Da-a mikva saong taong abih gauk pang kadha vak di urang pambuak bruk Thúy Linh daok di Ninh Thuận hu ndom biai ka bruk ini:

 Tour du lịch ba drei tame duah thau ilamu Cam, kadha praong abih lac ilamu mbang huak saong daoh tamia di palei Cam Thành Tín, xã Phước Hải, huyện Ninh Phước, tỉnh Ninh Thuận yaom lac bahrau peih tabiak meng 3 bilan ini mai min dui pachreih hu bruk caik hatai sangka di tuai dalam taneh ia, tuai meng negar langiu.

Sa-ai Bích Giàu, urang peih ngak Tour Du lịch ba drei tame duah thau ilamu Cam khan lac: Pandap mbang huak Cam nyu bingi, pahe karei, pagap yau yaok sa janih ahar nyu pambuak pagam haong sa rija, roya, sa adat cambat. Nan ye, kapul di Bích Giàu hu pambuak bruk haong dom sang bhap bini, kalup kapul alat ragam saong kapul urang kumei dalam palei ngak dom janih ahar meng kan saong parang me-in dom alat ragam, dom ragu tamia meng kan… Jien duah hu meng tuai damuai, hu kaoh tabiak 30 - 40% brei ka dom sang bhap bini. Kiều Thị Bích Giàu brei thau:  “Urang Cam hu dom sang oh ka thau ngak, oh ka thau jalan dui pachreih hu rilo tuai damuai…"

Labik du lịch Khánh Ly – famstay di palei Cam Hữu Đức, xã Phước Hữu, huyện Ninh Phước hu dom janih pandap mbang huak hu angan lac lisei srau, atau dom pandap mbang hu ngak meng menuk. Abih di nyu lac, sa pandap tra oh kurang hu di palei Cam Hữu Đức lac tour nao me-in vil val palei di mangaok dom sruh radaih lamo saong pang hòa tấu alat ragam Cam... Labik du lich ini daok dui pachreih hu rilo tuai damuai, meng nan ba jien tame rilo ka mikva. Sa-ai Hán Thị Khánh Ly – po labik du lịch Khánh Ly – farmstay hijao khan lac: “Nao me-in meng radaih lamo hu tuai biak takre, abih di nyu lac tuai daok di  Sài Gòn..."

Bruk ngak saong cakrok du lịch bhap bini di urang Cam Ninh Thuận daok dui pachreih hu bruk sangka di dom Cty Du lịch lữ hành saong dom tuai mai tal dak harei dak rilo. Kadha praong di dom bruk ngak ini, lac bruk pambuak gauk di dom labik ngak du lịch haong dom baoh sang bhap bini. Tuai mai tal dom palei du lịch ini hu mbang dom pandap kayua mikva bangsa Cam ngak tabiak.  Mikva ngak dom janih pandap mbang meng njam pala di bein, ikan hamu, menuk raong dalam bein atau pabe ceik. Langiu di nan, daok hu maong iek dom ragu tamia, kadha daoh brei mboh ka raidiuk, bruk ngak mbang ngak huak yaok harei di mikva… 

Bruk cakrok saong paglaong yaom kaya mbang huak, ragu ragam, saong dom ragu tamia meng kan dalam bhum urang Cam pambuak haong du lịch lac sa jalan nao siam. Bruk ini oh lac yaih khan ilamu, kak kajap bruk jum pataom bangsa, bo daok daong paglaong raidiuk di mikva Cam ngak kinh tế tui jalan hijao, hacih.

Yau nan min, dom labik ngak du lịch bhap bini nan, ka oh hu pambak praong dalam tỉnh kayua kurang bruk pambuak gauk. Ong Tăng Thông Nhân – Phaok akaok khoa quản trị du lịch di sang bac Đại học Hutech ban raya Hồ Chí Minh – lac urang gam padang tabiak, lac Yam ndok điều hành Cty du lịch Pacific Travel Group brei thau: “Piah ka pandap hu kein laba saong khang kajap, ye bruk ngak di karja lac biak praong. Dom urang tacei ba tal menuac ngak du lịch oh brei yaok urang ngak sa janih, dom pandap oh brei kateik mangaok gauk. Saong dom yaom kaom brei tantu, cambaih laih. Karja brei ngak ka nyu siam jang, njauk bruk tacei ba gah du lịch”.

Piah patagok siam lagaih bruk ravang iek bhap bini, ba mai kein laba ka dom labik ngak du lịch saong bhap bini Cam di tỉnh Ninh Thuận, brei hu jalan ngak samu gauk meng pato pakai menuac ngak, labik ngak, tal cakrok pandap mbang huak ... ka nyu siam, lagaih, hu ilamu. Praong jang lac brei hu sa labik dang tabiak tacei ba, padang bruk pambuak gauk dalam dom bruk ngak, hu yau nan, du lịch bhap bini meng cakrok hu siam lagaih, kein laba, khang kajap ./.