Melam 24-5, Thủ tướng Phạm Minh Chính hu harak ka bruk khik caga siam mekre salamat dalam dom labik ngak kong, anak  bruk jit ruak rah tabiak srau kadau, njom mbak khang jang dalam bhap bini, abih di nyu nan lac dom labik ngak kong di Bắc Ninh, Bắc Giang, mbuan si klaoh bruk ngak prong. Tui nan, Thủ tướng hu panuac ieu dom mintri, dom gah, song tỉnh, ban brei paglong hatai saheng dalam bruk ngak, iek prong, patui ngak siam bruk tacei pato di  Ban Bí thư, Rajaei, Thủ tướng song mban tacei jalan pakat negar ka pacang caga jit. Khang hatai brei padeih dom sang mac, xí nghiệp ka oh khik siam, brei pathau khan y tế ka tong abih urang ngak, langyah catang urang halei oh pathau khan.

Kayua jit ruak daok rah tabiak srau kadau, kan si thau dahlau, abih di nyu lac tuk ban raya hu hu dom urang ruak pambak gauk oh ka thau cambaih njaom mbak meng halei di dom chung cư hu rilo menuac, jabat karja, doanh nghiệp, ban Hà Nội brei padeih dom bruk, dom labik ngak mbang, pablei salih yau ye nhà hàng, labik pablei salih mbang menyum di labik (tok brei pablei ba nao), dom labik cakak mbuk, raco akaok saong oh peih bruk pataom gauk mbang menyum rilo menuac meng mon 12 jala pandiak harei 25-5. Brei padeih abih dom bruk me-in sambai, pasram rup pabhap, pataom rilo menuac di mblang bein saong dom labik công cộng. Jeng meng mon 6 harei ini, ban sit Bắc Ninh brei padang 115 bilai pasang iek rahra, pacang plaih jit COVID-19. Gam haong nan, padang 114 labik khik iek pakat phường.

Mesup ni di  Hà Nội, Bí thư Trung ương Đảng, Akaok  Ủy ban Trung ương Mặt trận negar  Việt Nam Đỗ Văn Chiến lambaok ka bhap bini  hu jao pok jien labaih  54 tỷ đồng meng kadung jien taduan dong pacang caga jit  Covid 19 brei ka mintri  Quốc phòng piah duh ka bruk pacang caga jit ruak.  Ong Đỗ Văn Chiến payua panuac thau dar phol tal urang pal akaok  Quân ủy Trung ương, Mintri Quốc phòng song tong abih urang jakar, urang lin gah tapol nyaom pol pang phao krong hu mbaok tame dong siam lagaih ka bruk pacang caga  jit COVID-19 dalam tuk vak tapa piah iek glang pren yava ka bhap bini , khik caga salamad ka taneh ia. Ndom lac meng jalan ngak  "pacang jit yau pacang khamang ", bol lin daok kham merat ngak bruk khang kajap dalam bruk pacang jit jang yau di dom labik brei dok karei.

Akaok UBND TP.HCM Nguyễn Thành Phong taong yaom bruk jit COVID-19 jeng daok biak srau kadau, dom urang njom dak harei dak rilo jang, hu rilo urang njom meng rilo labik, rilo biến chủng oh ka mboh trun. Ong Phong ieu kakei meng harei 25-5, urang ngak bruk karja saong tuai mai tal jabat karja piah ngak bruk, ngak harak gar, brei khan brei thau gah y tế. Yaok jabat, đơn vị kham merat hu kapul COVID-19 piah pasang iek tuai tame tabiak jabat di drei. Gam haong nan, njauk patagok bruk ngak di dom urang jakar, urang ngak bruk karja dalam pacang caga jit. Ong Phong hu panuac kakei dom menuac umo mangaok 60 thun takik tabiak jalan kayua prein pacang ruak di urang praong thun oh daok khang, yau bruk di urang ruak 4780 daok di quận 3.

