Page harei 9/12, nyaom anek saih, sinh viên, dam dara bangsa takik hu mbaok Var meyaom anek saih, sinh viên, dam dara bangsa takik naih gheih thun 2022 hu mai tal ban ine Ha Noi. Thun ini hu 142 adei hu pok meyaom, mai meng 47 tỉnh, ban di 50 bangsa. Ngan saong kadha “ Jalan tal caong khin”, ini lac bruk peih ngak yaok thun, piah pok meyaom bruk kham merat bac da-a di bangsa Viet Nam; pok meyaom, pachreih bruk kham merat, yam tapa kan kandah, piah ngak hu rilo bruk naih gheih dalam bruk bac da-a, pasram patia saong hu ngak bruk daong xa hoi di anek saih, sinh viên bangsa takik thun bac 2021 -2022.

Thun 2022, dom pakat Kapul urang njauk jru mek kalik kruac/dioxin dalam taneh ia jak ba hu jaik 555 tỷ đồng daong ka urang njauk bala saong sang hu urang njauk bala jru mek kalik kruac yam tapa kan kandah, tani tanat raidiuk. Meng pok jien ini, dom tinh, ban hu daong padang ngak sang, jao jien bac ka anek di urang njauk bala, daong phun jien, blei pajaih phun pala, athur raong ka sang urang njauk jru mek kalik krauc. Tame tết Nguyên đán Thun sak tapai 2023, kapul hu peih bruk brei jaik 100.000 papk pandap Tết, yaok paok yaom meng 1 trieu 2 rituh ribau dong alin ka urang njauk jru mek kalik kruac saong urang kan kathaot di dalam taneh ia.

Di mbang tangi sua – javap jalei HĐ bhap bini tỉnh Bình Thuận page 9/12, gah y tế taduan hu rilo bruk sangka, caik hatai, abih di nyu nan lac bruk kurang jru saong pandap y tế. Tui Sở Y tế tỉnh, di Bình Thuận, bruk kurang jru, pandap y tế tok hu tuk saong hu pabak pasiam aval. Kayua bruk kuhria caga dahlau oh ka sumu bruk pandar ba tal bruk blei, ba tame gilang khik piah oh sumu. Langiu di nan kayua kan kandah di jit COVID-19, bruk ngak tabiak klaik klaok. Sở saong dom gah daok pasiam dom kan kandah, samar pabak ginup jru, pandap y tế duh ka bruk dut iek ruak, taong ruak.

Thun 2022, mbang camriep hadei di rilo thun, taong abih 19 asal kadha ka bruk KT - XH di Tây Ninh mek hu saong yam tapa Sarak ba tabiak, dalam nan hu abih tih 9 paka gah kinh tế yam tapa tanut di Sarak (tỷ lệ 100%). Pagap yau GRDP tagok 9,56%, glaong jang bruk patagok di dalam taneh ia (lac 8%) dang ka 16/63 tỉnh, ban; dang akaok dalam 8 tỉnh, ban bhum kinh te praong gah marang negar. Brei masaiy đầu tư công mek hu 96,97% bruk ba tabiak… Thun 2023, Tây Ninh pataom tame peih ngak hu siam lagaih 4 jalan ngak ka bruk cak rok patagok jalan mbak nao mai, ngak nong công nghệ glaong, du lịch, salih bahrau hành chính saong salih số.

Jaik 12.000 urang pakacah dalam negar saong dunya tut angan tame pakacah Giải nduac Marathon Dunya TP.HCM 2022 peih tabiak di page 9/12 pak di TP.HCM. Mban peih bruk brei thau bilan pakacah mbang 5 ini, pamaong tal bruk siam jang ka urang pakacah, Mban peih bruk pabak tagok dua mbang labik ia, labik ngak la-ar, daong y te…di angaok jalan nduac. Dom bruk karei gam haong dom bruk ndem meyai nao mai, nyaom biai klak rabha ilamu hu peih ngak meng ini tal harei 11 bilan 12. Giaỉ nduac biak meda peih ngak di Harei adit 11/12 di Thảo Cầm Viên Sài Gòn.

Mỹ saong Nga bahrau peih bruk salih urang guk di Dom Tiểu vương quốc Ảrập Thống nhất (UAE). Mỹ peih palao urang Nga angan Vích-to Bâu (Viktor Bout), njauk Mỹ kaoh 25 thun guk kayua pabak phao ndao brei kapul brok tagok di dom labik pandiak di dunya. Salih veik bruk nan, Nga peih palao ngôi sao bóng rổ nữ Mỹ Brittney Griner, njauk kaoh 9 thun guk kayua dalam kadung teik di urang nan hu pakao điện tử hu manjek cần sa. Ini hu taong yaom lac sa bruk biak siam takik hu dalam tuk bruk daok catang tagok di dua gah dui atah dalam tukvak tapa, abih di nyu nan lac hadei di tuk patuh tabiak bruk mesuh gauk di Ucraina.

Cục pasang iek Jit ruak Thái Lan brei thau urang ruak COVID-19 di Bangkok saong dom labik dulich danei angan di taneh ia ini dak harei dak ralo tagok. Urang ba tame sang iek ruak trak saong metai kayua COVID-19 jeng tagok samar. Bhap bini hu kakei urang cuh pataik pacang idung pabah di labik pataom rilo manuac, bhian rao tangin saong klauk jru vaccine COVID-19 pabak HADEI 4 bilan piah takik njom ruak gilac atau pacang caga dom ruak karei.

Mintri Quốc phòng Nhật Bản hu padang Kapul pacang caga mangaok không gian mạng ngan haong abih tih 890 urang, hu brei bruk pacang caga dom mbang taong tame mạng; khik ramik, pandar hệ thống khau tin phòng vệ di Mintri Quốc phòng Nhật Bản. Tui kuhria thun 2027, kapul ini meda tagok labaih 4.000 urang. Rajaei Nhật Bản daok pasang iek brei salih jalan ngak an ninh negar saong kuhria khan brei thau dalam bilan ini./.