Karja song gah pato megru dom puk palei hu ramik pasiam yaok rituh balik bac

Ban Cao Lãnh, tỉnh Đồng Tháp gam haong 77 ban di 44 taneh ia karei birau hu Gah Giáo dục, Khoa học saong Ilamu di Liên hợp quốc vak angan tame Mạng lưới dom ban bac megru dunya. Piah pabak sumu dom bruk kan kandah birau saong khik ilamu bac da-a tapuk siam gheih, ban Cao Lãnh yaih khan rilo phần mềm hadah krah saong peih dom mbang ginum biai, nyaom biai, bruk ginum biai pambuak tal pato megru saong bac tapuk. Ban Cao Lãnh daok kham merat patagok bruk ngak di kapol sinh viên, dam dara dom pakat piah pataom veik, jum pataom, padang ngak dom rai rah Viet Nam takre ba da-a, pabei salih, KHCN, takre salih birau, rik tame bruk cak rok patagok di gah pato megru.

Yam tame thun bac bahrau ni, tỉnh Bạc Liêu samar ba tame pandar jiak 500 balik bac bahrau, dalam nan hu rilo balik bac di dom xã bhum atah bayah, bhum urang Khmer. Langiu di nan, karja song gah pato megru dom puk palei hu ramik pasiam yaok rituh balik bac, balik chức năng abih yaok rituh tỷ đồng, patagok dom balik bac dalam tỉnh urak ni hu jiak 5.300 balik; dalam nan, 3.485 balik bac khang kajap, lac hu jiak 80%.

Xã Hiếu Liêm saong xã Tân Định di huyện Bắc Tân Uyên, tỉnh Bình Dương birau taduan mek hu angan palei pala birau paglong thun 2021. Hadei tuk mek hu ngan palei pala birau paglong, dua xã nan pataom tame peih ngak brei pagong dom tanut padang ngak palei pala birau paglong. Tukvak tapa, rilo bruk cak rok patagok gah ngak nong hu kein lagaih brei peih praong, ba jien mek tame glong ka bhap bini. Puac thun 2021 jien mek tame kuhria tui kaok manuac di Tân Định sumu 65,3 trieu dong sa urang sa thun; xã Hiếu Liêm jien mek tame kuhria tui kaok manuac 69 trieu sa urang sa thun…

Mban bangsa tỉnh Bình Phước bahrau pambuak bruk song dom kapul ngak pahla brei pandap ka dom boh sang kan kandah song uranaih di tuk uan Tết Trung Thu 2022 di xã Đắk Ơ, huyện tapen negar Bù Gia Mập. Dom kapul hu brei 500 pok pandap dalam nan hu pandap pandar yaok harei ka dom boh sang kan kandah; alin brei 800 pok pandap, hu har Trung Thu, pandap bac da-a, kuhria tabiak yaom jien lac labaih 240 triệu đồng. Dom pok pandap hu rik dong ka dom boh sang kan kandah di tapen negar hu pren yam tagok dalam rai duik; pachreih ba uranaih sahanag hatai tal sang bac song uan raok Tết Trung Thu bui sambai.

Meng akaok thun tal ini, dalam negar hu jaik 165.900 mbang urang ruak pandiak tabiak darah, dalam nan, hu 62 urang metai. Anak rilo bruk urang eng drei iek ruak SXH di sang, Mentri Y tế tacei tabiak cambaih laih lac bruk ngak biak mbuan gaok bala meda ba tal dom ruak trak karei yau kurang darah, pandiak phổi, trun tiểu cầu, srau kadau darah trak, suy thận. Tuk truyền dịch di sang, urang ruak SXH meda njauk sốc phản vệ haong bruk dịch truyền, ngak ruak trak ka baoh hatai, ba tal ruak trak di kapol nyaom urang ruak tim mạch atau jalan suan yawa. Yau nan ye, tuk tuak SXH brei ba urang ruak tame dom labik y tế piah taong ruak.

Rajaei Trung Quốc hu buh tabiak 50 triệu NDT (7,25 triệu USD) piah dong bruk duah menuac urang hadei di mbang megei boh taneh khang 6,8 độ rah tabiak di tỉnh Tứ Xuyên di kreh pandiak harei 5/9. Labaih 1.100 urang dong duah song kapan haoh trực thăng gam hong 3.000 lều, 10.000 “giường gấp” hu ba tal huyện Lô Định, labik hu mong lac pasak di mbang megei boh taneh. Kuhria tal melam 5/9, hu 46 urang metai song 16 urang lahik hadei di mbang megei boh taneh ni.

Urang brei panuac di Điện Kremlin birau hu panuac lac kayua dom bruk ba tabiak di dom urang ngak praong di châu Âu lac bruk ba tal jalan ba khí đốt Dòng chảy phương Bắc 1 brei padeih ngak bruk, gam haong nan atah klak dom bruk ndem puac lac, Nga cakak bruk pabak khí đốt ka châu Âu lac bruk ndung bak chính trị. Urang jakar Điện Kremlin jeng hu panuac brei thau dahlau, Nga meda cagar veik bruk ba tabiak di Nyaom dom taneh ia công nghiệp patagok dang akaok di dunya ( iew lac G7) ka bruk kateik greik yaom menyek tamo saong dom pandap menyek blei meng Nga.

Lạm phát yaok thun di Thổ Nhĩ Kỳ dalam bilan 8 meng bloh tagok tal 80,21%, tanut glong di abih dalam 24 thun. Dalam nan, 3 nyaom gah pandap hu tanut tagok glong di abih lac pajeng ba tagok 116,87%, pandap pandar, pandap nội thất tagok 92,02%, pandap mbang song pandap menyum oh hu cồn tagok 90,25%. Urak ni, Thổ Nhĩ Kỳ dang anak dom srau kadau jien padai oh ka mboh dalam rilo abhap, ngan song pok jien lira gam gam trun meng di tuk jit prong COVID-19 rah tabiak di thun 2020./.

Urang lang: Hani Pha & Bhumi – 06/09