# Biar harei 28/2, Kapul urang pasang iek di Uỷ ban Thường vụ Quốc hội kayua ong Phùng Quốc Hiển, Phaok Akaok Quốc hội dang akoak kapul hu nao pasang iek bruk grap tanat peih ngak adat hukum gah an toàn pandap panda mbang menyum di tỉnh Quảng Ninh. Ngan haong labik ngak tabiak chả mực Minh Phúc (phường Hồng Hà, bal Hạ Long), Phaok Akaok Quốc hội Phùng Quốc Hiển pandar lac: Caik hatai dalam tukvak ngak tabiak njauk hacaih, njauk tapok ka nyu hacih. Dahlak mboh tapok bo pandar bao bì meng kanduh hộp xốp ye jeng oh ka grap tanat. Ngak habar tuk ba tame hút chân không tuk ba tam luôn ye oh grap tanat ralo. Kadung caik padang saong dom quảng cáo di angaok kadung ini nyauk caik hatai lac thành phần, mực that, aia mesil, tỏi, amariak kalu, oh njauk lac chấm chấm yau nan. Dahlak daok saneng kuhria ka tukvak pandar 6 bilan. Yaom lac hu khuyến cáo lac piah di nhiệt độ -18 độ, yau nan bruk ini drei njauk caik hatai jang. Dahlak tok huac kandah 6 bilan lac tukvak biak atah.

# Urak ini, dom tỉnh, ban dalam taneh ia daok ba gauk pandar adat khik kajap yaom ia tasau ka uranaih ala 6 thun. Rilo puk palei daok ngak jalan talei brei thau số phone ka bhapbini thau dom libik pablei ia tasau oh njauk yaom quy đinh piah jabat ngak bruk di karja dut iek langyah tui thẩm quyền. Bruk khik kajap yaom dom janih pandap ia tasau ka uranaih ala 6 thun hu pandar tal abih bilan 3/2017.

# Thông tin meng Mentri Ngak nong saong patagok palei pala brei thau, dalam dua bilan akaok thun 2017, khối lượng amariak kalu pablei tabiak negar langiu di negar drei hu jaik 16.000 tấn, ngan haong haong jien mek tame 112 triệu USD, trun 19,8% gah khối lượng saong laik 36,3% gah giá trị dut haong tukvak ini thun 2016. Tui dom doanh nghiệp pablei salih amariak kalu, bruk pablei amariak kalu tabiak negar langiu trun khang nan kayua pambak di dom yếu tố cung cầu angaok darak pasar di dunya,  nguồn cung amariak kalu daok mboh glaong jang hatai caong khin.  

# Pachreih tui bruk halan hatian brei darah di mbang peih ngak di kapul Chữ Thập đỏ Nghệ An saong pasak huyết học brei darah Nghệ An, labaih 300 urang jakar chiến sĩ công an Nghệ An hu pataom tame brei darah ngan saong kadha “ brei darah lac daong menuac” “urang ranaih umo Công an Nghệ An khan lac darah hồng – tanjoh darah kho báu hatai menuac urang. Tok sa harei 28/2), công an Nghệ An hu pataom tame brei jaik 400 đơn vị darah.

# Harei 28/2, pak bal Đà Lạt (Lâm Đồng), Ban điều phối gah pandap cà phê saong Trung ương kapul urang nong Việt Nam pambuak peih ngak nyaom biai “patagok pren khang thể chế ka bruk patagok khang kajap chuỗi giá trị gah pandap cà phê”. Ong Nguyễn Thanh Tùng, Akaok Chi hội ngak tabiak cà phê tui jalan khang kajap di huyện Lâm Hà, tỉnh Lâm Đồng, lac: “Ngak cà phê khang kajap tui pakat khang kajap 4C atau UTZ ye Chi hội di huyện Lâm Hà khaol dahlak hu 82 baoh sang hu mbaok tame. Dom thun jaik di ini năng suất cà phê di mikva khaol dahlak hu tagok biak glaong. Min kadha kan kandah di abih pak ini, nan lac ngak tui tiêu chuẩn hacih min pablei tabiak jeng yau cà phê ngak tui jalan oh khang kajap, yaom pablei di nyu jeng yau cà phê urang nong ngak bình thường, pablei tabiak biak kan kandah. Hatai caong khin di urang nong nan lac ngak habar jhul pakhang bruk pambuak gauk di 4 sang, saong karja njauk peih ngak bruk daong ka dom doanh nghiệp, dom hợp tác xã pambuak pagam haong urang nong khaol dahlak piah ka yaom pablei tabiak di mikva hu grap tanat jang”.

#Tỉnh Sóc Trăng daok peih bruk patago raong glang limo ralo dalam tỉnh tukvak meng ini tal thun 2020 saong ba tabiak bruk tal thun 2025, piah ngak patagok giá trị sản xuất saong patagok kajap dalam tuk biến đổi khí hậu. Tui dự án ini, tỉnh Sóc Trăng meda patagok tapol limo ralo meng  34.000 drei urak ini tagok 100.000 drei di thun 2020 saong 200.000 drei di thun 2025.

# Urak ini yaom ikan sặc rằn di Bhum Taneran kraong Cửu Long urang blei tame di urang raong daok trun biak biar di tanut kỉ lục, ngak ka ralo urang raong khat lahik trak. Tui Tổ hợp tác raong ikan sặc rằn xã Láng Biển, huyện Tháp Mười ye yaom ikan mboh trun meng bilan 8 saka aia bulan saong trun biak biar di urak. Yaom ikan sặc rằn trun biar jeng lac hệ quả tất yếu ka sa quá trình patagok oh hu định hướng, kurang quy hoạch saong kurang bruk pambuak pagam.

Khaw tin dunya

# Biar harei 28/2 di ban ien Viêng Chăn, jabat rajaei Lào saong mintri jien padai Lào hu pambuk bruk peih var đấu giá piah pablei dom sruh radaih dahlau thiah hu pandar ka dom urang dang akaok pakat glaong di karja saong rajaei piah ba tame  công quỹ piah peih ngak sarak patak pataom, pataom jien padai dak apdang saong patagok taneh ia. Hu 14 sruh radaih di urang dang akaok karja saong rajaei Lào dahlau thiah pandar hu 7 sruh  BMW 7 Series saong 7 sruh Mercedes-Benz hu ba tabiak pablei. 

# Đảng Cứu nguy dân tộc (CNRP) đối lập di Campuchia harei 28/2 hu palih ruah ứng cử viên ka dom chức chủ tịch saong phó chủ tịch đảng hadei di mbang nyaom di Ban Thường vụ trung ương. Sa urang jakar pakat glaong  CNRP brei thau chức chủ tịch CNRP oh hu thei meriak haong quyền Chủ tịch đảng ini nan lac ong Kem Sokha (Kem Xô-kha). Urak ini đảng CNRP hu ấn định peih ngak nyaom roya đảng dalam harei 2/3 tal piah palih urang dang akaok đảng bahrau, hadei di tuk ong Sam Rainsy (Xam Rên-xi) padeih ngak atah di ini 2 adit. 

# Harei 28/2, dom urang ginum biai hòa bình di bol bala Thái Lan saong kapul phiến quân Hồi giáo hu njauk hatai dak apdang sa “ libik an toàn” di bhum gah meraong srauh kadau di taneh ia. Ini lac bruk ngak hu di mbang ginum biai rah tabaik di ban ine di Malaysia, taneh ia dang kreh ka mbang ginum biai di dua gah./.