Tui but pajaih phun Bàng daok di palei Baoh Dana, xã Phước Hậu, huyện Ninh Phước, tỉnh Ninh Thuận, adat Payak hu urang Cam peih ngak 7 thun sa mbang piah pok pandap kakuh ka po yang, muk kei saong likau hu bruk sraong daong ka anek taco dalam but pajaih. Labik ngak adat lac sa mblang bein di baoh sang. But pajaih ngak sa sang pajang meng tang pak meng kreim, pacang sir 3 mbaok di gah maraong, gah barak saong gah timun, tok peih sa jalan tame tabiak di gah pai. Tabung sang ngak adat hu tauk meng hareik atau blah bạc nhựa ngak halui, labik gireih ka dom halau janieng ieu yang.

Dalam adat Payak, but pajaih daa ong Kadhar daoh, amuk Pajau dang ngak adat. Amuk Pajau daok lac urang ndem mayai nao mai, pambuak haong po yang, piah khan brei thau ka bruk pok pandap ieu yang hu po yang tui iek saong ndem tagok dom bruk kandauk dalam but pajaih piah ka anek taco thau.

Peih mbaok ka adat Payak lac bruk ieu yang 5 salau lisei. Angaok yaok salau lisei hu 1 pangin lisei mbo, 2 pangin ia bai, 1 preng ikan kho, 1 preng ralaow manuk, hasit sara mbong, 1 danal hala paneing saong 1 cavan alak mbong. Amuk Pajau daok payeng mbaok mai gah timun, cuh gahlau, tuh alak, daa dom po yang mai mek pandapt saong maong iek. Hadei di tuk ngak salah adat pok lisei, dom urang dalam but pajaih mbang huak haong gauk, dom halau janieng padeih padai, caga tame adat daoh saong tamia adat.

Dahlau di tuk daoh ieu yang, ong Kadhar ngak adat truac hadah dom mbaik dhin caik angaok pandap ieu yang saong dom pandap ngak adat, taoh siuk cuk di akaok luk manjek mbau pahe blaoh kak veik, min pandauk sa tua băng marai. Ong Kadhar patui veik daoh dom dalikan saong prein yava di dom po yang yau ye Po Ganuer Matri, Po Thang, Po Ina Nagar, Po Pan, Po Klaong Garai Bhaok, Po Bia (Bia Nai Kuer, Bia Binân), Po Cek, Po Ramé…

Tuk daoh adat Po Ginuer Matri, amuk Pajau peih khan ma-om pandap ieu yang ka Po Thang saong hak hasit ralaow manuk tuk, hasit rik thu caik tame labik ieu yang. Dalam tuk ong Kadhar daoh, amuk Pajau mek bingu lức lan prah ia ieu yang tame dom pandap ieu yang di gah anak sang ngak adat. Tuk daoh tal Po Bia, amuk Pajau mek nding pahuan thak gahlau, ieu yang, mek tangin uak nding tapai blaoh manyum alak tapai. Hadei di nan, tal dom urang lambaok di sang saong puac abih lac ong Kadhar manyum alak tapai.

Daoh ka Po Cei Tathun, amuk Pajau pok khay alak baoh manuk pahuan thak gahlau, dua tangin kakuh pok praong pok glaong daa po yang. Dalam tuk ong Kadhar daok daoh ngan haong dom sap daoh biak hu yaom glaong, amuk Pajau yang trun, brei thau lac po yang halei tame amuk saong ndem lac biak takre haong bruk ieu yang, po yang hu maong mboh saong sraong daong ka anek taco. Daoh adat ka Po Cei Tathun blaoh, amuk Pajau yar khay alak baoh manuk ka ong Kadhar mek baoh manuk jar pacah kanduh, haong makna lac adat hu ngak salah blaoh.

Adat Payak lac sa ilamo gheih mekre, hu dom but pajaih urang Cam khik ramik meng dom rai ini mai. Tapa bruk ngak adat, dom urang dalam but pajaih hu tukvak piah taom mbaok gauk, bui sambai, jum pataom gauk dalam but pajaih. Ilamo meng kan di urang Cam, yau pandap mbang huak,ragu raham ngak adat, ilamo ngak gheih, ilamo parang me-in saong dom jalan diukrai tui darah gah amaik hu but pajaih khik ramik saong pato veik ka rai hadei./.