Tui ong Mohamah Thanh - urang Cam Islam tỉnh An Giang, raidiuk di yaok anek menuac jeng brei pambuak pagam haong bhap bini, sa bangsa halei nan piah thau halau gha di drei. Ngan haong urang Cam An Giang brei tapa Adat cambat tanarakun dalam rai ngak menuac. Dalam nan hu adat cakak mbuk, sa dalam dom adat njauk ndom tal abih di bhap bini Cam.

Yaok uranaih ndih tapui tabiak jeng brei ngak adat ini. Hadei meng ndih tapui hu 7 tal 40 harei, baoh sang urang Cam Islam brei ngak adat cakak mbuk ka anek. Urang Cam Islam mek angan dom po nabi piah caik angan ka anek saong nan lac angan ieu tal luac rai. Dahlau di tuk ngak adat caik angan ka anek, urang Cam palih ruah angan tui kumei atau likei, tui harei melam ndih tapui tabiak. Adat ini hu ngak di sang megik meyah sang danaok sit sot oh ginup labik ka tuai, daok meyah sang praong ye urang bhian ngak di sang saong da-a ong hakiem, dom tuan tuan, urang hu angan je saong mikva puk paga mai hu mbaok. Ong Mohamad Thanh daok brei thau lac:“ Bruk cakak mbuk caik angan ka anek kuman lac sa dat cambat di urang Cam Islam. Tapa adat nan nyu ngak brei talei rohim but pajaih, puk paga hu khang kajap…”

Daok adat tuk praong tagok di urang likei lac khotanh, bruk nan hu dalam hukum Islam saong peih ngak di sang megik. Daok urang kumei ye brei ngak tui adat ga-sam tuk umo dara, piah baoh sang saong urang kumei dara nan thau khik rup pabhap siam jang. Sa-ai Mah Ghiem, palei Phũm Xoài, xã Châu Phong, ban sit Tân Châu, tỉnh An Giang khan lac, piah lagaih hoang bruk patgok di urang kumei saman ini, urang kumei Cam An Giang oh daok ngak catang adat ini yau dahlau diah. “Urang kumei Cam urak ini brei mboh labik dang hu yaom di drei, hu mbaok tame rilo bruk daong xa hoi…

Adat lakhah caga hu klaoh panuac saong ngak lakhah. Klaoh panuac bhian hu ngak di sang gah kumei. Adat lakhah dahlau daih hu ngak dalam 3 harei, urak ini trun daok 2 harei meteh. Gah likei ba metau likei tapa sang kumei piah kabol, ngak adat lakhah saong daok veik gah diuk. Hadei di nan 3 harei, gah likei saong tuai damuai mai pataom gauk di sang gah kumei ngak adat ieu lac mbang 3 harei. Tuk mai mbang 3 harei di sang gah kumei, amaik ame adei sa-ai gah likei ba brei 2 diuk pasang bahrau dom pandap pandar ginup piah pandar dalam sang. Salah adat, tuai damuai hu gah kumei payak mbang huak. Hadei di nan, dua diuk pasang bahrau lakhah nan, ba gauk nao ravang gauk gar, adei sa-ai, but pajaih di dua gah.

Adat tuk plang lahik, urang Cam Islam sahaneng lac abih umo daok di dunya piah nao daok di akhirat, nan ye oh brei haiy caok, pandik harao. Tuk dalam sang hu urang jaik plang lahik, urang dalam palei ba gauk mai bac Koran likau ka urang metai hu tagok suraga. Hadei tuk metai brei menei hacih saong papaok meng khan bai patih 7 tal tui adat di muk kei saong ba nao dar dalam harei nan, oh caik tapa 24 mon. Piah mbon duah mboh kubo, angaok kubo hu padang patau vak angan urang metai, harei, bilan, thun palang lahik. Blaoh anek taco gauk gar ngak pathi ka urang metai. Dom pathi nan lac hadei di 3 harei, 7 harei, 30 harei saong pathi 40 harei. Salah dom pathi nan, lac ginup abih dom adat. Hadei di nan, sang hu jien padai ye ngak pathi tuk halei jeng hu, meyah oh ngak jeng hu. Tui Hukum Islam brei pakauk tuan thaok binguk urang metai, urang Cam Islam di An Giang oh caik papan kakuh ong muk kei.

Adat cambat tanarakun dalam rai ngak menuac di urang Cam Islam tỉnh An Giang hu makna sajarah dakrai, pambuak talei rohim bhap bini saong khik ramik ilamu meng kan mai. Tapa adat cambat nan, brei mboh halau gha makna di urang Cam, bruk panduan mai daok saong padang puk palei, daok pataom gauk di tỉnh An Giang. Adat jeng hu daong pambuak talei rohim but pajaih, puk paga dak harei dak khang kajap. Ini jeng lac labik piah khik veik dom ilamu siam gheih meng kan di urang Cam Isalam.

Meng dom yaom glaong yau nan, Adat cambat tanarakun dalam rai ngak menuac di urang Cam Islam tỉnh An Giang hu Mentri Ilamu, The thao saong Dulich ba tame angan Inem krung ilamu phi vat the pakat negar. Ong Haji Gosaly Ahmad - Pho Ban đại diện cộng đồng Cam Islam tỉnh An Giang brei thau: Ini lac bruk hadah mbaok meta di bhap bini Cam Islam tỉnh An Giang, tapa nan daong ka bhap bini paglong jalan sahaneng dalam bruk khik ramik saong patagok yaom glong di inem krung ilamu bangsa:“ Hu karja iek glang, kuhri kuhra di Ndang saong Karja jeng phot phot sambai, uan phol. Daok meyai hoang gauk, pambuak haong gauk brei khik ramik…”

Urang Cam Islam di An Giang tuk halei jeng thau khik ramik Adat cambat tanarakun dalam rai ngak menuac luac tukvak tapa. Urang hu ngak jeng bein ilamu Cam biak gheih mekre di bhum Nam Bo, daong ngak brei kaya meda jang gilang inem krung ilamu di bhap bini dom bangsa Viet Nam./.