 thun blaoh tal ini, xã Xuân Đông njauk khat lahik trak kayua jit aih craoh pabui Châu Phi. dalam xã hu labaih 2.500 drei pabui praong sit njauk ba nao am cuh klaak, abih tih lac labaih 140 tấn. Dom urang nong hu pabui ruak njauk ba nao am cuh klaak jeng hu daong jien tui adat.

Di labik Cồn Nhàn di puk Đông Thành saong puk Hồ Thùng, xã Đông Hải, huyện Duyên Hải, tỉnh Trà Vinh daok njauk glut jaleih trak meng rilo thun ini mai, ngak kan kandah biak trak damak tal raidiuk di rahra. bahrau di ini, mbang ia tagok ngak glut jaleih jaik 100m ar pacang, ngak khat lahik 2ha njam patam, baoh karuac saong ngak kan kandah tal 70ha taneh ngak mbang, pala drak di labaih 110 sang rahra di pak ini. Anak bruk ini, UBND tỉnh Trà Vinh hu ba tabiak harak adat brei padang ngak samar drah danak dak pasiam veik ar pacang ia tagok di labik Cồn Nhàn atah 1.290m, phun jien buh tame lac 8,7 tỷ đồng. Min, danak dak urak ini ka oh hu peih ngak piah pacang caga ia tagok di tukvak tabung glaong di harei 30 tet ini.  

UB bầu cử pakat negar di Liên bang Nga hu tut angan tabiak ứng cử piah pilih ruah ngak tổng thống ka Tổng thống urak ini, lac ong Vladimir Putin. Dahlau di nan, dalam 315.000 chữ ký pachreih tui ong Putin tui adat ba tabiak, UB hu pilih ruah 60.000 chữ ký piah pasang iek saong mboh lac njauk adat jaik abih. Yau nan, ong Putin jeng menuac tabiak ứng cử Tổng thống mbang ka 4 hu tut angan dalam bruk pilih ruah di bilan 3 tal. Ini lac bruk tabiak tranh cử Tổng thống ka 5 di ong. Dahlau di nan, ong hu 4 mbang hu pok ngak urang dang akaok taneh ia Liên bang Nga di dom thun 2000, 2004, 2012 saong 2018.

Yaok ratuh urang ngak nong negar Đức peih radaih katung mai pacang jalan tame tabiak dom pabah lamnge praong di negar ini, daok brei mboh bruk oh njauk hatai haong jalan ngak di rajaei brei cakak trun bruk daong gah ngak nong. Urak ini, dom jabat chức năng pak nan daok ginum biai haong dom urang lambaok dom sang urang nong pak nan piah ba mbuan lagaih ka bruk nao tame labik pabah lamnge. Urang ngak nong di negar Đức trun jalan meng di bilan 12 thun blaoh piah cagar veik bruk klaak daong gah ngak nong dalam tuk dom urang ngak praong daok kham marat pasiam veik bruk sarau kadau kadung jien kanja.  

Gah tui iek bruk langik tasik negar Argentina brei tagok tanut báo động đỏ di rilo labik dalam taneh ia kayua pandiak khang tagok tal 40 độ C. Dalam nan, njauk caik hatai lac di dom labik la-an saong hu ngin dahlau daih, urak ini lac labik pandiak khang di abih. Urak ini daok lac bilan pandiak di Nam bán cầu, meng bilan 12 tal bilan 3. Mai meng bruk La Nina nyu ba tal pandiak di Argentina. Kuhria meng thun 2019, Argentina saong dom taneh ia jaik taphia nan biak having akaok glaih glar haong dom mbang pandiak bhang khang di abih./.