Dut iek thân nhiệt dahlau di tuk nao tame tal bac

  Tui Sở Pato megru Bal raya Hồ Chí Minh, taong abih 5 bộ tapuk bac da-a hu Mentri Pato megru mboh tangin brei adat jeng hu dom sang bac di bal raya palih ruah, dalam nan 80% sang bac palih ruah bộ tapuk Chân trời sáng tạo (Nhà xuất bản Giáo dục Việt Nam). Ndom ka bruk ini, ong Nguyễn Văn Hiếu, Phaok Akaok Sở Pato megru bal raya brei thau, kayua bộ tapuk ini hu dom tác giả lac dom urang jakar khik iek, rgu pato di bal raya hu mbaok tame ngak. Kayua yau nan ye, asal kadha jaik taphia haon gru pato saong anek saih jang.
    Ong Trịnh Vĩnh Thanh, Phaok jabat Pato megru quận Gò Vấp khan lac, tal tukvak ini, tapuk bac da-a hu ba mai tal dom sang bac, pabak ginup abih ka gru pato, anek saih hu ginup tapuk dahlau di tuk tame thun bac bahrau.
  Anai gru Nguyễn Thị Hồng Yến, Akaok Sang bac Tiểu học Phan Văn Trị (Quận 1) brei thau, hadei di tuk hu bruk palih ruah tapuk bac da-a, Nhà Xuất bản Giáo dục Việt Nam hu pabak dom tapuk piah ka sang bac parabha, duh ka hatai caong khin di dom amaik ame. Dom amaik ame oh cang tut angan dahlau saong dom amaik ame di dom sang bac karei caong hu tapuk ye meda mai tal sang bac piah blei tapuk. Gam haong bộ tapuk Chân trời sáng tạo, sang bac daok pachreih, palaghaih ka gru pato palih ruah pabak tame dom baoh tapuk karei bo gru pato taong yaom glaong piah puac iek (tham khảo) dalam bruk vah tabiak kadha lang pato. 
Sa-ai Nguyễn Thị Dịu (Quận Thủ Đức) hu anek thun ini tame tal 1 brei thau, yaok sang bac palih ruah sa bộ tapuk karei, kayua yau nan ye, sa-ai tut angan blei dalam sang bac piah hu ginup jang. Dom amaik ame mong iek kadha pathau khan angan tapuk giáo khoa tal 1 di sang bac blaoh nao blei di gah langiu. Ndom ka yaom di dom bộ tapuk giáo khoa bahrau ini lac biak glaong, Sở Pato megru bal raya brei thau, piah daong ka anek saih sang kan kandah, dalam phun jien meng kadung jien karja brei ka dom sang bac jeng hu binah piah blei tapuk giáo khoa pandar haong gauk. Meyah caong khin, dom anek saih meda nyim hu yaok baoh tapuk atau taong abih bộ.
Piah khik hu chất lượng pato megru, chất lượng kapul urang gru pato tuk halei jeng lac kadha hu gah Pato megru bal raya caik hatai, meng bruk palih ruah bahrau tal bruk pato pathram paglaong ilamu ka gru pato daok ngak bruk. Thun bac 2020-2021, Sở Pato megru bal raya palih ruah jaik 500 gru pato, urang ngak piah pabak menuac ngak di dom sang bac trung học phổ thông, pasak pato megru saong dom jabat daok dalam gah pato megru. Thun ini, bruk palih ruah gru pato di Sở hu rilo salih bahrau piah paglaong chất lượng urang jakar hu palih ruah tame. Tui nan, gam haong bruk peih prong urang hu palih ruah oh cang hu hộ khẩu di bal raya hu peih ngak dalam 3 thun tapa, thun ini, dom urang dalam Ban Giám hiệu, akaok tổ chuyên môn dom sang bac jeng hu mbaok tame Hội đồng palih ruah. Bruk ini daong ka dom sang bac taong yaom tapak hu asal ilamu di yaok urang tut angan tame pilih ruah pabak hu bruk ngak di drei halei oh. Dom urang tut angan tame palih ruah hu brei ruah labik ngak bruk meng di tuk tut angan tame, meng nan meda patrun hu bruk gru pato hadei di tuk hu palih ruah tame oh taduan mek bruk ngak kayua labik ngak oh njauk haong hatai caong khin di drei. 
Tapa 3 thun klaak bruk brei hu hộ khẩu bal raya dalam bruk palih ruah gru pato, urang likau tame pato nan lac urang daok di dom tỉnh ban karei dak harei dak rilo. Thun ini hu tal 64% urang likau tame pato oh hu hộ khẩu di bal raya hu mbaok tame palih ruah. Bruk peih prong urang palih ruah daong ka chất lượng gru pato hu palih ruah tame dak harei dak tagok, pabak hu bruk pato bac di bal raya. Yau nan min, tui yaok pataom di Sở brei mboh, tỷ lệ dom môn bac, dom sang bac oh samu gauk. Dom môn Toán, Vật lý, Hóa học jeng pachreih hu rilo jang urang likau tame pato, môn sap Anh saong Tin học jeng takik hu urang likau tame pato. 
Dalam rilo thun tapa, dalam tuk menuac piah palih ruah tame ngak gru pato ka pakat học trung học phổ thông mboh mbuan laghaih ye bruk palih ruah gru pato ka dom pakat bac biar jang gaok oh takik kan kandah, abih di nyu lac dua 2 môn sap Anh saong Tin học. Abih di nyu lac tuk peih ngak danak dak pato pakai phổ thông bahrau ye bruk caong hu gru pato 2 môn ini dak harei dak rilo, kayua ini lac 2 môn bắt buộc meng tal 3 saong palih ruah eng ngan haong dua khối 1, 2. Ong Nguyễn Văn Hiếu, Phaok akaok Sở Pato megru bal raya brei thau, gam haong bruk caik hatai tal bruk paglaong chất lượng urang palih ruah, gah Pato megru bal raya jeng pato pathram gru pato piah pabak bruk peih ngak danak dak pato megru bahrau. Urak ini Sở hu ngak salah blaoh bruk pato pathram ka jaik 500 gru pato di dom quận, huyện, dalam nan, yaok sang bac Tiểu học jeng hu sa gru pato halau gha hu mbaok tame khóa pato pathram./.

Urang lang: Jasi-27/8