Ka sa lac ragu daoh ngak adat:

Hu mboh rilo abih dalam bhap bini Cam lac ragu daoh ngak adat. Ragu daoh ngak adat hu pandar dalam dom adat pahadar dom urang hu iek praong iek glaong yau po yang, pagap yau: Po Inâ Nâgar, Po Tang Ahaok, Po Nai...saong rilo menuac urang karei dalam sajarah hu pok papraong, paglaong.

Kol dahlak tok ndom tal dalikan Cei Dalim lac sa urang tướng Cam, tuk daok sit sang kan kathaot, diukrai meng bruk pablei baoh dalim, hadei di nan praong tagok daong ka taneh ia, mek hu rilo jayah praong. Atau dalikan  thuyền trưởng Po Tang Ahaok oh khin mboh bruk pametai gauk, tagok nao daok di bhum ceik glaong... dom kadha daoh ini bhian hu ong Maduen kua Baranâng daoh di tuk Rija.

Rija roya di urang Cam patui gauk peih ngak bak abih dalam thun, ginup adat cambat, ginup dom po Yang. Yaok po Yang atau yaok adat cambat jeng hu sa ragu ragam karei. Hu labaih 72 ragam ginang karei di gauk. Dom Rija lac bruk pambuak gauk di adat, ragam, tamia. Klau kadha nan nyu lai srau tame gauk ngak jeng suan yava di rija.

Ka dua lac ragu daoh bhap bini Cam

Ragu daoh bhap bini Cam hu rilo janih, yau ye: Daoh Mayut mayau, Daoh dam dara, Daoh rathung chai, Daoh pandao, Daoh ndam mâtai kayua Ong Daoh daoh ru suan menuac metai dahlau di tuk ba nao cuh, Puec jal... Daoh dam dara di urang Cam lac dom kadha daoh bhap bini brei mboh hatai anit ranam gauk, uan hadar gauk di dua dam dara meng dom panuac ndung bak meyut meyau. Daok ragu ragam dalam ragu daoh bhap bini di urang Cam, abih di nyu lac dalam dom janih daoh yau ye Daoh dam dara, Daoh meyut meyau, jeng hu pambuak gauk biak kajap, biak lagaih laguan.

Ka klau lac ragu Daoh ndam matai:

Ragu daoh ndam matai jeng hu labik dang biak praong dalam raidiuk urang Cam. Menuac metai dahlau di tuk ba nao cuh hu dom Ong Daoh dalam palei mai daoh ru suan meng dom panuac daoh karei, ba menuac metai nao tagok lot daih.

Daoh dalam bruk ini, urang Cam bhian hu capi Kanyi (dreih yau đàn nhị di urang Yuan), panuac daoh bhian ndom lac: “Dunya lac labik daok pataok – yau sa bruk nao pablei salih atah – kol drei mai haong dua plaak tangin mbong patih – blaoh nao meng plaak tangin patih mbong. Chreih chrai piah mai – bui sambai piah nao”.  

Tuk tame ragu daoh, tuk halei jeng hu 4 mbaik capi yava tagok sap mbuah kan, sa-uh sa-uan, hadei di nan meng tame meroi likau. Dom kadha meroi likau nan harei ini jeng daok hu khik veik dalam dom baoh tapuk klak vak tangin, min makna di nyu, oh thei thau./.