Harei pataom bingu Xuân ban raya HCM mbang ka 43 Tết thun anek sak tapai hu peih tabiak di mblang bein Tao Đàn. Ngan saong kadha “Xuan bui sambai-Xuan ginup meda", tuai damuai mai tal labik ini, hu maong iek dom labik ngak ndung bak ilamu nghệ thuật, bak makna meng kan saong dom kadha biak gheih mekre, biak bahrau yau ye: phun mai kanyik taha praong, labik bingu ôn đới hu labaih 200 janih hu duah pataom yau ye trà my glai - trà my úc, mai kanyik Canada. Abih di nyu lac, daok hu parang tabiak bộ sưu tập 3 kadha  sarak “Cửu long tranh châu” hu ngak meng gha kayau thu tamo. Langiu di nan, tuai daok hu maong iek dom danak dak daoh tamia. Harei pataom bingu Xuân hu dui atah tal abih harei 6 bingun Tết.

Tỉnh ủy, UB bhap bini, UBMT negar Viet Nam tỉnh Bạc Liêu bahrau peih bruk taom mbaok 80 halau janeng, urang ngak bruk agama di dom agama di tuk uan thun sak tapai 2023. Tapa nan, lambaok dom halau janeng, urang ngak bruk agama di dom agama brei mboh hatai bui sambai hu mai pataom mbaok saong sanya patui ngak siam jalan hukum di agama, oh padeih patagok bruk jum pataom, nao gam haong karja, haong bhap bini dalam tỉnh peih ngak siam dom bruk jak ba, pakacah gauk anit ranam taneh ia, jhul khang patagok KTXH, brei mboh hatai anit ranam, takre ngak pahla, tuk halei jeng kak kajap agama haong dunya, padang ngak tỉnh Bạc Liêu dak harei dak cakrok.

 Tỉnh Sóc Trăng bahrau jao jaik 4.000 tấn brah meng kadung khik piah di tỉnh Sóc Trăng brei ka yaok piluh ribau baoh sang kan kathaot, sang jaik kathaot saong dom urang gaok kan kandah dalam tỉnh. Langiu di nan, urang par akaok tỉnh, dom kapul nyaom, puk palei dalam tỉnh daok jak ba, rik tame yaok rituh ribau paok pandap alin ka dom baoh sang sarak kanja, sang kan kandah  di tukvak Tết; abih tih yaom jien jak ba hu lac labaih 40 tỷ đồng.

Dom harei tapa, rilo bein kruac bhung mbeik thaik hồ lô hu sarak akhar haroh tài, lộc di tỉnh Hậu Giang daok jar var tame tuk paik baoh. Min tui panuac khan di dom po bein, yaom pablei janih ni daok laik trun duk haong Tết thun bloh. Urak ini, urang blei salih ba gauk mai blei kruac bhung mbeik thaik di bein haong yaom 500.000 đồng sa gu, trun 200.000 đồng sa gu duk haong thun bloh. Kayua yaom trun, nan ye jaik abih dom bein pilih ruah jalan pablei baoh kruac bhung tui baoh praong atau sit. Baoh trak meng 1,4-1,6kg sa baoh ye urang blei 600.000 đồng sa gu, daok baoh hanjul jang hu yaom meng 300.000-500.000 đồng sa gu (tui janih).

Urak ini baoh durain di tỉnh Tiền Giang yaom tagok glaong di abih. Durain pajaih Dona  janih 1, yaom meng 150.000 - 160.000 đồng/kg; durain Ri6, baoh paya hijao meng 90.000 - 120.000 đồng/kg; glaong jang dut saong bilan dahlau meng 30.000 - 40.000 đồng/kg. Tui yaom ini, mayah 1ha bein durain brei mbaoh ginup abih, sang bein meda hu jien mek tame jaik 2 tỷ đồng sa thun. Meng di tuk durain hu pablei tui jalan chính ngạch tapa Trung Quốc, yaom gam gam tagok nan ye po bein biak chreih chrai, kham merat sangka bein phun tal bilan 3 anak tal meda yam tame bilan paik baoh, caong lac baoh hu rilo, pablei hu yaom glaong.

Urang lambaok di Liên hợp quốc (LHQ) ka Yemen brei mboh hatai pok meyaom dom bruk ngoại giao khu vực saong dunya piah padeih abih bruk mesruh gauk dui atah 8 thun tapa di taneh ia dalam bán đảo Arab ini. Gam haong nan hu panuac ieu dom gah hu mbaok tame mesruh, njauk pamaong tal  “sa jalan maong yau gauk” haong dom jalan nao cambaih laih piah pasiam veik sron mbon di Yemen. Urang lambaok di Liên hợp quốc jeng ndom tal bruk jhui palai pajoa dom kham merat daok hu ba tabiak ngak ini, saong kadha nan brei hu “dom bruk ngak hu trách nhiệm” di rajaei Yemen hu dunya công nhận jeng yau gah Houthi.

 Sa bruk pamatai manuac biak jhak rahtabiak harei 16/1 di mbuan ceik ngak nong di bang California, ngak ka 6 urang di sa trang trại k metai. Tui cảnh sát di pak ini, bruk pametai manuac biak jhak nan pambuak tal dom kol băng đảng pablei salih ma túy suan hukum, bo adit dahlau gah chức năng bahrau pasang iek baoh sang ini kayua pambuak tal ma túy. Bruk pametai manuac ini mboh lac hu kuhria caga dahlau tuk abih dom urang metai nan, jeng njauk cuh tame akaok.

 75 rabau sang di Prang laik tame bruk oh hu điện pandar hadei di tuk rabuk praong nao tapa rilo labik di taneh ia ini di harei 16/1 meng bloh. Rabuk Gérard tuh tapa bhum gah pai saong gah brak di taneh ia Prang ngak brei hajan praong saong hangin handoh khang, rabuk jeng ngak ka rilo phun kayau tabuac gha, jalan mbak klaih klaoh khang di rilo labik. Rabuk ini, ngak brei Prang dahlau di nan njauk tabiak bruk “cảnh báo cam” di 20 labik. Ini lac tanut cảnh báo glaong ka 2 dalam dom tanut cảnh báo rabuk di Prang./.