Kapul ngak pahla Muslim kayua sa-ai Kubi Abu (umo 45 thun) daok di Phường 17, quận Phú Nhuận, TP.HCM padang tabiak. Labaih 5 thun ngak bruk, ngan haong 10 urang hu mbaok gam saong dom urang pambuak bruk, kham merat duah daong ka dom urang kan kandah daok di  grauk labik.

Tui jalan ngak lac daong ka bhap bini, dom urang dalam kapol halan hatian hu mbaok tame, rik prein yava haong karja palei padang raidiuk ilamu, khik kajap sron mbon salamat puk paga. Dom urang dalam Nyaom peih radaih kuan piah duah jien ngak bruk pahala. Gam haong nan, kapul hu ngak rilo bruk, yau ye daong karja palei duh ka bruk hu peih tabiak ngak di labik bhap binoi.  Yaok thun, Kapul jak ba dom urang ngak pahala dalam saong langiu ban rik jien tame blei pandap ngak 02 baoh sang  anit ranam, yaok baoh sang 5 trieu dong; jak ba urang rik jien pah radaih pajeng urang ruak  meng 500 ribau tal 1 trieu dong yaok bilan…Muk Ro-phi-ah daok di  Phường 17, quận Phú Nhuận, TP.HCM hu Kapol ngak pahla Muslim daong jien blei pandap piah ngak sang anit ranam.  Muk Ro-phi-ah druat druai lac:“ Tuk gaok kan kandah urang daong brei drei …”

Mboh bruk ngak di kapul biak siam nan ye rilo mikva di Ban raya HCM jeng yau dom tỉnh karei abih hatai rik daong tame piah Kapul sumu daong ka urang kan. Sa-ai Abdol Halim daok di Phường 1, Quận 8, TPHCM lac sa dalam dom urang abih drei haong Kapul ngak pahala Muslim brei thau:“Nyaom sa-ai Kubi ngak biak rilo bruk daong ka bhap bini. Dalam labik ini hu biak ralo urang hu kapul di sa-ai daong”

Kapul ngak pahla Muslim oh lac daong ka dom urang dalam labik daok di drei bo daok hu daong ka rilo urang kan daok di labik karei. Birau di abih, muk May - Sa -Mah umo 60 thun, daok di xã Khánh Bình, huyện An Phú, tỉnh An Giang, daok sa dreii, ruak zona thần kinh trak ba tal sup meta, trak tanye, laka di takai nao mai oh hu. Hadei di tuk thau raidiuk kan kandah di muk, sa-ai Kubi Abu nao taom gaok karja pak nan, piah hu thau cambai laic blaoh eiw urang daong. Kapul ngak pahla Muslim  pataom hu jaik 50 trieu dong piah daong jien ndik iek ruak,  jien jru ka muk May -Sa – Mah. Urak ini, prein yawa muk hu siam tagok.

Sa urang karei hu Kapul ngak pahla Muslim daong nan lac kamuan Salyha (umo 9 thun) gaok bala radaih ba tame Sang iek ruak Đa khoa Châu Đốc, tỉnh An Giang sa trieu dong. 

Sa-ai Kubi Abu, akaok Kapul ngak pahla Muslim brei thau, tuk nao tal labik mikva khin daong, yaom lac bhum atah bayah, dom sa-ai tuk halei jeng kakei gauk kham merat nao tal yaok labik piah rivang, brei jien brei pandap daong tal tangin urang. Yaom lac pandiak atau hajan, labik kan duah jeng oh pacang hu takai yam di dom sa-ai dalam Kapul.

Tuk tangi sua kayua halei daok khik ramik kapul ngak pahla ini, sa-ai Kubi Abu brei thau, rup eng hu rik prein tame haong dom adei sa-ai meng tuk camereip padang tabiak, tal urak ini, bruk bui sambai tuk hu daong dom urang kan kandah jeng daok tamo yau harei camereip. Meng tuk ngak bruk pahala haong kapul tal urak ini, kan kandah dalam bruk ngak pahla oh lac takik, min sa-ai oh ka tuk halei sahneng tal bruk padeih veik. Yaok baoh panuac dhar phol, dom cambuai klao atau yuh akok di mikva yaom lac biak mbuan mbiah min ngan haong dom adei sa-ai dalam kapul lac haniem phol biak praong piah pachreih gauk patui  veik bruk daong ka urang. Nan jeng hu makna lac meda hu rilo bruk siam mekre ba ka drei dalam raidiuk. Sa-ai Kubi Abu, akaok Kapul ngak pahla Muslim khan lac: “Dahlak gam haong dom adei saai dalam kapul ngak pahla Muslim ngak bruk meng abih hatai…”

Meng dom bruk daong karei di gauk yau ye rik  pataom jien tame blei pandap ngak sang anit ranam; jak ba urang ngak pahala rik jien tame pah radiah pajeng urang ruak; ba dom urang ruak kan kandah nao iek ruak, taong ruak, blei jru…dalam luac 5 thun tapa, kapul ngak pahla Muslim hu daong ka labaih 100 urang Cam kan kandah di Ban raya HCM saong dom tỉnh karei di gah Meraong negar./.