# Biar harei 16/8, pak jabat raja-ei, Thủ tướng Nguyễn Xuân Phúc dang tabiak peih nyaom biai haong dom bộ, ngành, puk palei pambuak pagam tal Chiến lược tasik Việt Nam. Hadei di tukvak peih ngak chiến lược tasik, kinh tế tasik, jaik taphia tasik hu k cak rok patagok taong abih gah. Rai diuk bhap bani tapen tasik hu patagok. Dom gah kinh tế yau du lịch song padeih padei tapen tasik, raong pala, taong mek kaya ikan, ngak kaya ikan, pajeng ba angaok tasik hu patagok. Bruk kinh tế-xã hội di dom tỉnh tapen tasik mboh cakrok  patagok di anak meta. Bruk khik iek môi trường tasik dak harei dak hu sangka. Brei panuac tamat mbang nyaom, taong yaom glaong dom panuac rik daong, Thủ tướng raja-ei Nguyễn Xuân Phúc pandar dom bộ, ngành, puk palei patui veik patagok pren khang di tasik, pasiam veik dom cuang kandah, yếu kém dalam yaok gah saong hu dom jalan langyah samar drah piah peih  dom jalan ngak ba Việt Nam khang gah tasik saong ngak meda meng tasik.

# Cục khik iek ruak di mintri Y tế ngan saong bruk pambuak gauk di Tập đoàn AstraZeneca barau peih bruk tabiak mbaok Trang thông tin điện tử “Ka hala phổi khang kadang di libik http://vilaphoikhoe.kcb.vn. Trang web hu daong ka bhap bini thau ka dom ruak jalan hô hấp saong cavap calei dom tangi sua bhian gaok di urang ruak payua tal piah daong urang ruak hu siam jang, piah paglaong bruk pacang caga, duah mboh awal, chẩn đoán, iek ruak,  pasiam raidiuk di urang ruak.

# Hadei di kak je saong kaoh tabiak padang dom quỹ, kein laba di Công ty Xổ số điện toán Việt Nam (Vietlott) dalam nan hu gam dom khoản Jackpot vô chủ meda hu rabha nao tal 38 tỉnh, ban. Ini lac asal kadha bahrau hu urang lambaok Vietlott javap jaleiy dom sua tangi ka yaom jien laba biak praong di công ty ini hu oh takik meng dom giải Jackpot oh hu urang lĩnh thưởng. Tui pathau khan di Vietlott 6 bilan akaok thun, yaom jien pablei vé di jabat ini pak 38 tỉnh, bal nan lac 2.381 tỷ đồng. Kadha njauk caik hatai dalam harak pathau khan nan lac Vietlott brei thau yaom jien  laba dahlau di tuk kak je lac 262 tỷ đồng. 

# Hadei di sa tukvak padheih papar binguk, bộ phim “Quỳnh búp bê” meda hu peih veik di tukvak 21 tuk meteh dom harei seim, ngan yaok adit meng harei 3/9) di kênh VTV3 – rayo papar binguk Việt Nam. Bộ phim di đạo diễn Mai Hồng Phong hu asal kadha ka bruk mại dâm, bruk pablei salih urang kumei saong dom kandauk dalam raidiuk di dom urang kumei me-in tapa dalikan ka raidiuk, thar vak di klau nhân vật: Quỳnh, Lan saong My kayua dom diễn viên Phương Oanh, Thanh Hương saong Thu Quỳnh ngak.

# Taong abih dom urang di kapul Thể thao Việt Nam hu mbaok  di palei Vận động viên ASIAD Jakarta daok kham merat pathram piah pakacah saong taong abih jeng daok caga ka bruk chinh phục dom tabung glaong bahrau di mblang ma-in châu lục ngan haong hatai kham merat glaong di abih. Ngan haong đội tuyển caloi aia, bruk pathram biak mbuan laghaih jang hadei di harei tame palei. Ta-eng Nguyễn Thị Ánh Viên – lac caong khin ka 1 di kapul TTVN angaok jalan pakacah hijao jeng daok hu bruk kuhria caga biak siam. Kình ngư 22 thun daok hu pren yava biak siam saong daok pathram biak gheih.

Khaw tin dunya

# Sa urang jakar rajaei Nhật Bản harei 16/8 brei thau, mintri  Quốc phòng taneh ia ini tabiak bruk jhul khang dom jalan pacang taong tame mạng meng bruk padang sa kapul quốc phòng pacang caga không gian mạng libik akaok mereip dalam tuk Trung Quốc patagok dom năng lực mạng. Kapul barau ini tame ngak bruk di puac bilan 3/2019 ngan saong jaik 40 urang. Bruk ngak di kapul ini hu bruk pacang caga dom nguy cơ taong tame mạng meng dom mạng lưới liên lạc oh talei angaok dom pulao kaoh di Tây Nam Nhật Bản, di tukvak bo dom kapal hải cảnh Trung Quốc bhian hu mbaok vil taom dhar pulao Senkaku kayua Nhật Bản khik iek bo Trung Quốc jeng hu panuac lac chủ quyền di drei

# Akaok Công tố bal Genoa, bhum Liguria, Tây Bắc Italy, brei thau urak ini hu jaik 10-20 urang jeng daok lahik dalam mbang  jaleih tatua di harei 14-8 pak bal ini ngak yaok plug urang metai saong njauk rambuis. Tui akaok Công tố bal Genoa,  bruk nan hu thau meng dom urang daong duah menuac njauk bala, iek tui panuac khan di bhap bani ka dom gauk gar di dom urang nan oh mai sang hadei di mbang jaleih tatua. Tui nan jeng kuhria mboh lac hu jaik 30 ôtô saong dom sruh radaih pajeng daok nao mai ala baoh tatua dalam vaktu baoh tua t jaleih. Dalam tuk nan, gah cứu hỏa Genoa jeng daok abih hatai pambuak haong dom jabat daong duah urang njauk bala pandar asau nghiệp vụ piah duah dom urang njauk bala.

# Harei 16/8, sa mbang taoang tame meng to dhong rah tabiak di sa libik y tế di ban Offenburg, Tây Nam taneh ia Đức, ngak ka sa bác sỹ metai saong sa urang kumei daong bruk di ông ini njauk rambuac. Tui cảnh sát puk palei, sa nghi can lac urang likei njauk mek kareik sa tuk hadei di tuk rah tabiak bruk. Cảnh sát daok kham merat duah thau makna ba tal bruk pametai menuac ini./.