Bruk peih ngak danak dak brei oh daok sang taik tahak, Mentri Padang ngak hu pandar UB Bhap bini dom tinh pato tacei dom jabat roh duah, ngak takik abih 3 thaik thaot sang njauk haong adat cambat di yaok bhum palei. Baoh sang ngak blaoh khang kajap meng 20 thun tagok saong praong takik di nyu lac 30m². Dom thaik thaot sang brei khik kajap 3 khang: takai sang khang, daneing haluk khang, pabung sang khang saong hu ginup bruk piah pandar. Gam haong nan tahik thaot sang daok jeng ka njauk, brei mboh hu bruk gheih ilamo, adat cambat saong bruk karei di bhum palei (meyah hu), daong ngak gheih mbaok meta labik palei pala bahrau.

Sang bac Tiểu học saong Trung học cơ sở Đông Giang, huyện Hàm Thuận Bắc, tỉnh Bình Thuận hu 95% anek saih lac urang bangsa K’ho, Raglai, Cam daok rilo kan kandah. Dom thun tapa, sang bac kham merat peih ngak siam dom jalan ngak brei patagok bruk ngak di dom gilang tapuk. Piah pambak ilamo tabiak, sang bac bhian peih dom bruk yaih khan tapuk  di tal bac, bac tapuk harei akaok adit dahlau tuk chao co, jak ba dom adei  anek saih bac tapuk di tal bac, bac tapuk tuk tabiak me-in, bac tapuk di gilang tapuk. Gam haong nan, yaok thun sang bac  peih ngak Harei nyaom bac tapuk  pachreih hu rilo anek saih tame.

Meng akaok thun tal ini langik hangin hajan lagaih, menaih brei rilo baoh saong yaom glong tani tanat ba bui sambai “brei ralo baoh, hu yaom blei glong” duah jien laba labaih 120 triệu đồng  sa hecta. Dalam tinh Kien Giang urak ini hu labaih 7.200ha pala menaih. Dom thun jaik ini,  dom bhum palei ini jeng padang hu dom labik ngak pandap meng baoh menaih, tapa nan peih praong darak pasar pablei tani tanat, daong paglaong yaom kaom pandap kaya nong saong jien mek tame di urang ngak nong hu tagok.

Tapa 6 thun raong hadang tui ilamo kong nghe glong  mbiah tal ini, urang raong daok di 3 huyen tapen tasik lac Bình Đại, Ba Tri, Thạnh Phú, tỉnh Bến Tre hu raong labaih 3.600ha, kuhria rah tapa meng 60 tal 70 tấn sa hecta danao ia. Tukvak tapa, tỉnh Bến Tre hu ba mbuan lagaih ka mikva urang raong, doanh nghiep  cakrok patagok bruk raong kaya ia nan, kham merat tal thun 2025 raong hu 4.000 ha hadang raong tui kong nghe glong. So Ngak nong saong Patagok palei pala jeng hu pambuak haong Gilang pasiak sarak karja di Bến Tre caong khin karja palei brei ka dom HTX, kapol nyaom, urang hu mesre  phun jien ngak mbang.

Tui Viện Quy hoạch kraong ribaong gah meraong, bilan pandiak thun ini meda mbuan hu hajan karei bilan rah tabiak rilo jang dut saong kuhria rah tapa di rilo thun dahlau, saong takik rah tabiak pandiak bhang. Kuhria mboh dahlau dom bilan thu thun 2024 – 2025 hu rah tabiak jaik saong glaong jang dut saong kuhria rah tapa di dom thun dahlau. Mbuan rah tabiak taneh njom ia mbak dalam bilan thu thun 2024 - 2025 dalam ĐBSCL di tanut glaong jang dut saong kuhria rah tapa di dom thun dahlau min oh khang catang yau bilan thu dom thun dahlau. Dom bhum tapen tasik brei duah hu ia pandar saong ia piah ngak mbang dalam dom bilan thu, abih di nyu nan lac tuk langik biak kan kandah.

Trung Quoc hu pasiam veik sarak mien thi thuc ka bhap bini Nhat Ban mai jarah rivang ma-in katut harei, brei daok veik ralo abih lac dalam 30 harei. Danak dak ini hu peih ngak tal abih thun 2025. Bruk ramik pasiam veik danak dak ini lac bruk caong khin  brei jhul pakhang bruk pambuak talei rohim bhap bini jeng yau  piah pambuak bruk ngak mbang di dua negar. Urak ini, Nhat Ban caong khin taong abih tuai damuai Trung Quoc brei likau thi thuc dahlau tuk tame negar ini. Mbiah tal ini, Trung Quoc  oh mek ngak sarak ngan haong tuai mai rivang ma-in katut panak harei ka 40 taneh ia di dunya.

Singapore brei pabak pandap pasang iek HIV ta-eng di dom kuan pablei jru dalam puac bilan 1/2025. Ini lac bruk kham merat di Mentri Y te negar ini piah patagok bruk pasang iek HIV dalam bol bhap saong pachreih bruk pasang iek tui yaok mbang. Mentri Y te Singapore pachreih dom urang praong thun umo nao pasang iek takik abih hu sa mbang dalam raidiuk, yaom lac hu atau hu oh dom bruk mboh ruak. Dom urang hu ngak bruk likei kamei meda mbuan gaok nan brei nao pasang iek tui mbang yaok 3 tal 6 bilan, dalam tuk dom urang meda mbuan gaok ruak brei nao pasang iek rilo jang saong pang panuac kakei di dom urang pabak jitvu y te ka dom bruk caga.

Karja dom bhum palei di gah Barak mbang New York, Mỹ hu khan brei thau samar tuk kuhria caga ka sa ribuk tuyet khang, meda hu laik kapan blaoh tal 60 cm di bhum Trung Tây saong tui kuhria daok pataom kapan veik di puac adit ini. Ralo  labik tuyet laik  kapan meng 120 tal 180 cm ba tal karja brei khan samar drah saong brei bol lin Ve binh taneh ia mai labik ini piah daong dom urang peih radaih daok gar tavak saong urang mai daong hu taom urang daok khin daong.  Urang ngak praong pak ini brei pacang dom jalan roya saong kakei rahra caik hatai tuk nao mai angaok jalan ini./.