# Hadei di tuk mong iek harak pathau khan di Ủy ban dom kadha xã hội Quốc hội mbang XIV, Thủ tướng Nguyễn Xuân Phúc hu tacei pato dom mekntri, ngành pambuak pagam tal roh duah, peih ngak tui panuac di Ủy viên Bộ Chính trị, Phaok akaok thường trực Quốc hội Tòng Thị Phóng dalam MBANG nao rivang saong ngak bruk di tỉnh Quảng Trị. Tui nan, ndom ka bruk ramik veik tanut đầu tư ka dom asal kadha Danak dak 135 piah laghaih haong bruk di bhum ceik, bhum urang bangsa takik biak kan kandah, Thủ tướng Raja-ei jao ka Ủy ban Bangsa dang tabiak, pambuak bruk haong dom mentri, ngành taong yaom tanut đầu tư di danak dak 135 piah ramik veik ka nyu njauk haong rai diuk harei ini. Jao ka Gilang pariak Karja  Việt Nam tacei pato Gilang pariak sarak karja brei ngak dahlau bruk peih ngak sarak brei mesre ngan haong baoh sang kathaot saong bhap bani urang bangsa takik; hu sarak brei mesre ka nyu laghaih piah jhul dom labik kan kandah di tỉnh Quảng Trị patagok.

# Yaok rituh anek saih  di dom  xã bhum glong tapen negar di huyện Kỳ Sơn (Nghệ An) oh nao tal sang bac  hu piah tame thun bac bahrau di harei  5-9 kayua hajan prong dui atah di gah angaok krong ngak ka ia di dom krong Nậm Nơn, Mận Mộ… tagok glong, ia  dauk di rilo sang bac, mbaih mboh rilo jalan praong, rilo puk palei oh nao mai hu. Bruk nao bac di dom adei anak tal dok gaok rilo kan kandah.

#  Page harei 5/9, 74 sang bac di huyện Bắc Bình, tỉnh Bình Thuận hu peih bruk tame thun bac bahrau 2018-2019. Dalam thun bac bahrau ini, langiu di bruk khik kajap sĩ số tal bac, chất lượng pato saong gah pato megru huyện Bắc Bình daok pandar dom sang bac njauk caik hatai tal bruk pacang caga rambuis ka uranaih,  jhul pakhang bruk “Hijao – hacih – mekre”, kadha an toàn vệ sinh pandap mbang menyum di dom sang bac bán trú. Daok bhum urang Cam patui veik bruk pato sap Cam. Gru Võ Anh Kiệt – Phaok Jabat pato megru huyện Bắc Bình brei thau: Sa dalam dom bruk bo jabat Pato megru huyện caik hatai sangka dalam dom thun jaik di ini nan lac bruk  pato sap Cam ka 5 sang bac hu ralo anek kamuan bangsa Cam tui bac. Ini lac lac sa dalam dom bruk bo jabat pato megru hu tham mưu haong UBND huyện đầu tư gah cơ sở vật chất jeng yau peih  bruk pato sap ndom saong akhar vak  urang Cam.

    # Sang iek ruak Đại học Y Dược ban raya HCM bahrau  cấp cứu sa urang ruak likei umo 26 thun dok di tỉnh Bạc Liêu njauk  viêm màng não kayua luan ốc sên metah njom ký sinh trùng. Dom bác sĩ brei thau, yaom lac ốc sên hu dinh dưỡng  glong  min brei hu rong dalam labik hacih saat song abih di nyu nan lac  hu tuk tasak . Ốc sên daok dalam tự nhiên mbuan njom ấu trùng sán, tuk mbang  ốc sên metah,  ấu trùng sán  meng jalan tung  PRUAC tui drah tal dom  cơ quan, njom tame hệ thần kinh trung ương ba tal viêm não - màng não.

 # Đồng Nai bahrau peih tuyến du lịch jalan kraong Đồng Nai. Tui nan, tuyến du lịch jalan kraong Đồng Nai atah 30km, meng pulao kaoh Ba Xê, phường Long Bình Tân, TP Biên Hòa tal Thủy điện Trị An, dalam xã Hiếu Liêm, huyện Vĩnh Cửu. Angaok tuyến du lịch hu ralo labik rivang iek pambuak pagam tal dom inem mek dak rai sajarah, ilamo tapen kraong Đồng Nai yau: baha Ông, kalan Nguyễn Hữu Cảnh, Đình Tân Lân, Văn miếu Trấn Biên, palei kruac bung Tân Triều, palei lan am Tân Vạn, patau mỹ nghệ Bửu Long.... Dalam nan, kadha praong lac labik rivang ma-in Cù lao Ba Xê prong 30 ha, meda pamere hu 2.000 tuai yaok harei. 

Tin thế giới:

 #  Viện y tế cộng đồng C-rô-át-tia brei thau, meng akaok bilan  hè tal ni dalam taneh ia ini hu 26 urang njom vi-rút Tây sông Nin, dalam nan hu sa urang metai song lac urang metai camereip kayua jit pandiak Tây sông Nin rah tabiak dalam thun ni. Vi-rút Tây sông Nin hu mong lac kayua cim di cư ba tame châu Âu song hadei di nan njom tapa menuac song anek athur kayua jamuk kaik. Tukvak  ndung ruak bhian dui atah meng 3 tal 14 harei. Vi-rút meda ba tal  viêm não atau viêm màng não di uranaih, urang prong thun song urang hu hệ thống miễn dịch oh khang.

# Dalam tuk menuac sia di Nhật Bản daok trun takik, dom doanh nghiệp negar ini njauk ramik veik jalan pachreih urang naih jioy meng nguồn lao động takik di abih kuhria meng dahlau mai. Dalam negar, kuhria rah tapa dalam yaok sa urang duah hu bruk ngak ye hu 1,62 labik laneng caong hu menuac ngak, tanut glaong abih ka bruk caong hu urang ngak dalam labaih 44 thun tapa. Manuac urang oh hu bruk ngak urak ini daok di tanut 2,4%, biar di abih dalam 25 thun. Menuac sia dalam umo ngak bruk di Nhật Bản daok di tanut glaong abih 87 triệu urang di thun 1995, saong tui kuhria mboh dahlau lac  meda patrun daok 45 triệu urang dalam thun 2065. 

 # Bộ phim “Người vợ ba” di đạo diễn Nguyễn Phương Anh hu tabiak mbaok dunya  di Harei pataom phim Toronto 2018  rah tabiak meng harei  6 tal 16-9 ni di ban  Toronto (Canada). Phim mek bối cảnh Việt Nam abhap  19, anai kumei sit  umo 14 thun angan Mây hu palakhah ngak duik 3 ka urang địa chủ. Anai oh thau lac dom cong khin di drei hu harei ngak ka anai njauk  palih ruah  bruk an phận saong bruk bebas tự do. Hadei di tuk tabiak mboak di Toronto, phim hu tabiak mbaok di  châu Âu tuk hu mbaok tame pakacah di harei pataom phim dunya Saint Sebastien (Tây Ban Nha) di puac bilan 9./.