Dalam mbang hop mbao peih tabiak di biar harei kabroi 17/3, Urang Brei panuac  di Mentri Ngoại giao Lê Thị Thu Hằng brei thau, Viet Nam hu caga blaoh blai piah peih pabah mbang taduan raok tuai dunya  saong urang Viet Nam daok di negar langiu mai taneh ia. Mentri Y te patabiak sarak bahrau ka bruk  brei tame negar ngan saong urang tuai dunya mai tal Viet Nam. Gam haong nan, Viet Nam jeng brei pambuak veik bruk miễn thị thực ka urang negar langiu tui bruk ba tabiak di dunya bo Viet Nam lac sa taneh ia dalam nan, miễn thị thực tui jalan hu nao hu mai, dalam nan hu Singapore, Thái Lan saong dom taneh ia Đông Nam Á.

Tui pasang iek di Jabat pato pakai dom quận huyện saong ban Thủ Đức - TP.HCM, pakat mầm non hu 60,49% amaik ame njauk hatai brei uranaih klauk vaccine; pakat tiểu học hu 81,19% saong pakat trung học cơ sở, anek saih tal 6 hu 87,68%. Ong Trịnh Duy Trọng – Akaok jabat Chính trị tư tưởng, Sở Pato Megru TP.HCM brei thau, urak ini ban raya jeng oh ka tabiak jalan ngak ka bruk klauk vaccine pacang COVID-19 ka uraniah, anek saih umo meng 5 tal 11 thun. Dom labik pato pakai, bac da-a dalam TP.HCM jeng daok peih bruk pathau khan ka amaik ame di anek saih umo meng 5 – 11 thun thau ka kein laba di bruk klauk vaccine, dom bruk meda gaok hadei di tuk klauk jru saong bruk khik kajap quyền hu klauk jru pacang caga ruak di uranaih piah hu rilo jang bruk pachreih tui di amaik ame anek saih.

Urak ini, jit ruak Covid-19 di tỉnh Tiền Giang daok tamuh gilac veik, abih di nyu lac dalam sang bac. Sarak 440 di Sở Y tế tỉnh Tiền Giang birau patabiak  Pakat jit Covid-19 di tỉnh meng “ bhum Hijao” tapa “bhum Katam kanjik” lac jit pakat 2, pakat mbuan rah tabiak jit praong. Dahlau di nan, 8 adit gam gam  Tiền Giang lac labik “bhum Hijao”. Karja saong dom gah chức năng dalam tỉnh daok peih ngak pakhang dom jalan pacang jit ruak; dalam nan bruk ngak tui 5 Paka di Mintri Y tế hu brei ngak dahlau abih. 

Pachreih tui bruk peih pabah mbang gilac veik bruk du lịch dalam tuk "siam mekre bahrau" di Mintri Ilamu, Thể thao saong Du lịch, Vietnam Airlines ba tabiak danak dak ưu đãi biak praong ka tuai nao kapal haoh dalam taneh ia saong dunya. Tui nan, yaom harak vé di taong abih dom jalan par dalam taneh ia di Vietnam Airlines daok meng 645.000 đồng sa mbang par nao atau mai, yaom nan hu gam jien thuế, phí. Yaom harak vé nao mai angaok dom jalan par dunya nao Thái Lan, Malaysia, Singapore, Nhật Bản, Hàn Quốc, Châu Âu, Úc, Mỹ lac meng 155 USD (mangaok mala 3 triệu meteh), hu gam jien thuế, phí. Danak dak hu pandar ka tuai blei harak vé meng harei 20 tal harei 29-3 di phòng vé, đại lý, website, ứng dụng di động haong tổng đài di Vietnam Airlines, haong jalan par peih tabiak dalam tukvak meng harei 20-3-2022 tal abih thun ini.

Urang pala kruac aik oh hu asar di tỉnh Hậu Giang daok bui sambai kayua dom harei tapa yaom baoh kruac aik tagok jaik dua mbang dut saong dahlau di tuk Roya Tết. Urang tame tal bein blei kruac aik oh hu asar ngan saong yaom meng 9.000-13.000 đồng sa kilo, tui baoh praong atau sit. Daok yaom pablei di darak tukvak ini jeng meng 15.000-20.000 đồng sa kilo. Tỉnh Hậu Giang urak ini hu labaih 2.700ha pala kruac aik, ralo meng lac kruac aik oh hu asar, hu baoh kuhria rah tapa labaih 14 tấn baoh sa hecta sa thun.

Harei kabroi (17/03), Tổng thống Prang Emmanuel Macron hu ba tabiak jalan ngak piah tranh cử di drei piah duah hu sa jayah dalam bruk pilih ruah tổng thống Prang, tui kuhria hu peih tabiak di bilan 4 tal. Ong Macron sanya ba taneh ia Prang jeng sa taneh ia độc lập tự chủ jang meyah mek hu jayah dalam nhiệm kỳ ka 2.

Kuhria meng ini tal harei 18/3, Cộng hòa Séc brei klak taong abih dom jalan pacang veik ka Covid-19 ngan saong dom urang mai meng dom taneh ia di Liên minh châu Âu saong 8 taneh ia châu Âu karei. Tui nan, dom urang mai meng dom taneh ia dalam harak angan ini meda oh cang vak tame harak tut angan jeng yau oh cang brei brei thau bruk dut iek ruak atau klauk jru pacang Covid-19. Dalam tuk jit ruak Covid-19 trun biak ralo dalam dom adit jaik di ini, Mentri Y te Séc jeng hu ba tabiak bruk oh parabha labik mbuan tamuh jit ruak tui dom sambo mau.

Harei 17/3, yaok rabau urang Ireland saong tuai damuai dunya dalam khan ao ngui cuk hadah tanyak chreih chrai ba gauk tuh mai pasak ban Dublin piah maong iek bruk diễu hành dalam harei lễ Thánh Patrick – lac harei negar Ireland hadei di 2 thun oh peih ngak hu kayua jit COVID-19. Mblang kapal haoh Dublin brei thau, tui kuhria, hu 800.000 tuai nao mai dalam tukvak di bruk pahadar harei Thánh Patrick, dui atah tal harei 24/3.

Urang lang: A.Nghiem & M.P – 18/3/2022