Mai veik palei Cam Bỉnh Nghĩa dalam dom harei akaok bilan 3 ini, khaol dahlak mboh hu bruk salih bahrau di sa bhum palei kan kathaot dahlau daih. Mblang padai Đông xuân 2022 -2023 daok kanyik katam asar padai, tapol limo trei hareik tui taok gauk nao angaok jalan palei. Palei Bỉnh Nghĩa urak ini hu labaih 800 baoh sang ngan haong 4.366 urang lac bhap bani Cam. Mikva diuk meng jien mek tame meng ngak padai, njam patam saong pambuak haong bruk raong athur hu takaiy. Oh lac tok kham merat cak rok patagok bruk ngak mbang kinh tế, mikva Cam di labik ini daok sangka tal bruk pacang khik saong patagok yaom ilamo meng kan di bangsa drei.

Labaih sa thun ini mai, tal pato adaoh ragu daoh bhap bani Cam hu khik ramik di harei dit yaok adit. Urang dang tabiak pato lac dom urang prong thun thau cambaih ka ragu daoh Cam. Amuk Lượng Thị Mùi – urang nao gam haong tal bac ini meng harei bahrau padang brei thau, ngan haong hatai caong khin khik veik dom ragu daoh bhap bani Cam, amuk haong dom urang daok dalam Mban adat cambat tanarakun palei Bỉnh Nghĩa hu nao tal yaok baoh sang piah jak ba anek kamuan takre daoh mai tame tal bac. Tal bac hu peih tabiak dalam sang ilamo di palei, pachreih hu meng 8 - 10 adei. Amuk Mùi brei thau: “Dom kamuan pataom mbaok mai pak ini piah bac dom kadha daoh Cam…” 

Oh lac peih tal pato daoh ragu daoh bhap bani Cam, Mban adat cambat palei Bỉnh Nghĩa daok peih nyaom pakacah yau: Daoh ragu daoh bhap bani Cam, tamia Cam saong vak akhar Thrah dalam tuk peih ngak Rija Negar 

Harei Rija Negar hu peih ngak di tuk akaok thun bahrau tui saka Cam (jaik puac bilan 4, akaok bilan 5 Saka aia harei). Peih ngak adat nan lac dom halau janeng yau: Mâduen, Ka-ing, Camưnei, amuk Pajau, Kadhar saong dom nghệ nhân bhap bani. Tamat Rija Negar lac binah daoh nao mai, daoh pasa saong tamia klai kluk (múa phồn thực) piah kakuh likau angin siam hajan laghaih, phun pala, athur raong caih menek bak abih.  

Rija Negar pak ini jeng lac tukvak piah ka dom urang dalam sang pataom mbaok gauk, mbang dom kaya mbang meng kan di urang Cam. Meng dom makna siam mekre nan, adat cambat akaok thun di urang Cam pak palei Bỉnh Nghĩa hu Mentri Ilamo Padhih saong Rivang ma-in pok angan saong ba tame angan inem krung ilamo oh mboh di meta di harei 3/2/2021.   

Ong Châu Quầy, urang hu angan je di palei Bỉnh Nghĩa brei thau, rai diuk di mikva Cam pak ini pambuak pagam haong dom bruk ngak nong, haong bruk ngak hamu ngak apuh meng lavik rai mai. Kayua yau nan ye, mikva thei jeng caong khin ka angin siam hajan laghaih, pala tangeiy hu tangeiy, ngak padai hu padai. Mikva kakuh po Yang yau  Po Riyak, Po Tang Ahaok dom yang ini pato ka mikva dalam palei jalan diuk rai ka nyu laghaih haong langik tasik; Yang kamei Po Nai pato ka mikva ngak padai, pala kapah piah menyim jih dalah...Piah likau hu rai diuk trei sil: “Kayua yau nan ye, yaok thun tal tuk harei rija, ye urang kumei dalam palei biak chreih chrai…”

Ong Lượng Thanh Nhứt, Phaok Bí thư Đảng ủy xã Bắc Sơn, huyện Thuận Bắc, tỉnh Ninh Thuận brei thau, bruk peih ngak lễ hội hu daong pambuak pagam bhap bani Cam veik haong gauk, ngak brei pacang khik veik dom yaom ilamo meng kan. Kayua yau nan, puk palei biak sangka tal bruk cak rok patagok dom yaom di rija roya Cam pagam haong bruk cak rok patagok bhap bani khang kajap dalam vaktu padang ngak palei pala bahrau. Dom alat ragam meng kan di urang Cam hu ba tame pato ka anek saih dalam dom sang bac. “Bruk ngak cambaih laih di puk palei, jhul pakhang bruk pacang khik ilamo meng kan di mikva Cam. Bo cambaih laih pak ini, lac ba dom alat ragam yau: saranai, Ghi năng, Baranưng tame dalam sang bac. Dahlau diah, dom alat ragam meng kan ini tok hu dom urang prong thun meng thau ma-in dalam tukvak peih ngak lễ hội, daok urak ini dom adei anek saih urang Cam thei jeng thau ma-in abih, dalam sang bac (pakat 1, pakat 2) jeng hu Ghi năng, Baraneng.”

Gam haong karja palei, urak ini urang Cam labik ini daok pamong tal bruk pacok duah, patagok dom yaom di lễ hội piah cak rok patagok bruk rivang ma-in ilamo tâm linh. Ini jeng lac bruk ngak biak siam rik daong khik ramik dom yaom inem krung lễ hội di urang Cam saong patagok jien mek tame ka mikva./.