# Patui danak dak ngak bruk, mesup harei 15/11, Quốc hội ginum biai di hội trường ka dự án Hukum pato megru (ramik veik). Tapa ginum biai di tổ biar harei 8/11, ralo urang Quốc hội njauk hatai ka bruk lac njauk ramik veik taong abih Hukum pato megru saong taong yaom dự thảo Hukum pok tagok Quốc hội mbang ini hu kuhria caga siam, tani tanat. Lingiu di nan, dom urang Quốc hội hu brei rilo panuac cambaih laih, pataom tame dom asal kadha lac: danak dak, tapuk bac da-a phổ thông; sarak ka gru pato, jalan pato pakai phổ thông; pato pakai mầm non; pato pakai dalam sang, dom bruk oh brei ngak dalam pato pakai, umo thun pato pakai phổ thông; talei pambuak bruk di amaik ame saong sang bac dalam bruk padang jalan nhân cách ka anek saih, bruk pambuak gauk pakat dunya dalam pato megru…

 # Gah Cảnh sát điều tra mintri Công an barau tabiak quyết định khởi tố bị can, peih bruk khám xét, mek kareik ông Cao Duy Hải, dahlau diah ngak Tổng giám đốc Tổng công ty viễn thông MobiFone, urak ini lac urang jakar văn phòng di MobiFone saong amuk Phạm Thị Phương Anh, Phó tổng giám đốc MobiFone, piah điều tra tội ngak suan quy định ka khik ramik saong pandar jien đầu tư công ba tal khat lihik trak, quy định di khoản 3, paka 220 bộ luật Hình sự thun 2015. Ini lac bruk barau abih dalam tuk điều tra peih praong vụ án MobiFone blei  95% cổ phần AVG ngak khat lihik praong ka karja barau hu mban tacei pato T.Ư ka pacang, caga tham nhũng ba tame bruk njauk pasang iek, tacei pato.     

#Thứ trưởng Bộ Y tế Nguyễn Viết Tiến brei thau: urak ini kháng kháng sinh daok jeng 1 dalam dom bruk kan kandah praong dang akaok  ka pren yava saong bruk cakrok patagok. Bruk kan kandah ini ngak ka anek menuac mbuan mai veik haong saman oh ka hu kháng sinh. Gah Y tế Dunya (WHO) ba Việt Nam tame kapul dom taneh ia hu bruk kháng kháng sinh glaong abih dunya. Meng thun 2009 tal urak ini, dom jru kháng sinh di Việt Nam pablei tabiak ka bhap bini tagok rilo jang 2 mbang. Hu tal 88% kháng sinh di ban sit ban praong hu pablei bo oh cang hu toa jru di bác sĩ, bruk ini di bhum plei pala jeng tagok tal 91%. 

   # Pahadar 36 thun harei gru pato Việt Nam 20/11, Tập đoàn Bảo Việt alin brei 300 paok jien bac ka anek saih kathaot kham merat bac da-a naih joi dalam học kỳ I, thun bac 2018-2019. Lingiu jien daong di Tập đoàn Bảo Việt, Công ty Bảo Việt Bình Thuận hu daong jaik 2,5 tỷ đồng piah đầu tư, daong ka sang bac dalam bruk pato pakai. Cambaih laih: Daong brei komputer, bình ia pandiak laar, tivi ka sang bac mẫu giáo, bộ âm thanh, katap ka anek saih; daong dom danakdak “ ba jalan ka adei nao bac”, giải thưởng Lê Quý Đôn di huyện Hàm Thuận Bắc.

 # Meng harei ini 15-11, dom mbang ieu phone, nhắn tin tal dom laik phone pan tangin 11 số meda oh ngak hu. Urang ieu phone, nhắn tin brei ieu tui đầu 10 số bahrau salih meng hu. Piah khik kajap bruk thông tin liên lạc oh njauk klaih klaoh, dom nhà mạng jeng hu panuac kakei urang đồng bộ danh bạ dalam điện thoại piah salih taong abih thuê bao 11 số mai 10 số. Hadei di tuk padeih bruk daong quay số song song, dom nhà mạng jeng daok khik phát âm báo (meng sap Anh saong sap Việt) mbiah tal harei 30-6-2019 meyah urang pandar jeng daok ieu atau nhắn tin tal đầu số klak.

Khaw tin dunya

# Kuhria tal harei 1-11, dunya hu 7,1 tỷ menuac saong tui kuhria mboh dahlau, tal kreih abap meda hu tal 10 tỷ saong tal thun 2100 hu jaik 12 tỷ menuac. Meng thun 1679, urang roh duah ba akok nao dahlau di taneh ia Hà Lan ka sinh học tế bào Antoni van Leeuwenhoek ndom lac, baoh taneh tok taduan mek oh tapa 13,4 tỷ menuac. Thun 2017, dalam sa diễn đàn angaok tạp chí BioScience, 15.000 urang alamu meng 184 taneh ia brei thau bruk taduan mek di baoh taneh tal tanut giới hạn, min oh ba tabiak con số cambaih.

 # Rajaei Pháp saong Đức hu panuac pok meyaom dom bruk ngak hu dalam ginum biai Brexit, min jeng daok hu panuac lac sa jalan atah jeng daok cang Anh saong Liên minh châu Âu ơdi gah anak. Akaok Mintri iek gah dom bruk châu Âu di Pháp, Na-tha-li Lu-a-dơ (Nathalie Loiseau) brei thau, bruk ngak hu dự thảo thỏa thuận Brexit lac sa siam mekre praong meng hu bruk kham merat di dom gah. Min Pháp meda pasang iek cambaih laih bản dự thảo thỏa thuận ini, piah khik kajap bruk công bằng. Saong nan njauk lac sa thỏa thuận siam di abih piah khik caga hu dom kein laba di Khối.

 # Hu takik abih 2 urang metai saong 44 urang karei njauk rambuac dalam sa bala tuk sa sruh radaih du lịch harei 14/11tableik angaok jalan cao tốc kayua janan di Mít-xi-xi-pi (Mississippi), gah meraong taneh ia Mỹ. Urang jakar Hạt Đề-sâu-đờ brei thau, dom jalan cao tốc di ini biak janan saong nguy hiểm kayua hajan patau. Urak ini kapul khik iek jalan cao tốc bang Mít-xi-xi-pi daok peih bruk duah thau ka bala ini./.