Ong Đặng Đăng Đình brei thau:

 “Dalam tukvak tui bac tal bac ini, mboh chreih chrai lo. Tal bac ini hu daong ka drei bac gilac veik akhar Cam. Tal bac hu peih tabiak di xã Phan Hoà, mikva pak ini thei jeng bui sambai. Hu bac daok puac Ariya meng sap di bangsa drei, bui sambai lo”.

Ong Nguyễn Hữu Trí khan lac:

 “Tapa tal bac ini, dahlak hu bac dom kadha  Ariya yau ye: Ariya Chăm thaong Bani, Ariya Sah pakei, Ariya Amuk Thruh palei, Ariya Pataow adat… Tuk sit dahlak hu bac tapa dalam luac 8 thun gam, jeng daok kanal hadar. Nan ye tuk tỉnh, huyện peih tal bac ini, dahlak tut angan tame bac chip”. 

Po, nan lac panuac khan di ong Đặng Đăng Đình saong ong Nguyễn Hữu Trí. Dua ong ini, lac dua dalam dom urang di tal bac pato daoh puac Ariya di urang Cam daok di xã Phan Hòa, huyện Bắc Bình, kayua Miuym tỉnh Bình Thuận bahrau peih tabiak.

 Nghệ nhân Ưu tú  Lâm Tấn Bình daok di xã Phan Hiệp, huyện Bắc Bình, tỉnh Bình Thuận lac sa dalam dom urang dang pato daoh puac Ariya brei thau, piah khik ramik daoh puac Ariya, tukvak tapa, ong saong dom gah pambuak tal hu padang ngak danak dak saong peih ngak di rilo palei Cam.

“Piah khik ramik bruk daoh puac Ariya, tukvak tapa, dahlak saong dom urang thau ka Ariya, pambuak haong Miuyim tỉnh Bình Thuận hu pilih ruah dom kadha Ariya hu angan piah pato….”

Lac urang khik ramik, patoa veik jalan daoh puac Ariya tal mikva atah jaik, ong Thông Đinh Phụng brei thau, piah bruk pato Ariya hu siam lagaih, langiu di bruk peih dom tal pato, brei hu dom bruk ngak karei tra di dom palei Cam.

“Bruk peih dom tal bac bahrau lac bruk daoh, puac Ariya, oh ka tame dalam asal kadha njauk brei thau di yaok kadha Ariya…”

Ragu daoh Ariya lac sa janih ilamu di bangsa Cam hu paneh tabiak meng akhar thrah piah daoh puac saong hu khik ramik tapa rilo rairah meng jalan patoa veik meng cambuai saong ngak jeng tapuk meng akhar Cam. Ariya daok rik daong khik ramik sap ndom, panuac puac, ilamu, nghệ thuật, adat cambat, agama, xã hội di bangsa Cam daok di tỉnh Bình Thuận./.