Phòng tranh – bilik rup cih di Thạc sĩ, hoạ sĩ Chế Kim Trung daok di labik 344, jalan Ngô Gia Tự dalam khu phố 1, phường Tấn Tài, ban Phan Rang- Tháp Chàm, hu jaik 600 blah rup cih, haong 31 giải thưởng praong, hu angan je. Dom drap ar praong nan hu ngak meng 2 plak tangin naih gheih di 1 urang umei hoạ sĩ khut sa gah meta. Thạc sĩ, Hoạ sĩ Chế Kim Trung khan lac: "Dahlak oh patuah, tuk 3 thun, sa gah meta di dahlak nyu khut hadei di sa bala. Pandik harao lo, min kham merat yam tapa. Dahlak anit nghệ thuật, ranam rup cih, anit ranam ilamu Cam, nyu pachreih ba drei sáng tác meng di tuk daok sit".

Chế Kim Trung lac sa thạc sĩ, sa urang kumei hoạ sĩ dane angan di urang Cam Sa-ai lac urang kumei hoạ sĩ Cam camereip abih saong tal harei ini jeng oh ka hu urang ka 2. Takik hu thei yau Chế Kim Trung, yaom lac bac tamat blaoh sang bac sư phạm saong ngak gru pato tui hatai caong di sang, min sa-ai jeng daok biak takre bruk hội hoạ.

 Thun umo 30, tuk anek likei ka 2 bahrau hu 10 bilan, sa-ai tut angan pakacah tame sang bac ĐH Mỹ thuật ban raya HCM piah pabak hatai caong ngak hoạ sĩ. Hadei di 5 thun bac Đại học haong blah bằng thủ khoa, sa-ai caik tabiak 2 thun piah mek hu bằng Thạc sĩ pakat dunya ilamu meta maong di sang bac Đại học Mahasarakham -negar Thái Lan. Hoạ sĩ Chế Kim Trung lac: “Meng bac megru tui Wa “bac, bac veik, bac miat”, oh huac kan kandah hagait, kayau dalam sáng tác di drei meyah drei oh patagok hu tal ilamu bahrau di dom taneh ia châu Âu châu Á ye drei oh paglaong hu yaom nghệ thuật di kadha”

Chế Kim Trung ba drei tame hội hoạ oh lac piah pabak hatai takre, bo sa-ai daok caong khin tapa nan, khik ramik, pok paglaong tagok saong yaih khan dom yaom glaong ilamu meng kan di bangsa drei. Kayua sa-ai anit ilamu, ranam rija roya bangsa Cam haong dom baoh bimaong kalan yaok klak, dom ragu tamia bhap bini Cam… Blaoh meng hatai anit nan, nyu pambuak seok, nyu raong ba hatai ranam bruk cih vak, hội họa di sa-ai.

Langiu di hội hoạ, Chế Kim Trung daok hu hatai anit praong ka lan am Cam, suh sah, sahneng duah jalan ba lan am Cam meng labik daok mbuan si lahik nao, mai veik njauk labik hadah krah dane angan di nyu.

Meng dom pandap lan am Cam biak takik janih, labaih 10 thun tapa, sa-ai kham merat roh duah, ngak tabiak yaok rabau mẫu mã bahrau biak gheih, biak mekre, hu tuai dalam taneh ia saong langiu negar biak takre. Yaom glaong meng lan am Cam mỹ nghệ ba mai hu daong ka raidiuk bhap bini palei lan am hu tani tanat, piah mboh hadah mbaok meta jang, kak kajap saong ba lan am Cam dak harei dak tagok glaong, par tabiak dunya. Amuk Đàng Thị Minh Trọng – Po labik ngak lan am mỹ nghệ Hải Âu, ban sit Phước Dân, huyện Ninh Phước lac: “Tuk camereip drei ngak dom janih lan sit sot yau ye gaok glah pablei hu takik jien, urak ini ngak lan mỹ nghệ hu rilo jien jang nan ye raidiuk bhap bini di palei Bàu Trúc ini hu tani tanat jang. Dahlak lac menuac di palei lan am, dahlak biak caong khin palei ngak lan dak harei dak tagok jang                 

Bruk daok caong khin praong abih di hoạ sĩ Chế Kim Trung lac patoa veik ka anek kamuan, ka rai hadei hatai anit ranam lan am Cam piah ka dom adei thau khik ramik saong cakrok patagok. “Dahlak tuk halei jeng suh sah lac ngak habar ka palei lan am di drei dak harei dak siam tagok saong khik hu ilamu palei ngak lan di drei. Dahlak kham merat abih drei, sahneng duah bahrau piah ka mikva dak harei dak cakrok saong patoa veik ka anek kamuan di drei khik ramik, patagok yaom hadah krah di lan am Cam “

Langiu di bruk sáng tác, hoạ sĩ Chế Kim Trung jeng daok pato bac di Pasak pato megru thường xuyên – hướng nghiệp tỉnh Ninh Thuận. Harei harei, sa-ai pabak hatai takre, raong ba ilamu nghệ thuật ka rairah dam dara, urang ranaih umo thun. Kayua khik ramik yaom glaong ilamu di bangsa, lac trách nhiệm, lac bruk caik ka abih bhap bini, abih di nyu nan lac rairah harei hadei ./.