Kadha vak  di Minh Triều- urang pambuak bruk haong Rayo sap ndem Viet Nam

Adat  Yuer Yang lac rija yaok thun di urang Cam hu peih tabiak di akaok bilan 4 tui sakawi urang Cam. Thun ini, adat Yuer Yang hu peih tabiak meng harei 24 tal harei 26/7/2023. Tui hatai sahaneng di urang Cam, ini lac adat piah likau ka hajan siam, hangin lagaih, ngak hamu hu padai, pala tangei hu tangei, pateok nao dom bruk kanjak jhak saong taduan rok dom bruk siam makre, patuah jamo, rahra hu trei sir haniem phul. 

Ong Dhiah Lưu Sanh Thanh, daok di Xã Phước Thái, huyện Ninh Phước ndem lac: “Adat ini, piah likau ka hajan siam, hangin lagaih, raidiuk trei sil siam makre ka anek taco…”

Meng dah page, mikva Cam di rilo palei ba gauk mai tal labik bimon Pô Klong Garai, ban Phan Rang - Tháp Chàm, tỉnh Ninh Thuận  saong ba pandap mai tal bimon piah ngak adat ieu yang, likau ka hajan siam, hangin lagaih, prein yava hu khang kadang, siam mekre, salamat. 

Amuk La Thị Ngọc Thuyền, daok di palei Hữu Đức, xã Phước Hữu, huyện Ninh Phước, Ninh Thuận ndem lac: “harei ini lac harei peih pambang bimon. Drei mai tal pak ini piah likau ka anek bik nao bac ta-a hu siam makre, prein yava khang kadang, ngak mbang hu kaya mada..”  

Bruk peih ngak adat Yuer Yang di mangaok bimon rah tapa dom adat lac ngak hacih sa-at labik bimon, adat puac harak gar bac, adat ieu yang apui saong adat pok pandap paling ka dom po yang. Kayua tukvak atah, dom bimon jeng kareik pabah mbang saong oh peih ngak adat halei nan ye dalam Adat Yuer Yang, urang njauk peih ngak adat ngak hacih labik ginreih.

Ong Tạ Cơ, daok di palei Tân Đức, xã Phước Hữu, huyện Ninh Phước,t. Ninh Thuận ndem lac: “Anek taco harei ini mai ngak adat, ba rilo baoh kayau, manuk mai piah ieu yang caong ka dom bruk siam makre…”

Adat Yuer Yang lac adat meng kan hu meng lavik saman dalam sajarah cak rok patagok di bangsa Cam. Bruk peih ngak dom adat ieu yang biak praong prang ndung mbak hukum agama saong brei mboh hatai caong, jeng yau hatai jia di rahra ndung mbak ilamo padai ia. Bruk hu biak rilo dom adat ngak Yuer Yang di mangaok bimon Pô Klong Garai lac dom  gheih mekre di adat, cambat di urang Cam Ninh Thuận./.