Adat puac Agal bac angaok bimaong Pô klong Garai hu peih ngak di tuk malam, meng mon 8 tal mon 11. Agal bac hu khik ramik dalam Baganrac saong brei ka Gru khik iek bimaong kalan khik ramik. Agal bac tok hu ba tabiak pandar dalam dom adat cambat praong di urang Cam saong pandar piah pato veik ka dom Paseh dalam adat Yuer Yang yaok thun. Phó cả sư Lưu Sanh Thanh, xã Phước Thái, huyện Ninh Phước, tỉnh Ninh Thuận brei thau: “Agal bac takik hu ba tabiak nan ye dom halau janeng pataom tame puac.”

Tui Po dhia Đổng Bạ, xã Phước Hậu, Agal bac di urang Cam rilo meng vak dom kadha maroi angaok bimaong, dom kadha tacei pato adat phong chức tu sĩ Cam Bàlamôn  saong dom hatai sahneng ka anek menuac, ka langik tasik, ka thiên văn, phong thủy … “Dalam agal bac hu vak veik bruk ngak dom adat angaok bimaong ini. Tuk tagok ngak Paseh ye brei thau akhar haroh Cam.”

Dom halau janeng Paseh hu mbaok tame puac Agal bac jeng brei thau cambaih akhar Cam saong brei gam gam pasram bac ka pahu akhar Cam dalam Agal bac. Saong bruk hu mbaok tame adat puac Agal bac hu daong ka dom halau janeng thau cambaih akhar haroh Cam, tui nan ngak njauk adat cambat tanarakun di urang Cam. Po dhia Đồng Bạ daok brei thau lac: “Bruk puac Agal bac piah pato veik ka dom halau janeng saong bhap bini thau hu dom hagait ong muk drei caik rai veik dalam Agal bac …”

Bruk pato saong khik adat puac Agal bac angaok dom bimaong Cam hu rik daong praong tame bruk khik ramik saong patagok ilmau Cam . /.