Di xã bhum atah bayah Cư Pui, huyện Krông Bông, tỉnh Đắk Lắk bahrau rah tabiak sa mbang mblung ia ngak ka 2 adei saai pajeng metai biak pandik harao. Ni lac mbang palung ia ka 2 rah tabiak di  xã Cư Pui dalam oh ka tal 10 harei.  Kayua oh hu urang  iek glang, duik pasang saai Thào Văn Lìn song saai  Lù Thị Xuyến, umo 25 thun ba tui 2 anek Thào Minh Hiếu, umo 5 thun  song adei likei pajeng angan Thào Minh Đồng umo 4 thun tagok puh yauk padai song caik ka dom adei main di chòi. Kayua hawa main, dom kamuan  Hiếu song  Đồng dane takai laik trun danao jiak  chòi ba tal palung ia. Anak bruk gaok bala song abih di nyu nan lac palung ia dak tagok dalam tuk padeih  hè, gam song bruk pathau khan tal dom amaik ame, njauk brei hu jalan siam lagaih jang piah khik iek uranaih hu salamat.

Harei 24/5, Yam ndok Y tế Australia Paul Kelly hu panuac lac, taneh ia ini meda ba tabiak bruk lac alin hadiah dom pok jien dreih yau daok hu ngak di Mỹ piah pachreih bhap bini nao klauk vaccine Covid-19. Tui Giáo sư Kelly, urak ini hu rilo rahra oh ka khin nao klauk vaccine, abih di nyu lac dom menuac umo meng 50 tal 69. Kayua yau nan ye, dom jalan ngak yau alin harak xổ số saong harak blei pandap meda hu ba tabiak piah dui pachreih bhap bini nao klauk vaccine. Taphia nan, dom bruk alin pandap, rajaei Australia jeng daok pasang iek ba pandar ka dom  ‘hộ chiếu vaccine’ saong brei adat ka dom urang klauk blaoh vaccine hu nao mai di dom bang saong bhum taneh di negar ini yaom lac daok dalam tukvak pacang cakak jeng nao mai hu.

Harei kabroi, Xinh-ga-po njauk hatai ka bruk dut iek  Covid-19 tapa jalan suah yava. Tui harak mbao Xtrây Tham (Straits Times) di Xinh-ga-po, dom urang ilamu di Brét-thô-níc (Breathonix), công ty anek di  Đại học pakat  negar Xinh-ga-po hu patagok bruk dut iek  COVID-19 meda duah mboh njom tapa jalan suah yava. Piah peih bruk pasang iek, brei urang suah yava tame nding pabum  pandar sa mbang. Bruk dut iek hu brei thau dalam tukvak oh ka tal sa minite . Dom dut iek lâm sàng camereip hu peih ngak di pasak pakat negar  ka dom ruak njom mbak (NCID) ngan song  180 urang ruak brei mboh  tanut cambaih laih  ka bruk dut iek hu labaih  90%.

Pasak pasang iek saong pacang caga jit ruak (CDC) Mỹ hu panuac kakei bhap bini Mỹ plaih dom bruk nao mai tal Japon. Tui jabat ini, kayua urak ini di Japon, dom menuac hu klauk ginup vaccin bloah jeng mbuan njaom saong pambak tabiak dom biến thể di SARS-CoV-2.  Meng panuac kakei nan di CDC Mỹ, mintri ngoại giao taneh ia ini brei patagok tanut kakei bruk nao mai tal Japon meng 3 tagok 4, lac tanut glaong di abih, nan lac plaih nao mai tal japon kayua Covid-19. Yaom lac oh pakauk rahra  Mỹ tal Japon, dom panuac kakei nan meda pambak tal dom tanut bảo hiểm du lịch saong dom vận động viên haong rahra Mỹ di dom mbang pakacah Olympic tui kuhria hu peih tabiak di Japon dalam bilan 7./.

Urang lang: M.P - H.Pha - 25/5/2021