Daok dalam dom bruk pathau khan salam uan 100 thun, harei manek aruah Thủ tướng  Võ Văn Kiệt, gilang tapuk tỉnh Vĩnh Long daok peih bruk brei dom sruh radaih nao mai, ba dom tapuk siphau vak ka radiuk haong bruk ngak di aruah Thủ tướng Võ Văn Kiệt tal bhap bini. Bruk pathau khan ini piah daong brei mboh dom bruk ngak praong glaong di ong saong pok mayaom urang naih joi di puk palei Vĩnh Long – brei ka cách mạng Việt Nam; tapa nan daok hu daong ka dom dam dara, anek saih pabak ilamo ka bruk bac da-a, roh duah.

Dalam thun bac bahrau ini, kadung jien bac Vừ A Dính bahrau brei 51 pok jien bac ka dom anek saih bahrau di kadung jien, brei jien bac ka 166 anek saih naih joi, yaok pok yaom 1 triệu đồng, piah pok meyaom bruk kham merat di dom adei. Abih di nyu nan lac, kadung jien bac Vừ A Dính jeng hu brei 130 pok jien bac (yaok pok yaom 6 triệu đồng sa thun bac), brei ka dom anek saih di 17 tỉnh ban gah Meraong gaok kan kandah kayua jit praong COVID-19.

UBND TPHCM bahrau payua tagok Thường trực HĐND TPHCM ka bruk likau padang ngak Sarak daong jien bac ka anek saih mầm non, anek saih phổ thông công lập, langiu công lập saong dom urang bac di pasak pato magru thường xuyên tukvak 2022-2023. Dalam nan, UBND ban hu likau daong jien bac ka anek saih meng pakat mầm non tal Trung học phổ thông, tui yaom daong meng 70.000 tal 240.000 đồng sa bilan. Abih tih kadung jien tui kuhria piah ngak sarak daong jien bac lac 1.541 tỷ đồng.

Gah chức năng tỉnh Cà Mau brei klaak angan 21 kapal ikan khut, tayah, kram bo po kapal oh sraong mek hu, njauk negar langiu cap, mek,… Langiu di nan, Chi cục Thuỷ sản jeng hu pasang iek mboh hu 33 kapal ikan oh ka thau cambaih po kapal, kapal oh daok dalam tỉnh, oh taom gaok hu saong oh thau labik daok piah taom gaok haog po kapal. Meyah dalam tukvak 1 thun bo dom po kapal ini oh mai gia hạn harak chứng nhận an toàn kỹ thuật, harak adat taong cap kaya ikan tui hukum ye Chi cục kaya ikan tỉnh Cà Mau brei klaak angan kapal tui njauk adat hukum.

Tui Jabat kuhria mboh dahlau bruk langik tasik bhum Nam bộ, mbang ia ndik glaong abih dalam thun meda rahtabiak di 2 harei lac 27 saong 28-9 di Cần Thơ di tanut 2 -2,05m, samu  atau glaong jang tanut báo động 3 lac 0,05m, njauk pacang caga bruk ia dauk dalam labik dhaong. Ini lac mbang ia tagok glaong abih dalam thun, nan ye bhap bini njauk pacang caga ia dauk dalam labik dhaong saong bhum tapen tasik.

Ribuk khang Noru nyu tuh tame dom labik di Philipines gam saong dom mbang hajan praong saong ngin khang abih di labik jaik pasak ribuk tagok tal 185 km sa tuk saong ngin handaoh khang tagok tal 255 km sa tuk. Dom kapal ngak bruk mangaok tasik brei padeih, dalam tuk 30 mbang par nao saong mai meng Manila brei klaak. Gah pasang iek bala praong meng langik tasik daok brei thau lac meda hu dom mbang jaleih taneh praong saong kayua hajan meda rah tabiak dalam tuk yau urak ini. Dahlau di nan, jaik 8.400 menuac hu ba tabiak truh jalan nao di ribuk Noru.

Mỹ kakei Nga lac meda taong gilac veik biak khang dom bruk taong meng vũ khí hạt nhân halei di Nga pak di Ukraine, gam tui di nan jeng brei thau bruk pandar vũ khí hạt nhân meda ba tal dom kanjha jhak praong ngan haong Nga. Mỹ jeng daok sanya lac daok daong ka Ukraine dalam nan hu paok jien daong quân sự tagok tal labaih 15 tỷ đô la.

Gah chức năng duah mboh abih tih 102 menuac metai hadei di mbang kram ghaiy pajeng urang di cư suan hukum di langiu tasik Syri harei 22/9 meng bloh. Urang jakar Syri brei thau, sruh gaiy pajeng jaik 150 urang di cư, tabiak meng Liban harei 20/9 saong gaok bala tuk daok mangaok jalan nao tal châu Âu. Rayo papar binguk karja Syri ba khau tin di Liban brei thau, 1 urang njauk cap mek kayua mboh lac gam tame bruk ba menuac tapa tasik suan hukum ba tal bala pandik harao ini./.

Urang lang: M.P & H. Pha -26/9/2022