# Pahadar harei Thương binh liệt sĩ (27/7) thun ini, jaik 24 ribau urang hu kong di bal Đà Nẵng taduan mek hu pandap di Akaok negar, yaok pok pandap meng 200.000đ tal 400.000đồng, abih tih lac labaih 5 tỷ đồng. Tuui nan, bal Đà Nẵng buh tabiak meng kadung jien karja jaik 111 tỷ đồng piah alin brei pandap ka 27 ribau urang Amaik Việt Nam Anh hùng, baoh sang sarak karja, Thương bệnh binh… Ong Thái Đình Hoàng, phaok akaok Sở Lao động Thương binh saong Xã hội bal Đà Nẵng brei thau, dom puk palei meda peih bruk alin brei pandap ka dom uramg nan dahlau di harei 27/7.

# Mbang akaok meti, sa danak dak xiếc đặc biệt piah pahadar dom anh hùng, liệt sĩ hu dom  nghệ sĩ Liên đoàn Xiếc Việt Nam padang ngak song parang main piah tabiak mbaok menuac urang njauk di tuk pahadar 71 thun harei Thương binh, Liệt sĩ (27-7-1947 - 27-7-2018). Danak dak hu angan “Nao song thun bilan” rah tabiak melam 27-7 di  Rạp xiếc Trung ương, Hà Nội. Tui nan, danak dak pataom tame padang thaot binguk dom urang bộ đội Trường Sơn. Tapa nan, urang hu mboh bruk khang hatai dalam mesruh metak di dom urang lin  đặc công, urang lin tasik, saai raong lin.

      # Hiệp hội Doanh nghiệp tỉnh Tuyên Quang bahrau pok brei 100 drei limo binai pajaih yaom abih tih jaik 1,5 tỷ đồng ka dom baoh sang kathaot saong jaik kathaot lac bhap bani urang bangsa takik di dua huyện Hàm Yên saong Yên Sơn. Limo pajaih menek hu daong brei ka dom baoh sang nan lac pajaih limo lai Sind trak meng 140 kg tagok saong labaih 14 bilan umo hu Sở Ngak nong saong patagok palei pala tỉnh Tuyên Quang dut iek saong brei thau lac ngak pajaih siam. 100 drei limo pajaih mbang ini meda hu daong brei ka dom baoh sang kathaot, jaik kathaot, abih di nyu lac dom baoh sang hu rai diuk kan kandah daok di bhum atah bayah di tỉnh Tuyên Quang patagok kinh tế, yam tal patruh kathaot khang kajap. 

      # Tui pathau khan di mintri pato megru, Sở pato megru Hà Giang ka bruk điểm thi bất thường, hu abih tih  114 thí sinh, song labaih  330 bài thi hu  tổng điểm chênh tagok labaih 1 điểm dut song chấm thẩm định. hu oh takik thí sinh hu tổng điểm chênh tagok labaih 20 điểm dut song thẩm định. Gaok mai, daok hu thí sinh hu tổng điểm tagok tal 26,8 điểm, tau  29,95 điểm. Bruk ni dok hu dom jabat chức năng pasang iek ngak ka cambaih. Tiến sỹ Nguyễn Sĩ Dũng, urang dahlau deih ngak Phó Chủ nhiệm Văn phòng Quốc hội brei thau: Hulin sahaneng lac dom puk palei jang yau abih hệ thống di khol drei, ye asar kadha camereip, tantu cambaih laih jeng lac giá trị glong abih di hệ thống, njauk lac glong di abih, glong jang dom janih karei. Meyah khol drei oh mesruh pacang piah padang ngak cambaih laih yau sa giá trị đạo đức, sa giá trị tinh thần bo khol drei tong yaom glong di abih ye biak kan.

# Meng akaok thun tal ini, tỉnh Vĩnh Long hu 48 y, bác sỹ likau padeih bruk kayua jien bilan takik. Ong Nguyễn Công Tuấn, Phaok giám đốc Sở Y tế Vĩnh Long brei thau, dom bác sỹ bahrau tabiak sang bac jien bilan tok jaik 3 triệu đồng sa bilan; hadei di kaoh abih dom jien bảo hiểm xã hội, bảo hiểm thất nghiệp saong bảo hiểm y tế ye daok jaik 2,5 triệu đồng/bilan. Tuk dom bác sỹ likau padeih bruk, ye urang pal akaok ba abih binah bruk oh thei ngak nan ka dom bác sỹ karei, ngak catang jang ka dom urang daok ngak bruk. Ini lac makna ngak ka dom y, bác sỹ di Vĩnh Long likau padeih bruk dak harei dak ralo.

Khaw tin dunya:

# Cuba daok pabak Internet ka phone tangin di urang pandar palih ruah, piah peih ngak bruk ni dalam negar di puac thun ni. Dom urang ngak báo di jabat báo chí karja Cuba lac dom urang camereip hu pandar  Internet angaok  phone tangin dalam thun ni . Bruk ni kayua công ty viễn thông karja Cuba ETECSA pabak. Ni lac sa binah di danak dak peih prong piah tame Internet hu siam jang bo urang dang akaok negar Cuba Miguel Diaz-Canel mboh lac meda  jhul patagok kinh tế jang yau dong ka urang Cuba khik caga bruk cách mạng di drei.

# Mentri Ngoại giao Trung Quốc bahrau chỉ trích bruk bảo hộ pablei salih saong ndom lac, sarak eng drei ngak jhak tal kein laba di taong abih taneh aia angaok dunya. Taphia di nan, Trung Quốc jeng nộp đơn pabak bruk yak bak Mỹ tagok Gah pablei salih dunya (WTO) pambuak pagam tal bruk Washington kak je pandap panda Trung Quốc pablei tapa Mỹ hu yaom abih tih labaih 200 tỷ USD. Tui Mentri Pablei salih Trung Quốc, bruk Mỹ tabiak angan kak je tui jalan tăng tốc saong patagok nan lac oh chấp nhận hu.

# Cảnh sát tiểu bang Ô-hai-ô (Ohio), Mỹ bahrau brei thau, 277 tapuk siphau yaom labaih 56.500 đô la Mỹ di sang bac Đại học Luật Đây-tơn (Dayton) njauk co klaik. Tui Ca-mê-ra an ninh, 6 urang hu medhi dalam bruk co klaik tapuk siphau ni. Urak ni cảnh sát pak ni thau hu sa dalam dom urang medhi nan lac Crít-tốp-phơ Béc-lây (Christopher Begley), umo 29 thun. Urak ni dom boh tapuk nan hu duah mboh di dom cửa hàng tapuk siphau klaak di labik ni./.