Dah page harei ini (8/2), yaok rabau lin barau di dom tinh, ban yau ye: TP.HCM, Bình Dương, Bình Phước, Bà Rịa - Vũng Tàu, Bình Thuận, Ninh Thuận hu mbaok tame Harei tòng quân di dom labik jao, taduan lin, chreih chrai tagok jalan nao ngak lin. Di TP.HCM thun ini hu 3.803 dam dara tagok jalan ngak nghĩa vụ quân sự. Bruk jao, taduan lin dah page ini di dom quận, huyện dalam ban jeng hu peih tabiak dalam praong prang, samar drah, tani tanat dom bruk pacang caga jit ruak Covid-19. 

Urak ini, dom tinh, ban dalam bhum Taneran kraong Cuu Long daok caga blaoh blai ka bruk jao - taduan lin birau di paguh harei 9/2. Thun ini, tỉnh Hậu Giang hu jao 1.252 urang ka Mentri Quoc phong saong Mentri Công an, dalam nan hu 2 urang kumei. Piah ka urang hu palih ruah tame bol lin sahanang hatai tuk tagok jalan ngak lin, tukvak tapa dom xã , phường hu jhul khang bruk pathau khan Hukum Nghĩa vụ quân sự; dom xã, phường daok padang kapol nao rivang, alin pandap ka dam dara…tapa nan hu thau hatai caong khin di dam dara saong samar langyah hu siam dom bruk daok tavak tavaiy. Nan ye, taong abih dom urang tame ngak lin jeng sambai hatai, thau ka bruk di drei, ngak njauk tui bruk ba tabiak, tuk halei jeng abih hatai cang tal harei tagok jalan ngak bruk khik caga Taneh ia.

Danak dak thành phần labik Cần Thơ - Hậu Giang saong labik Hậu Giang - Cà Mau di danak dak jalan cao tốc Bắc - Nam gah Timun tukvak 2021-2025 hu Mintri Jalan mbak pajeng ba peih ngak meng harei 1-1-2023. Piah tani tanat bruk ngak salah danak dak di puac thun 2025, caong pandar cuah tuh tagok jalan ka danak dak labaih 18,5 triệu m3 saong njauk pataom prein tame padang ngak dalam thun 2023 saong 6 bilan akaok thun 2024. Min, gah pabak cuah tuh tagok ka danak dak jalan Bắc - Nam tapa gah Tây urak ini biak kan kandah. Kayua yau nan ye Mintri Jalan mbak pajeng ba hu ieu kakei UBND dom tỉnh Vĩnh Long, Đồng Tháp, An Giang brei rami ramik dahlau di abih brei 19 triệu m3 cuah piah padang ngak danak dak Cần Thơ - Hậu Giang, Hậu Giang - Cà Mau di danak dak jalan cao tốc Bắc - Nam gah Timun.

Tui rilo urang pala thanh long di tỉnh Bà Rịa -Vũng Tàu, urak ini yaom thanh long daok tagok khang veik. Thanh long hatai bhong meriak yaom pablei di bein meng 30.000 – 33.000 đồng sa kilo, hatai patih 25.000 đồng sa kilo, glong 3 tal 4 mbang dut saong tukvak ini thun dahlau. Meng yaom yau nan, urang nong biak chreih chrai, hu pabak prein piah buh jien tame pala gilac phun thanh long. Thanh long hu pablei rilo tapa negar Trung Quốc, nan ye, tuk Trung Quốc peih pabah mbang, bruk blei salih di dua negar hu mbuan sanang jang ngak brei yaom thanh long tagok glong.

Bier harei 8/2, khau tin meng Sở Y tế An Giang brei thau, pambuak tal bruk 84 urang njauk jru mek hadei di tuk mbang bu ratak bhong alin oh mek jien, kreih pandiak harei 7/2 bahrau blaoh, amuk Nguyễn Thị H, umo 63 thun, daok xã Long Điền A, huyện Chợ Mới, tỉnh An Giang metai di Sang iek ruak Đa khoa Pasak An Giang kayua suy đa cơ quan hadei di 3 harei taong ruak njauk ruak jru mek bu ratak bhong. Ini lac sa dalam 4 urang njauk jru mek trak, njauk ba tame Sang iek ruak Đa khoa Pasak An Giang piah taong ruak. Dahlau di nan, di harei 4/1, di xã Long Điền, huyện Chợ Mới, tỉnh An Giang, hadei di tuk mbang bu ratak bhong alin oh mek jien, 84 urang hu mboh pandik tung, taglaoh ta-aok, pandiak… hu 53 ureng eng drei blei jru manyum, prein yava hu tani tanat,; 31 urang njauk ba tame labik y tế piah taong ruak, dom urang ruak ini hu tapa kan kandah, oh daok pandik tung, aih traoh atau taglaoh ta-aok. Daok 4 urang njauk trak njauk payua tagok Sang iek ruak Đa khoa Pasak An Giang.  

Dalam harak ndom puac liên bang mbang ka 2 bac di page harei 8/2, tui mon Viet Nam, Tổng thống Mỹ Joe Biden ndom lac “ sanya pambuak bruk haong Trung Quốc piah jhul tagok dom kein laba di Mỹ saong ba mai kein laba ka dunya”. Gam hong nan, hu ndom brei thau veik jalan ngak di Mỹ lac “ duah bruk meriak gauk, oh lac mesruh gauk” dalam talei rohim pambuak bruk haong Trung Quoc, yau ong hu ndem dalam mbang taom gaok Chủ tịch Trung Quốc Tập Cận Bình gah langiu Nyaom biak pakat glong kapul dom taneh ia patagok saong birau patagok dang akok di dunya ( G20) di Indonesia bilan 11 /2022. Yau nan min, Washington meda ba tangin tame ngak piah khik caga taneh ia meyah an ninh taneh ia njauk urang lih tame.

Dalam mbang nao rivang sa doanh trai bol lin dalam harei 7/2 Akaok negar Triều Tiên Kim Jong Un hu pok mayaom prein khang di bol lin hu caga vũ khí hạt nhân tuk ong nao rivang dom bol lin pahadar 75 thun harei padang Quân đội Bhap bini Triều Tiên. Akaok negar Kim Jong Un jeng brei thau lac, piah pabak saong cak rok patagok kapul bol par phao kraong, Triều Tiên njauk kham marat jang dua mbang saong ngak rilo jang kayua bruk cak rok patagok khang kadang, ginup meda di taneh ia. 

Mbang megei baoh taneh rah tabiak di Thổ Nhĩ Kỳ saong Syria harei 6/2 ngak khut trak lâu đài Gaziantep, nan lac sa inem krung sajarah dakrai saong labik pachreih tuai mai rivang di bhum Đông Nam taneh ia. Tui kuhria mboh tapa dom mbang kuac roh khảo cổ, lâu đài nan mbang kaok meti hu padang ngak yau sa bimon piah khik iek di samar La Mã dalam abap ka 2 saong ka 3 Công nguyên saong hu peih praong tui tukvak. Birau ini, nyu hu ngak Muyim abih thaot binguk Chủ nghĩa Anh hùng saong Phòng thủ Gaziantep./.