Urang kamei họa sĩ khan lac: "Meng lavik mai, bruk cih thaot binguk angaok lan hu mboh biak rilo min cih tranh angaok lan am Cam ngak meng haluk ye oh ka hu họa sĩ halei ngak. Langiu di nan, lan Hamu Craok hu am di pandiak glaong nan ye biak thu, nyuk aia khang. Kan di abih nan lac sambo màu di pandap lan Bàu Trúc hadei di tuk am nan lac juk xám atau bhong, nan ye, urang họa sĩ njauk cih ngak yau habar piah ka thaot binguk oh sabil lahik angaok mbaok lan, gam haong nan, sambo màu brei mboh hu dom gheih mekre dalam rai diuk di bhap bani Cam saong njauk haong dom bingu la yao klak Chăm Pa".

Mai tal labik parang iek dom bình lan Hamu Craok mỹ thuật kayua urang kamei họa sĩ Kim Trung cih, urang mong iek yau hu tame dalam labik yaok klak meng kan min oh kurang bruk hadah tanjak. Meng dom harei Ka tê, rija negar, adat ngak Katal ngak kareh… tal dom kadha ma-in bhap bani yau ndua buk, jhul gai, juak apui… hu urang kamei họa sĩ cih vak veik biak gheih angaok bình lan haluk, tapa yaok jalan cih biak gheih. Thaot binguk dom bimon Cam yao klak, angaok vòm cong di dom baoh mein, jeik yau ba drei mai veik haong  thế giới tâm linh di mikva Cam, lai tame haong sap kadeit saranai, sap Ghi- năng ngak mebuk hatai urang mong iek. 

Dom urang họa sĩ saong manuac sia takre hội họa thau tal urang kamei họa sĩ Chế Kim Trung meng jaik 10 thun dahlau. Bruk jak jeng di anai hu taong yaom lac sa kadha praong dalam hội họa di bhap bani bangsa Cam. Hadei di tuk hu tame dalam Hội Mỹ thuật Việt Nam di thun 2005, tal harei ini, urang kamei họa sĩ hu rilo kadha mek hu giải thưởng dalam negar saong khu vực.

Yaom lac sang oh hu thei ngak nghệ thuật min Chế Kim Trung brei mboh năng khiếu hội họa meng sit. Hatai takre, caong khin hu cih nyu dui pachreih saai. Hadei di tuk bac tamat Sang bac ĐH Mỹ thuật TP HCM thun 2002, yam tame jalan cih chuyên nghiệp, Chế Kim Trung daok hu bac tamat danak dak cao học gah hội họa di Thái Lan thun 2013.

Jaik abih dom blah tranh sơn dầu di Chế Kim Trung brei mboh ilamo meng kan di Chăm Pa. Nan lac ilamo vật thể saong phi vật thể daok hu khik ramik di bhum palei Ninh Thuận di sa-ai yau kiến trúc bimon kalan, rija roya, adat cambat agama. Meng dom asal kadha ini sa-ai mek hu rilo jak jeng saong hu angan je dalam hội họa harei ini. Urang kamei họa sĩ khan lac: dom rija, roya di bhap bani Cam nyu pachreih ba sa-ai paneh oh thau glaih saong yaok kadha  lac sa bruk gheih mekre karei di gauk.

Mai haong dom blah rup cih di Chế Kim Trung, urang mong iek meda mboh hu dom sambo màu Chăm gam hadah tanjak gam drut droi yau hatung hatai di urang kamei họa sĩ umo labaih 40 thun ini brei ka bhum palei di drei. Labaih 15 thun cih, rilo blah rup cih hu ngak jeng angan je Chế Kim Trung. Dalam nan, blah rup cih "Sambo màu Ka tê" mek hu giải A di Hội Văn học Nghệ thuật dom bangsa Việt Nam thun 2003 saong mek hu giải thưởng di Liên hiệp Dom hội Văn học Nghệ thuật Việt Nam thun 2013, blah rup cih “Rija negar" mek hu giải A thun 2008 di Hội Văn học Nghệ thuật dom bangsa Việt Nam, blah rup cih "Palei Cam dhal phuen Wa" mek hu giải A thun 2009 di Hội Văn học Nghệ thuật dom bangsa Việt Nam…

Haong dom rik daong meng hatai takre hội họa, họa sĩ Chế Kim Trung hu Thủ tướng Raja-ei pok brei harak meyaom ka dom bruk ngak hu biak gheih dalam gah khik ramik saong patagok ilamo bangsa. Ndom menyai haong Chế Kim Trung meng thau hu abih hatai takre di sa-ai ka hội họa. Sa-ai lac, oh hu hagait bui sambai jang tuk ba hu dom hagait rah tabiak dalam rai diuk di urang Cam jang yau dom bangsa adei sa-ai daok di bhum taneh Ninh Thuận tapa yaok blah tranh, blah rup cih. Lac gru pato mỹ thuật di Pasak Hướng nghiệp – pato bruk ngak Ninh Thuận, urang kamei họa sĩ tuk halei jeng saneng ngak habar pato hu sa kapul nyaom họa sĩ ranaih urang Cam triak hatai haong halau gha di bangsa. Tui sa-ai, caong khin ngak saong cakrok patagok njauk peih akaok meng ilamo meng kan di bangsa drei./.