Urang Cam daok di ban sit Tân Châu, tỉnh An Giang jeng oh thau bruk menyim hu meng tuk halei, min sa labik taneh kabo klak di urang Cam hu patau sarak meng thun 1.700, nan ye rilo menuac sahneng lac bruk menyim khan bai hu meng biak lavik rai.

Amuk Maridam, menuac menyim khan bai palei Cam brei thau, muk thau menyim khan bai meng tuk daok sit, meng umo bahrau 12, 13 thun. Amuk mboh amaik di drei daok menyim nan ye mai maong iek saong sram menyim tui. Gam menyim, amaik gam khan brei thau dom bruk bui sambai dalam raidiuk saong pato amuk jeng sa urang kumei dara Cam tari taring, gheih tangin menyim yaok blah khan bai.

Amuk daok kanal hadar, dahlau daih, amaik di amuk eng drei pala dâu raong tằm mek marai menyim khan. Meng dom blah khan hu menyim meng duah plaak tangin gheih di amaik, hu daong ka sang hu jien tame, raong pato yaok urang anek yau amuk praong jeng menuac jeng urang. Nan ye, urak ini, bruk menyim khan bai oh daok tukvak tabung glaong yau dahlau daih, min amuk oh ka tuk halei hu hatai sahneng klaak bruk menyim.

Angaok dom blah khan menyim, janih ngak brei thau lac khan bai di urang Cam, kan maluk hu haong bangsa karei, nan lac bingu la saong sambo màu. Dom sambo hadah, sup, pandiak, la-an hu lai tame gauk biak gheih, biak mekre.

Langiu di nan, ilamu menyim ngak brei bingu ndaong tagok di angaok blah khan saong jalan merai gar oh njauk pacang lahik meng dom sambo màu jeng biak gheih. Kik menyim hu 2 janih lac menyim xà rông saong menyim khan bai. Kik menyim xà rông gar praong 1,2m. Daok kik menyim khan bai dreih yau kik menyim xà rông min praong jang.

Ndom ka ilamu menyim khan bai, urang Cam pandar dom jalan ngak biak gheih, lac cuk cako, tame tasi, piah kuhria praong sit di blah khan, dom rak marai, ngak jeng bingu la angaok blah khan meng dom janih hu dalam langik tasik yau ye: mata yun, mbaok ka-khait, bingu 4 mata, bingu sang klak, bingu aih ngin taginum…

Meda ndom lac, jalan ngak jeng bingu la angaok blah khan bai lac sa ilamu glaong saong urang ngak brei gheih tangin meng ngak hu. Palei menyim urak ini tok daok hu 3 urang daok ngak hu bruk ini.

Bruk gheih mekre dalam ilamu nhuộm sambo màu khan bai di urang Cam lac sambo màu hadah bhian hu mek meng phun, hala hu dalam langik tasik. Dom sambo màu hu pandar rilo yau ye: mbong patih, kanyik katam, bhong meriah, jhuk, hijao hu ngak meng kanduh saong hala kayau.

Bruk njauk menyai nan lac, nhuộm merai jeng sambo màu hala kayau hijao hu meluk kanyik katam hadah, jangaih, hu mek meng kanduh kayau "pà huk" tamuh angaok ceik di bhum Thất Sơn (An Giang). Khan menyim di palei ngak oh par sambo màu bo cuk lavik harei sambo màu nyu hadah jangaih jang. Kayua yau nan ye bo dom taneh ia phương Tây biak takre khan menyim di bhum ini.

Dom menuac menyim lavik thun  di Châu Phong khan lac, tuk camereip palei menyim tok ngak khan sà rông, khan ma-om saong kapiah piah pablei ka mikva dalam palei. Hadei di nan, tuk bruk yu lit cakrok, rilo tuai mai ravang me-in hu panuac caong lac ngak rilo janih pandap jang ka nyu lagaih haong yaok urang tuai. Nan ye dom menuac menyim hu ngak tabiak rilo janih pandap, dalam nan pandap hu tuai takre abih lac khan ma-om,, muot tamo, kadung bak, balo, bop… biak gheih biak mekre, ginup janih praong - sit saong rilo sambo mau.

Piah khik ilamu meng kan di urang Cam, UBND tỉnh An Giang hu sarak daong pasiam veik bruk menyim. Dom menuac abih hatai haong bruk ngak di muk kei caik veik, hu padang HTX menyim Châu Giang daok di ấp Phũm Soài, xã Châu Phong, ba dom kik menyim di palei tame ngak. Nghệ nhân, menuac menyim hu pataom veik piah padang veik palei menyim khan bai saong khik ramik ilamu di bangsa Cam, gam haong nan, UBND tỉnh An Giang jeng hu ba tabiak rilo jalan ngak piah daong ka palei menyim khan bai di urang Cam di xã Châu Phong hu tagok veik, yau ye: daong brei mesraiy phun jien, patagok bruk yaih khan, pambuak bruk pablei pandap di rilo labik dalam taneh ia, yaih khan angaok sàn pablei salih điện tử. Di bilan 3.2023, palei menyim khan bai Châu Phong hu Mintri Ilamu The thao saong Yu lit pok brei angan lac inem krung ilamu oh mboh di mata pakat negar./.