Meng 2 thun ini mai, di huyện bhum ceik Bác Ái, danak dak pato iek sap Raglai hu ba tame pato di dom tal bac 1 saong 2 haong jaih 1.600 anek saih lac anek bhik di urang Raglai. Dom anek saih tal bac 1 tuk mbang camereip hu thau akhar vak Raglai jeng mboh biak tatuak drei. Min tui taong yaom di dom gru pato, hadei di sa thun bac, dom adei biak takre saong bac hu biak siam danak dak sap Raglai. Anai gru Katơr Thị Trung, Sang bac Tiểu học Phước Đại B, huyện Bác Ái, t. Ninh Thuận lac:
“Dahlak mboh lac tuk danak dak sap Raglai hu ba tame pato di tal bac 1 saong 2 ye dom adei biak takre. Dom rup thaot, rup cih dalam tapuk biak lagaih haong dom adei. Tuk dom adei hu bac, kol dahlak mboh dom amaik ame di dom puk palei biak chreih chrai duah jalan brei ka dom adei bac hu ginup jang piah ka sap Raglai hadei ini hu khik ramik.”
Ngan saong mikva bangsa Raglai tuk thau lac sap di bangsa drei hu ba tame pato dalam sang bac ye biak bui sambai, uan tabuan kayua ilamu di bangsa drei tuk halei jeng hu khik ramik. Sa-ai Pi Năng Thị Loan, daok di xã Phước Đại, huyện Bác Ái, Ninh Thuận lac:
“Hu karja pato sap Raglai ka dom adei hu bac meng tal bac 1 saong 2 di dom sang bac ye adei jeng uan tabuan kayua hu khik ramik sap Raglai di adei. Đảng, Karja sangka peih pato sap Raglai, lac bruk njauk iek praong. Dhar phor gru pato, pakat angaok brei peih pato sap Raglai. Oh brei var klaak sap Raglai di drei.”
Urak ini, dalam dom sang bac tiểu học di huyện Bác Ái, yaok adit anek saih tal bac 1 hu bac sap Raglai 2 tiết, daok anek saih tal 2 ye bac 4 tiết. Amuk Cấn Thị Hà, Phaok akaok UBND huyện Bác Ái, Ninh Thuận brei thau, langiu di khik ramik sap ndom saong akhar vak Raglai, bruk pato sap Raglai daok hu daong biak rilo ka dom adei anek saih bac hu siam jang dom môn karei meng sap phổ thông.
“Huyện pambuak bruk haong Sở Pato Megru tacei Jabat pato megru ba tame pato iek dalam tal bac 1 di dom sang bac, brei dom adei thau akhar vak di drei. Tỉnh jeng hu công nhận tapuk giáo khoa tal bac 2. Kol dahlak ba tame pato ka dom adei thau akhar vak piah khik ramik ilamu bangsa drei.”
Sang bac Tiểu học – THCS Mai Thúc Loan, xã Xuân Hải, huyện Ninh Hải hu labaih 1400 anek saih. Dalam nan, labaih 700 anek saih tiểu học lac anek bhik di urang Cam. Taphia bruk bac sap Yuan, anek saih meng tal bac 1 tal tal bac 5 hu bac sap Cam. Bruk ini langiu di daong khik ramik, patagok sap ndom, akhar vak di urang Cam, daok hu daong ka dom adei dalam bruk bac dom môn bac karei. Adei Dương Đình Uy Long, tal bac 5B, Sang bac Tiểu học – THCS Mai Thúc Loan lac:
“ Dahlak mboh bac akhar Cam biak chreih. Nai gru pato dahlak mbon thau mbon kanal. Bac tal 1 blaoh tagok tal 5 dahlak hu thua rilo jang…”
Tỉnh Ninh Thuận urak ini hu peih bruk pato bac sap Cam di pakat tiểu học ka 8.251 anek saih di 294 tal bac. Piah paglaong siam mekre bruk pato saong bac sap Cam, dom gru pato sap Cam jeng caik hatai sangka pato pasram dom adei pang, ndom, bac, vak sap Cam. Meng nan, hadei di 5 thun bac, anek saih bac hu, vak hu gheih sap Cam. Anai gru Ngưu Thị Thắm, akaok kapul sap Cam, Sang bac Tiểu học – THCS Mai Thúc Loan, huyện Ninh Hải, Ninh Thuận brei thau:
“ Gru pato brei bhian roh duah dom jalan piah paglong asar pato bac ka anek saih dak harei dak siam…”
Bruk jhul khang pato sap Cam saong Raglai dalam sang bac hu ba mai kein laba praong gah pato megru ka anek saih Cam saong Raglai, ini jeng lac sa dalam dom jalan ngak piah khik ramik saong patagok yaom glaong ilamu di bhap bini Cam saong Raglai Ninh Thuận./.
Viết bình luận