Bruk kinh te – xa hoi di dom tỉnh, ban dalam bhum daok gaok rilo kan kandah

“Pambuak gauk patagok bhum palei Nam Trung Bộ dalam tukvak birau” lac kadha ndem meyai kayua Mban tacei pato pataom iek veik Sarak 39/2004 di Mentri Chính trị ka bruk patagok kinh te- xa hoi saong khik kajap quoc phong, an ninh bhum Bắc Trung Bộ saong bhum tapen tasik Trung Bộ tal thun 2010 saong Panuac tamat ka 25/2012 ka bruk peih ngak Sarak 39 di Mentri Chính trị bahrau peih tabiak tuk page ini 24/6 di ban Nha Trang. Di var ndem meyai nao mai, ong Trần Tuấn Anh, Ủy viên Mentri Chính trị, Akok Ban Kinh tế Trung ương brei thau, bruk kinh te – xa hoi di dom tỉnh, ban dalam bhum daok gaok rilo kan kandah, 3/4 tỉnh ban dalam bhum oh sumu kadung jien, bruk kinh tế dalam bhum  daok sit sot saong mbuan khat lahik. Tapa bruk cak rok patagok  hu mboh bruk meraik gauk ka kein laba di dom bhum palei, bruk pambuak gauk daok klaih klaoh, kurang bruk ba jalan, tacei ba di Karja, kein laba rilo gah, rilo bruk oh ka hu ba tame pandar ngak, patagok.  

Harei 24/6, UBND tỉnh Tây Ninh brei thau, bahrau pambuak bruk haong Tập đoàn công nghiệp viễn thông Quân đội (Viettel) peih tabiak mạng 5G di dalam tỉnh. Tây Ninh lac tỉnh ka 19 dalam taneh ia pabak riyak 5G, peih tabiak jalan khang kajap ka bruk chuyển đổi số saong padang đô thị thông minh,  tui nan pachreih patagok bruk pandar abih gah công nghệ số, paglaong siam mekre raidiuk, bruk pala drak, ngak mbang pablei salih saong dom bruk khik ramik, tacei ba bruk KTXH.

Di tỉnh Kon Tum, mbang akaok meti Chi Cục pala drak saong Khik caga phun pala tỉnh brei thau lac hu ruak  patih hala padai. Meng 13 ha camereip, urak ini taneh pala tabau njom ruak tagok labaih 31 ha ngak khat lahik trak ka urang nong. Ong Trần Ngọc Luận, Akok jabat Khik caga phun pala saong Pasang iek jit dalam negar, Chi cục pala drak saong khik caga phun pala tỉnh Kon Tum, brei thau ruak patih hala tabau njom mbak tapa pabam pajaih,  tapa gha tabau saong njom mbak ruak meng halak halin, gam kakei mikva urang nong brei pruh jru pametai halak pacang ruak.

Harei 23/6, Gah Cảnh sát điều tra Công an tỉnh Ninh Thuận hu panuac ieu Sở Tư Pháp, Sở Tài nguyên saong Môi trường, dom jabat tut angan taneh riya, taong abih dom jabat công chứng dalam tỉnh oh ngak dom harak gar pablei salih, chuyển nhượng, alin hadiah, padang drap ar pambuak tal dom menuac urang. Dalam dom menuac brei padeih bruk nan kayua mboh lac ngak suan bruk taneh riya, hu ong Diệp Xuân Minh (umo 54 thun, phaok Chủ tịch UBND huyện Thuận Nam), ong Võ Thể (umo 53 thun, dahlau daih ngak Phaok Chủ tịch UBND huyện Ninh Hải – urak ini daok ngak Phó mBan Dân vận huyện Ninh Hải) saong Trần Anh Tuấn (umo 39 thun, dahlau daih ngak Phó phòng Tài nguyên & Môi trường huyện Ninh Hải).

Mon 4 dah page 24/6, hu pui khuah di sang glong 3 tal di jalan Điện Biên Phủ, phường 4, quận 3, TP.HCM. Tuk cảnh sát hu mbaok, apui khuah  khang, 2 urang gar dalam nan prew ieu daong. Cảnh sát samar yah pabah mbang sang piah padam apui. Langiu di nan, cảnh sát  ba bình dưỡng khí, ndik takai nyan  tagok tal 2 piah daong dua urang daok gar lac muk Nguyễn Thị Vân (umo 85 thun) saong sa-ai  Lê Thị Tuyết Nhung (umo 30 thun) trun gah ala hu siam mekre, salamat.

Karja Đài Loan (Trung Quốc) bahrau khan lac pabak brei 1 triệu đôla Mỹ piah daong dom menuac njauk bala dalam mbang megei baoh taneh di Ápganixtan, pabak veik panuac ieu daong di Liên Hợp Quốc saong dom kapul ngak pahla.  Dahlau di nan, harei kabroi, urang brei panuac di Mintri Ngoại giao Hàn Quốc Choi Choi Young-Sam jeng brei thau, rajaei Hàn Quốc daok kuhria pabak brei 1 tỷ đôla Mỹ piah daong ngak pahla chip ka dom urang njauk bala megei baoh taneh di Ápganixtan. Urak ini, rilo kapul ngak pahala di dunya saong Liên Hợp Quốc daok hu mbaok di Ápganixtan piah daong bruk hadei di mbang megei baoh taneh.

Meng 65 phieu njauk hatai saong 33 phieu cagar veik, harei 23/06, mbang akaok meti hadei di jaik 30 thun Thượng viện Mỹ hu brei tapa 1  hukum pasang iek phao sieu. Hukum piah pakhang bruk pasang iek lý lịch ngan haong urang blei pahao umo ala 21 thun, pabak yaok tỷ đôla ka dom danak dak taong ruak tâm thần saong daong dom tiểu bang peih ngak dom hukum hala dok bhong meriak, brei adat chap mek phao meng dom urang mbuan ngak brei rah tabiak bala ka urang karei atau rup eng. Hạ viện Mỹ meda buh phieu brei tapa sarak ini harei 24/6.

Kayua pambak meng bruk mesruh gauk di Ukraine, lạm phát di Đức tagok tal tanut 7,9% dalam bilan 5 meng bloh saong lac tanut glaong di abih kuhria meng thun 1990. Yaom pandap mbang tagok khang di abih, ngan saong tanut tagok jang labaih 11% duk haong tukvak ini thun dahlau. Tui kuhria mboh dahlau, yaom jien blei pandap mbang huak, pandap pandar yaok harei di Đức daok tagok glaong, meda tagok tal 10,7% dalam thun 2022./.

 Urang lang: M. Phương & Bhumi – 24/06