Daok Angaok jalan Nguyễn An Ninh, Quận 1, ban raya HCM, gah pai darak pasa Bến Thành, nhà hàng Basiroh, pablei pandap mbang Halal (pandap mbang hu sik ngak tui hukum Islam) ka urang tui agama Islam, tuk halei jeng hu rilo tuai tame tabiak mbang menyum. Tuai rilo meng lac mai meng dom negar yau Malaysia, Indonesia, Brunei, Ấn Độ… Po nhà hàng ngui cuk khan aow  Cam Islam, thun ni , umo labaih 60 thun, thaik thaot hu rilaow, mbaok meta biak slut mbut tuk halei jeng lanyim klao, rap ar tuai damuai. Hu tuk, muk tapa cửa hàng khan aow pablei pandap ka urang Islam jeng hu angan  Basiroh daok di gah daih jalan. Muk nan lac Haji Basiroh lac urang akaok meti  peih cửa hàng khan aow  song peih  quán mbang ka urang Islam  angaok jalan hu ieu lac “phố Malaysia” di ban raya HCM. Saai A-Jit palei daok di tỉnh An Giang, thun ni umo  37 thun , lac sa dalam dom urang hu mbaok meng harei camereip di labik pablei khan ao song  nhà hàng Basiroh angaok jalan Nguyễn An Ninh, Quận 1, ban raya HCM.  Saai brei thau:“Muk  Basiroh hu peih labik pablei salih di pak ni meng thun 2011, pablei pandap  thời trang, patui di nan lac  quán mbang.”

Mong iek veik bruk padang mbang ngui, yaom lac muk Basiroh pabiar rup lac tong abih bruk mai meng patuah, min meng dom bruk muk ngak, meda mboh lac muk ba abih pren yava, kham merat biak rilo. Muk Basiroh khan lac, dahlau di thun  2000, muk ngak bruk ka  công ty roh duah drak pasa  di tập đoàn Anh quốc daok di ban raya HCM. Tuk nan, hu dom urang Malaysia mai ngak bruk, urang duah blei khan aow Islam piah ngak pandap alin, abih di nyu nan lac Telekung – mak kha na. Meng nan, muk sahaneng lac, habar drei oh ngak khan aow pablei ka urang Islam ? 

Thun 2000, muk likau padeih ngak di công ty, pah sang di jalan  Nguyễn An Ninh piah peih labik pablei khan ao. Muk Eng drei nao palih ruah tanyiak, duah jeing jhik, jeing pet, cih mẫu pet. Piah ngak ka pandap angan Basiroh nyu karei jang dom pandap karei, muk duah song ngak dom bingu la di urang Chăm, pabak tame dom phụ kiện…Meng tanyiak siam, bingu pet gheih mekre saong yaom mbiah, pandap di muk hu rilo tuai Malaysia duah blei. Tuai Malaysia mai rivang ban raya  HCM ye duah tal muk piah blei. Tuk blei bloh, urang khin duah pandap mbang di urang Islam biak kan nan ye nyim muk ngak. Mboh yau nan, muk peih pablei pandap mbang, camereip tok hu dom janih haong 2 – 3 baoh bàn caik di tapen jalan anak labik pablei khan aow. Hadei di nan tuai dak harei dak rilo, thun 2011, muk peih  nhà hàng glong 3 tal. Hu tuk muk peih  tal 3 nhà hàng caik angan Basiroh, rilo di abih angaok jalan  Nguyễn An Ninh.

Min, piah ngak ka tuai njauk hatai oh lac mbuan. Muk Basiroh brei thau, lac urang Islam yau gauk min khẩu vị urang  Cam nyu karei urang Malaysia. Pandap mbang urang Cam oh yau pandap mbang di urang Malaysia. Urang mbang taba min biak hang. Muk ngak pandap mbang biak mbak carak. Muk duah thau ka pandap mbang Malaysia, pambuak haong panuac khan di tuai bloh mai ngak. Urakni, pandap mbang di nhà hàng Basiroh hu jiak 100 janih. Langiu di pandap mbang meng kan di urang Cam yau: cari pabe, cari ikan, har palata…thực đơn jeng hu biak rilo  pandap mbang  Việt yau phở bò, ia bac mesam ikan pathoc, ikan kho tộ, njam puong xao.

Bahrau ini, 2 tạp chí brei ka urang kamei di  Malaysia lac  Jelita song Kosmo hu caik dua blah báo piah ndom ka  labik pablei khan aow Basiroh song muk po di nyu. Urang oh damen panuac pok meyaom pandap di cửa hàng “Telekung chất lượng glong Basiroh”, “Telekung Việt Nam hu mbaok di Malaysia”…Mai rivang ban raya .HCM, rilo tuai Malaysia, Indonesia, … biak meyaom phở bò Việt Nam di nhà hàng Basiroh. Ni jeng lac pren pachreih ba praong piah muk patui bruk pablei salih di drei. Muk Basiroh cong khin lac:“Lac urang anek Cam,  dalam dom janih pandap ngak tabiak  jeng hu janih ilamu Cam Việt Nam.

Meng bruk pablei salih khan aow song pandap mbang Islam, yaok thun muk Basiroh duah hu oh takik jang 1 tỷ đồng. Oh lac, hatai khin ngak kaya meda,  muk Basiroh daok hu dong ka rilo urang  Cam hu rai duik kan kandah  yam tagok dalam rai duik. Urang ngak di  nhà hàng jeng lac urang Cam hu rai duik kan kandah, muk taduan tame ngak song brei huak lasei, labik ndik, labik dok. Jien duah hu di yaok urang ngak, tui kuhria sa bilan  lac 5 triệu đồng. Saai Ro-Phi-Ah daok di quận Phú Nhuận, ban raya HCM lac sa dalam dom urang hu rai duik kan kandah hu muk dong bruk ngak, brei jien piah pasiam veik sang danaok: “Meng hu anai  Basiroh dong ka maik nek hulin hu rai duik tani tanat…”

Dahlau di tuk tabiak pablei salih, amuk Basiroh hu jaik 10 thun pato bac sap Cam dalam sang megik Islam di TPHCM. Ong Haji Mach Dares Samael, Quyền Trưởng Ban Đại diện Cộng đồng Hồi giáo TPHCM ndom ka amuk Basiroh yau ini:“Haji Basiroh lac urang kumei hu angan je, ngak rilo bruk pahla daong ka rahra…”

Muk Basiroh oh lac pablei salih naih joi, muk dok hu bhap bini  Cam di ban raya HCM thau tal kayua hatai siam daong ka urang kan kathaot./.