# Anak bruk mehit lac hu janih jru hu ralo menuac daok hu pablei di darak pasar, hu ngak jeng asar yau viên con nhộng, hu yaih khan lac piah pasiam ruak ung thư, me-ik saradang saong daong tagok pren pacang ruak, Phó akaok Cục Khik iek jru tavao (Bộ Y tế) Đỗ Văn Đông brei thau: Cục oh brei adat đăng ký, ngak tabiak, blei meng negar lingiu tame saong pablei salih janih jru ini di Việt Nam. Cục khik iek jru tavao hu panuac tacei dom Sở y tế pambuak bruk haong dom jabat yau: hải quan, khik ramik darak pasar, công an tỉnh ban kham merat pasang iek, duah dom janih jru nguy hại nan, langyah catang dom labik, dom menuac urang ngak suan adat hukum urak ini.

# Padang ngak meng bilan 6/2018, tal urak ini Công trình peih praong, pakhang pasiam kênh cầu Ngòi (tỉnh Ninh Thuận) hu ngak blaoh labaih 80% bruk di nyu. Công trình kayua mBan padang ngak năng lực saong peih ngak dom Dự án ODA gah ia ngak po đầu tư, ngan saong yaom jien buh tame ngak lac 162 tỷ đồng, kuhria ngak blaoh saong ba tame pandar dahlau bilan 3/2019, piah khik siam bruk tathuak ia sua bhum pala drak 3.000 ha taneh di gah Brak ban sit Phan Rang-Tháp Chàm, pambuak pagam haong jalan mbak, thủy lợi, pasiam alam môi trường sinh thái, cảnh quan rik daong patagok kinh tế-xã hội di puk palei.

#Meng akaok thun tal ini, Bình Thuận hu rilo dự án điện ia harei hu padang ngak, dalam nan hu dự án điện ia harei Sông Lũy 1; dự án điện ia harei Tuy Phong… saong bahrau di abih lac dự án Sang mac điện ia harei Vĩnh Hảo 6 hu yaom jien buh tame ngak abih tih labaih 1.360 tỷ đồng. Ong Lê Tấn Thanh – urang pan akaok kapul padang ngak trạm điện di dự án năng lượng ia harei Đa Mi - Hàm Thuận brei thau: Kein laba di dự án lac patak pataom hu mbaok danao, oh klaak saoh mbaok danao bo pandar nyu piah ngak năng lượng ia harei mek điện brei ka negar. Meyah oh hu hagait salih karei, ye akaok thun 2019 meda hu điện pandar iek.

# Urak ini, dom urang gaok ruak pandiak tabiak darah dalam tỉnh Khánh Hòa  tagok labaih 23% duk saong dom bilan ini thun diah, rilo meng lac di libik đô thị, libik hu rilo bhapbini daok yau ban sit Nha Trang, dom huyện Diên Khánh, Cam Lâm, Ninh Hòa... Di ban sit Nha Trang hu 1.600 urang gaok ruak. Urak ini dom puk palei daok drah samal pruh jru hóa chất, ramik hacih alam môi trường, pametai lăng quăng, bọ gậy, jamaok piah patrun patakik bruk njom mbak di ruak pandiak tabiak darah.

# Tui kuhria mboh di jabat chuyên môn, tukvak tapa, dalam tỉnh Gia Lai hu labaih 141 ha bei plom njom ruak ka-iu hala kayua vi rút, rah tabiak di 5 huyện, ban sit lac Ia Pa, Phú Thiện, Krông Pa, Chư Pưh saong Ayun Pa. Ini lac mbang camereip di abih ruak ini palai pajoa phun bei plom dalam tỉnh Gia Lai. Bruk njauk duh hatai nan lac urak ini, rilo sang urang ngak nong kayua damen nan ye oh ka am cuh klaak phun bei plom njom ruak. Ini lac sa bruk oh siam, kayua caik dak lavik, ruak dak samar njom mbak.

Khaw tin dunya

# Tui panuac brei thau meng mintri Ngoại giao Thái Lan, di nyaom biai pakat glaong Hiệp hội dom taneh ia Đông Nam Á (ASEAN) mbang yaka 33 rah tabiak di Xinh-ga-po (Singapore) meng harei 13-15/11, Thủ tướng Thái Lan Pra-dút Chan-ô-cha (Prayut Chan-ocha) meda ba tabiak tuyên bố ka tầm nhìn piah kuhria caga ka thun Chủ tịch ASEAN 2019.

# Sa urang thợ hàn umo 41 thun, lac urang Trung Quốc, daok di ban Khai Nguyên, tỉnh Liêu Ninh, gah Đông Bắc taneh ia ini bahrau brei tabiak mbaok sruh radaih juak ngak eng, hu ngak meng 22 nghìn que kem. Radaih atah 2,45 mét saong hu pagam 310 bóng gom gul sit. Yaom lac hu ngak meng dom que kem, min nyu kajap saong pajeng hu sa urang praong. Po di sruh radaih ini brei thau lac, abih 10 bilan piah ngak hu sruh radaih juak ini.

# Asar kim cương “ inem krung hồng” barau mek hu kỉ lục dunya barau ngan saong sa asar kim cương hồng, tuk hu pablei to yaom ngan saong yaom labaih 50 triệu đôla Mỹ. Tui Công ty đấu giá Cờ-rít-xti (Christie’s), thợ kim hoàn danei angan Ha-ry Uyn-xtơn ( Harry Winston) lac urang blei asar kim cương ini. Dahlau di nan, công ty đấu giá caong lac duah hu meng 30 tal 50 triệu đôla Mỹ ka sar patau quý hình chữ nhật praong jaik 19 cara. Công ty đấu giá brei thau, ini lac sa dalam dom janih patau quý tinh khiết abih di gah hóa học./.