# Anak bruk kurang tapuk giáo khoa (SGK), ralo panuac hu ba tabiak ka bruk palai pajua jien padai tuk ralo baoh tapuk tok pandar sa mbang kayua anek saih njauk ngak bài tập angaok nan, Thứ trưởng mentri pato megru Nguyễn Hữu Độ brei thau, tapuk pandar sa mbang lac tapuk bài tập, tapuk tham khảo, Mentri oh pachreih dom janih tapuk ini.Tui danak dak urak ini, tapuk giáo khoa klak daok brei pandar dahlau di tuk peih ngak danak dak bahrau tui Nghị quyết 88 (tui kuhria meda peih ngak di thun 2019 atau 2020, peih ngak meng tal 1). Tuk hu danak dak bahrau, tapuk SGK klak oh daok brei pandar.

# Akaok mintri pato megru Phùng Xuân Nhạ bahrau nao rivang song pachreih ba sang bac bangsa gam bac gam dok THCS Nà Ớt, huyện Mai Sơn, tỉnh Sơn La, labik gaok bala trak di 2 mbang ia sua gam gam harei  28/8 song 30/8. Dalam thun bac bahrau ni sang bac hu   347 anek saih song 273 adei gam bac gam dok di sang bac , bac  8 var sa adti . Sang bac hu pambuak haong bhap bini, labaih 100 urang karja, urang lin Ban chỉ huy quân sự huyện Mai Sơn harei melam puh ramik sang bac piah ka dom anek saih tame thun bac bahrau njauk harei ni.

# Kapul Việt Nam khik hu labik dang ka klau di mbang pakacah tangin ngak ASEAN 12, ngan haong 7 urang mek hu huy chương ameh, 7 urang mek hu huy chương pariak, 6 urang mek hu huy chương bar saong 16 chứng chỉ kỹ năng nghề xuất sắc. Ini hu mong lac sa jak jeng siam mekre di kapul Việt Nam dalam mbang Pakacah tangin ngak ASEAN 12 kayua lac dalam dom thun jaik di ini dom negar ASEAN hu buh jien tame ka bruk pakacah tangin ngak biak ralo. Mbang pakacah tangin ngak ASEAN mbang ka 12 hu peih ngak di Thái Lan meng harei 26/8 tal harei 5/9/2018, hu mbaok 331 urang pakacah mai meng 10 negar dalam ASEAN pakacah 26 bruk ngak (dalam nan 24 bruk ngak chính thức saong 2 bruk ngak iek). Hu mbaok dalam mbang pakacah tangin ngak mbang ini, kapul Việt Nam hu 52 urang pakacah di taong abih 26 bruk ngak.

  # Beir harei 4/9, ong Võ Văn Thưởng - UV mintri Chính trị - Trưởng Ban Tuyên giáo Trung ương song kapul ngak bruk hu nao ngak bruk song Tỉnh ủy Bình Thuận ka bruk Tuyên giáo song bruk peih ngak dom sarak di Trung ương. Pathau khan song kapul ngak bruk, Bí thư Tỉnh ủy Bình Thuận Nguyễn Mạnh Hùng brei thau, tuk vak tapa, bruk bac megru, brei thau sarak Trung ương 4 ka tong abih Đảng bộ hu  Ban Thường vụ Tỉnh ủy peih ngak siam, dong pacang cakak bruk suy thoái gah jalan sahneng, jalan diukrai dalam urang jakar, urang đảng. Dalam nan, Ban Thường vụ Tỉnh ủy Bình Thuận hu pataom tame langyah 3 kadha praong dok hu menuac urang caik hatai sangka nan lac, khik caga môi trường, khik ramik hacih saat pandap mbang menyum song dom tệ nạn xã hội, abih di nyu nan lac  ma túy.  

# Dalam mbang nyaom ka 11 di Ủy ban Tư pháp page harei 4-9, Thượng tướng, Thứ trưởng Bộ Công an Lê Quý Vương brei thau, bruk ngak di dom kapul nyaom tội phạm hình sự daok srau dhau gilac veik; hu bruk pambuak gauk khang kajap di dom gah hình sự, kinh tế, ma túy, môi trường... Dom kapul nyaom tội phạm mek angan dom doanh nghiệp piah ngak suan adat hukum, abih di nyu lac pambuak pagam tak gah brei mesre, bruk “tín dụng đen”, katung ba tui bruk nao ndok sre, meblah mek drap ar, cap khik manuac urang suan adat hukum… bruk ini hu mboh dak harei dak ralo di dom tỉnh, bal.

Khaw tin dunya

  # Kuhria tal sa tuk mesup  harei 5/9, hu takik di abih 7 urang metai song labaih 200 urang njauk rambuac hadei di tuk ribuk Jebi tuh tame gah pai negar Nhật Bản.Ribuk Jebi hu mong lac sa ribuk prong di abih tuh tame Nhật Bản dalam luac 25 thun tapa.Dom hãng kapan haoh dalam negar klaak labaih 700 mbang par dalam negar song dunya, rilo meng lac dom mbang par nao mai di dom mblang kapan haoh gah pai song gah kreih negar Nhật Bản. Dom công ty  jalan pasei jeng brei padeih peih, dalam nan hu jalan nao Sin-kan-sen Tô-cai-đô (Shinkansen Tokaido) song jalan nao San-ny-ô Sin-kan-sen (Sanyo Shinkansen), dalam tuk nan dom jalan cao tốc njauk kreik pambah mbang.

        # Harei kabroi, takik abih 17 urang metai saong 12 urang karei njauk rambuis dalam sa mbang bala angaok jalan pasei di gah Meraong Ăng-gô-la (Angola). Bruk paoh gauk rah tabiak di sa sruh radiah pasiam veik jalan pasei saong sa sruh radaih pui pajeng pandap di Bi-ba-la (Bibala), dalam tỉnh Na-mi-bê (Namibe). Hadei di tuk bala rah tabiak, ralo urang jakar gah daong duah urang njauk bala hu mbaok chip piah daong urang njauk bala. Tui kuhria manuac urang metai lahik daok hu ralo, tuk daok hu mboh ralo urang daok gar angaok radaih pui. Makna di bruk ini daok hu pasang iek duah thau.

# Hội đồng bảo an Liên hợp quốc meda peih sa nyaom biai ka bruk di tỉnh I-đlip ( Idlib) di  Xyri harei 7 bilan 9 anak tal. Đại sứ Mỹ jeng hu panuac kakei lac  rajaei Xyri oh pandar vũ khí hóa học dalam  chiến dịch quân sự di labik ni. Nyaom biai hu menuac sia cong khin duah tabiak sa jalan ngak siam, piah nyaih sa bruk quân sự prong dok pamong tame I-đlip./.