Hu hatai biak takre daoh saong paneh kadha daoh, nan ye A Mư Nhân samar hu mbaok tame bruk ngak âm nhạc saong padang kapul daoh takơ Đồng Xanh bhian nao parang me-in pamare bhap bani Cam grauk dom puk palei dalam tỉnh Ninh Thuận. Thun 1983 ong mai ngak bruk di Jabat Ilamo – Thông tin huyện Ninh Phước, tỉnh Ninh Thuận, haong bruk ngak lac duah pataom ragu ragam bhap bani Cam. Dom ragu daoh thaok brah, daoh dam dara, mek hajan saong sap Ghi-năng, Paranưng, Sarani lai tame dalam dom ragu tamia biak gheih, biak mekre dalam dom rija, roya di urang Cam nyu ngak ka sa-ai biak chreih hatai. Meng dom harei nao dalam tame duah pataom, duah thau dom ragu ragam meng kan di bangsa drei nyu pachreih hatung hatai ka ong paneh tabiak kadha daoh.

Meng nan, dom kadha daoh ndung bak ragu ragam bhap bani Cam di ong dak hu urang pang caik hatai jang. Dom kadha daoh: Palei Cam dhal phuen Wa, Harei Katê, Ápsara vũ nữ Chăm… patui gauk hu tabiak rai saong hu rilo manuac takre ragu ragam biak takre. Daoh dom kadha daoh di drei paneh, ong mek hu rilo jak jeng, mek hu rilo huy chương Ameh, Pariak di dom mbang pataom daoh tamia bhap bani dalam tỉnh saong dalam negar. Abih di nyu lac kadha daoh Palei Cam dhal phuen Wa, meng di tuk tabiak mbaok thun 1985, hu ngak jeng sap yava khang, mek hu huy chương ameh di Harei pataom sap daoh Làng Sen mbang ka sa di bal Vinh, Nghệ An. Palei Cam dhal phuen Wa nan lac sa dalam dom kadha daoh pambuak pagam haong angan je, bruk paneh, bruk daoh di nghệ sĩ A Mư Nhân. Hadei di jak jeng nan, ong dak khang hatai jang piah nao angaok jalan ragu ragam bo drei palih ruah.

 Likau la bhum taneh Phan Rang, Ninh Thuận bak pandiak saong angin, ong  tame bal raya HCM bac di khoa paneh kadha daoh hệ đại học di Nhạc viện TP.HCM saong bac tamat di thun 1996. Meng ini, ong yam tame bruk paneh kadha daoh, saong daoh take chuyên nghiệp biak gheih ghang saong mek hu rilo jak jeng bahrau. Thun 1999, di Harei pataom daoh tamia pakat negar, ong ngak ka urang maong iek kan si van hu, tuk paneh ragu ragam ka màn tamia peih mbaok danak dak Bhum taneh pandiak di Kapul daoh tamia bangsa Ninh Thuận. Yaom lac umo jaik 70 thun min nghệ sĩ  A Mư Nhân jeng mboh daok biak khang kadang. Dalam ndom biai ong biak chreih chrai, bui sambai khan lac, hu paneh kadha daoh saong hu daoh dom kadha daoh ndung bak ragu ragam bhap bini Cam ka mikva dom bangsa adei sa-ai pang yaom nan lac haniem phol praong dalam rai di drei, sa urang anek Palei Cam tuk halei jeng bak hatai takre daoh take.

Tal urak ini bruk paneh saong daoh di ong hu urang thau tal saong hu pok brei angan lac Nghệ sĩ Ưu tú. Min ong lac, kadha prong di nyu oh lac di angan je bo njauk lac bruk takre saong anit ranam di bhap bani brei ka ong. Ong hu rik daong biak rilo tame bruk roh duah, khik ramik, patagok, pambak prong suan yava ragu ragam Cam meng kan tame dalam ragu ragam di drei biak gheih saong biak bahrau. Mai meng nan, ong lac menuac ngak brei hadah mbaok meta ka bhap bani urang Cam./.