Tui taong yaom di dom urang ilamu, Việt Nam lac darak pasar hu urang blei pandap online glong ka 2 dalam bhum. Tui kuhria mboh dahlau, jien mek tame meng bruk pablei salih online di Viet Nam jaik 39 tỷ USD dalam 3 thun anak tal patgaok 2 laik so. Yau nan, Viet Nam dang dhi 2 hadei Indonesia saong lac sa dalam darak pasar cak rok patagok khang kadang…yau nan ye bruk blei pandap online nan lac jalan pamong tal saong lac “labik taneh” meda ba mai di kein laba, jhul rilo bruk ngak karei  cak rok patagok.

Tây Ninh lac tỉnh hu rilo bangsa, rilo agama. Dalam tỉnh hu 21 bangsa saong 5 agama praong, meblah labaih 70% menuac sia dalam tỉnh. Bhap bini bangsa, agama hu labik dang praong dalam bruk patagok di Tây Ninh. Mat tran negar dom pakat di Tây Ninh bhian peih bruk taom gaok bhap bini, bangsa, abih di nyu lac dom halau janeng, dom urang pan bruk agama, taha palei, urang hu angan je dalam bhap bini bangsa, agama piah samar thau hatai caong jeng yau dom kan kandah, tavak tavaiy dalam bruk agama, dalam raidiuk bhap bini bangsa, piah pok panuac tagok dom pakat angaok piah langyah. Dalam thun 2022, Tây Ninh hu peih 19 nyaom biai taom gaok bangsa, agama tui njauk tukvak ba tabiak haong labaih 2.100 halau janeng, urang pan bruk agama, urang tui agama, taha palei, urang hu angan je dalam bhap bini bangsa.

Hadei di labaih 10 thun peih ngak Hukum HTX thun 2012, mbiah tal ini tỉnh Ninh Thuận hu  86 HTX ngak nong. Dom HTX dak harei dak pabak sumu haong darak pasar, sami samar dalam bruk ngak, peih bruk ngak tabiak pandap tui harak pambuak bruk  saong dom gah. Abih di nyu, hu 10 HTX hu pandar cong nghe dalam bruk ngak mbang saong pablei salih pandap tui chuỗi giá trị. Dom HTX jeng kham merat hu mbaok tame dom danak dak di bhum palei yau: ngak ribong kraong, jalan mbak dalam hamu, ramik hacih alam moi truong, salih bruk ngak mbang, salih janih phun pala, athur raong…

 Huyện Châu Phú, tỉnh An Giang biak caik hatai sangka buh jien tame ngak pasiam dom jalan nao mai, dom baoh tatua, ba mbuan lagaih ka bruk nao mai haong dom bhum jaik taphia. Châu Phú urak ini hu labaih 222 jalan atah abih tih labaih 1.000km saong jaik 200 mbaik tatua dom janih, dalam nan hu rilo tatua hu ngak pasiam veik atau ngak bahrau, salih ka dom baoh tatua sit, klak, mbaih mbaoh. Dalam nan, huyện jak ba bhap bini kham merat ngak jalan, ngak tatua, rilo danak dak hu ngak salah tui jalan karja haong bhap bini pambuak gauk ngak. Kuhria ta-eng thun 2022, jien ngak dom tatua saong jalan di dalam huyện lac jaik 63 tỷ đồng, dalam nan bhap bini rik daong jaik 24 tỷ đồng.

Urak ini lac bilan tabung glong pandiak tua riya, nyom ia mbak, dom  po bein di tỉnh Tiền Giang brei buh jien pagam dom mac jamraih njuk pruh ia ka bein phun kayau salih ka urang ngak meng tangin takai. Jaik ini, rilo urang ngak nong biak haduh hatai tuk dom urang co klaik mek drap ar nan.  Hu thau, yaok bein phun durien  di urang ngak nong tỉnh Tiền Giang hu brei pagam meng 1-2 mo -tơ điện di kreh  bein gam haong cambuac pruh ia, pruh ia tự động salih ka pruh ia meng tangin. Biak rilo po bein duah mboh  dom baoh mo-tơ nan lahik yoam lac hu kak pagam xích khóa kajap ala pasar pacang meng bê-tông. Kol co klaik nyu pandar dom pandap ngak brei tayak be-tong, cakak talei xích blaoh klaik mô -tơ di dom bein  oh hu urang khik iek, daok atah labik bhap bini.

Dom pasak y tế bhap bini di Thái Lan hu kakei brei tui iek catang bruk njaom mbak di virus Marburg, sa janih virus but pajaih haong Ebola. Thái Lan urak ini oh ka hu urang halei njaom virus Marburg min tuai ravang me-in tal Thái Lan dak harei dak rilo nan ye njauk tui iek catang huac nyu njaom mbak. Virus Marburg daok njaom mbak di bhum Trung Phi ngak brei 9 urang metai saong 16 urang mboh yau njaom ruak. Dom menuac njaom ruak bhian mboh pandik akaok biak khang, pandiak glaong saong aih craoh tabiak darah, haong tỷ lệ metai lahik tagok tal 88% tui janih virus saong tui bruk taong ruak. Urak ini oh ka hu vaccine, oh ka hu jru  brei ka janih virus ini.

Tui Gah Thú y Dunya, meng akaok bilan 10 thun 2022 mbiah tal akok bilan 2 thun 2023, labaih 100 trieu manuk ada metai atau njauk am cuh klaak. Ruak kum manuk ada hu mboh di dom taneh ia yau  Ecuador, Colombia, Bolivia, Argentina…saong dak harei dak pambak praong. Manuk mebaoh lac sa dalam dom nyaom njauk gaok kan kandah trak abih, ngak tagok yaom dom janih pandap oh kurang hu yaok harei saong trun jien car pandar di urang blei. Di Mỹ, baoh manuk  tagok 70% dut saong tukvak ini thun dahlau. Jit ruak daok meda mai jaik  Brazil, lac taneh ia pablei  manuk tabiak negar langiu rilo abih di dunya, ba tal bruk papak rilo manuk di dunya gaok kan kandah.

Piah jhul patagok gah ngak ô tô điện, Malayisa oh kak je jalan radaih tal 100%, saong brei trun meneing jien je thu nhập cá nhân ngan saong pok jien blei, pah, pah blei saong tut angan ka dom radaih sạc ô tô điện. Malaysia hu mbaoh tangin brei ngak 26 danak dak pambuak tal ô tô điện saong dom hệ sinh thái pambuak tal, dalam nan hu lắp ráp, ngak phụ tùng saong linh kiện, pandap sạc. Rajaei Malaysia jeng brei tagok bruk pato pakai ilamu saong pato bruk ngak ka gah ô tô điện./.