Harei 4/3, di ban Phú Quốc, tỉnh Kiên Giang, Mintri Ngoại giao Việt Nam peih nyaom biai pataom iek veik 20 thun ngak bruk neh rabha jalan tapen negar angaok mbaok haluk Việt Nam – Campuchia. Brei panuac peih nyaom biai, Akaok mintri Ngoại giao Bùi Thanh Sơn ndom lac: nyaom biai hu makna biak praong piah brei mboh bruk neh rabhaha hu labaih 84% jalan tapen negar angaok mbaok haluk Việt Nam – Campuchia; pataom iek veik, taong yaom saong ba tabiak dom ilamu dalam 20 thun peih bruk ginum biai neh rabha jalan tapen negar angaok mbaok haluk Việt Nam – Campuchia (1999 – 2019); gam haong nan ba tabiak bruk ngak jalan tapen negar angaok mbaok haluk Việt Nam – Campuchia dalam tukvak anak tal, dalam nan hu bruk jhul samar ginum biai  neh rabha 16% jalan tapen negar daok viek.

Anak bruk yaom xăng menyek dalam taneh ia tagok glong, Thứ trưởng mintri  Công Thương Đỗ Thắng Hải brei thau: Xăng menyek lac pandap pandar yaok harei, pambak tapak tal rai duik bruk ngak mbang di bhap bini, jang yau bruk ngak mbang pablei salih di dom doanh nghiệp, min, dok hu dom srau kadau biak khang ka labik pabak, ngak ka yaom tagok glong, sa binah kayua bruk mesruh gauk di  Nga song  Ukraina. Thứ trưởng Đỗ Thắng Hải daok brei thau lac, meng  quý 2/2022, meyah sang mac halang menyek Nghi Sơn oh pabak hu tui panuac sanya ye bruk pabak xăng menyek ka bruk ngak mbang pablei salih song raidiuk di bhap bini jeng dok hu khik kajap..

  Viện roh duah hamlei saong cak rok patagok bruk ngak nong Nha Hố di Viện ilamo ngak nong Việt Nam brei thau, kapul hu pilih ruah, ngak tabiak, pala iek hu jeng 2 pajaih phun nho oh hu asal NH04-128 saong NH04-61. Hadei di sa tukvak pala iek brei mboh 2 pajaih nho bharau tamuh siam, baoh jeng praong siam, hu caong lac meda rik tame bruk maraik gauk ka baoh nho that di darak pasa. Thun 2022, Ninh Thuận meda peih praong mblang taneh pala nho tagok tal 1.365 ha, sản lượng mek tame labaih 33,8 ribau tấn nho that.

Harei 4/3, Sở jalan mbak pajeng ba  tỉnh An Giang pambuak bruk song Công ty cổ Phần Radaih tuai Phương Trang – FUTA Bus Lines peih 15 jalan radaih  buýt oh dong yaom song  124 radaih buýt 20 labik dok rai bahrau  tui tanut chuẩn Châu Âu peih nduac di  tỉnh An Giang. Lac  tỉnh gah angaok krong Cửu Long, hu jalan krong mbuan lagaih, bruk  Công ty cổ phần radaih tuai Phương Trang - FUTA Bus Lines ba tame peih  15 jalan radaih  buýt rik dong patrun bruk pandar radaih eng di drei, plaih bruk gar jalan dom harei dom tuk tabung glong,  pambuak pagam dom bhum, dom labik  du lịch, pasak kinh tế prong song pabak ka bruk patagok  kinh tế di tỉnh.

Pahadar 112 thun Harei urang kumei dunya 8/3, harei 3/3, Kapul Liện hiệp urang kumei tỉnh Đồng Tháp hu peih mbang pacacah “ngak pandap mbang meng caraih”. Mbang pacacah piah rik tame bruk paglaong yaom kaom di caraih Đồng Tháp, hu mbaok 16 kapul mai meng 12 huyện, ban. Dom kapul ngak mboh biak ghieh mata, hu ilamo, pandap mbang biak bingi, pagam haong ilamo pandap mbang di bhum Đồng Tháp Mười. Dom pandap mbang meng caraih di Đồng Tháp dak harei dak hu rilo janih saong daok hu labaih 500 pandap meng caraih di dom kapul pandap mbang, thủ công mỹ nghệ, jru tavao, jru ngak ghieh.

Dong pandap panda y tế di Gah  Y tế dunya  (WHO)  hu ba tal Ba Lan song hu pajeng tal  ban Lvíp (Lviv) di Ucraina, hadei di nan, parabha tal dom labik mesruh gauk meng di harei 4/3. Dom pandap panda ni hu dom bộ dụng cụ iek ruak chấn thương ka 1.000 urang,  dom pandap iek glang y tế karei ka  150.000 urang, dalam nan hu jru iek ruak ung thư song  insulin ka urang ruak maeik saradang. Bruk pajeng pandap y tế hu peih ngak tuk dom urang jakar  Nga song  Ucraina  khan lac njauk hatai brei padang dom jalan ngak pahla piah pabak bruk dong song meda ba tabiak bruk padeih cuk di dom labik piah dong ka bhap bini plaih bruk meriak gauk.

Harei 4/3, dom urang njom bahrau COVID-19 tui harei di Hàn Quốc mbang camriep tagok tal tanut 260.000, dalam tuk bruk njom mbak biến thể Omicron daok tamuh khang di taneh ia ini. Yaom lac dom urang njom ruak bahrau daok tagok, meng harei 5-20/3 rajaei Hàn Quốc hu viek sa bruk daong ka dom doanh nghiệp sit njauk kan kandah kayua dom bruk brei takik ngak piah pacang caga jit. Rajaei brei dui atah tukvak peih ngak ngan haong 12 janih labik đa dụng tagok jang 1 maong, lac brei peih tal maong 11 melam yaok harei min jeng daok patakik bruk pataom manuac, oh tapa 6 urang ngan haong mbang pataom gauk.

Dalam sa kadha vak bahrau ni di angaok harak Nature Medicine, dom urang roh duah brei thau: dom urang njom  COVID-19 mbuan si njauk ruak pambuak tal  boh hatai  30 harei hadei di tuk njom virus SARS-CoV-2. Roh duah hu mboh lac  dom urang njom COVID-19 mbuan si njauk 20 ruak karei di gauk ka  boh hatai yau pandik baoh hatai, viêm màng langiu boh hatai, viêm cơ tim, đột quỵ, rối loạn rak drah glaow akaok song  rối loạn nhịp tim. Dom urang ruak COVID-19 oh tame sang iek ruak, jeng mbuan si njauk dom ruak boh hatai glong jang dom urang oh njom virus./.

Urang lang: Thu Thảo & H.Pha – 5/3/2022