Bruk menyim di urang Cam jeng yau bruk menyim khan bai di urang Cam palei Phũm Xoài, xã Châu Phong, ban sit Tân Châu, tỉnh An Giang hu meng lavik mai saong cak rok patagok khang kadang mbiah tal harei ini. Tui dom urang umo taha di labik ini, bruk menyim patagok meng dom thun akok abap XIX. Dahlau daih, meda lac dalam sang urang Cam halei jeng hu takik di nyu sa janeng menyim saong bruk menyim hu jeng bruk ngak di yaok urang kumei Cam tuk halei jeng oh thau. Tuk umo meng 10 - 12 thun, anek kumei Cam hu tacei pato bruk menyim. Tukvak cakrok di abih, labik ini, hu tal yaok rituh baoh sang menyim khan bai. Urak ini, daok veik tok sa labik menyim khan bai di ong Mohamad. Ong Mohamad hu jaik 50 thun kak kajap haong bruk menyim khan bai Cam, urak ini lac Po labik menyim khan bai Cam meng kan, xã Châu Phong, ban sit Tân Châu khan lac:“Bruk menyim khan bai di urang Cam  mbiah tal rai dahlak lac rai ka klau, hu patua veik meng rai ong, muk caik rai amaik ame, blaoh tal rai dahlak daok patagok pambak praong, meng bruk pambuak dom tour dulich ba tuai mai rivang saong iek menyim khan bai”.  

Dom pandap khan bai di urang Cam bhian hu mboh dalam raidiuk yaok harei di anek manuac labik ini yau khan ao di urang kumei hu khan, ao, hu siuk, khan me-om; khan xa-rong di urang likei…hu rilo sambo mau, bingula karei di gauk yau: riyak, taginum, thaot o pak meta, jalan sọc, gom menyek, bingu dau…Dom blah khan bai di mikva Chau Phong ndung bak ilamu mbak carak di bangsa Cam, gam laman lamuac, gam mekre meta, gam brei mboh bruk gheih tangin menyim meng sraw tagok sambo mau, ilamu menyim, pok bingu la…Sa-ai Sales- Akok palei Phũm Xoài, xã Châu Phong, ban sit Tân Châu brei thau: “Dalam dom thun jaik ini, Palei menyim khan bai tapa dom kong ty ba tuai mai rivang iek, jeng yau Karja  yaih khan  pandap di drei hu paglong jang, urang thau tal saong urang blei rilo jang. Tuk hu taduan angan Inem krung ilamu phi vat the ye ini lac biak bui sambai hadah mbaok meta ngan haong mikva bangsa Cam, caong khin palei ngak ini meda cak rok potagok praong jang, piah mikva hu raidiuk trei sir jang dahlau”. 

Meng hu menyim meng tangin, meng dom merai tơ nyom meng dom asar hu di alam dunya ngak jeng sambo mau di khan bai tuk halei jeng hadah mekre, khik hu sambo mau suai lavik, oh meluk haong dom khan bai ngak meng merai tơ di rilo palei  karei.

Tuk mai tal labik menyim khan bai Cam di ong Mohamad, tuai mboh hu dom siam gheih meng kan  saong samar birau, gam haong bruk rap ar tuai damuai di mikva urang Cam. Jeng di labik ini, tuai hu rivang iek duah thau bruk menyim khan bai meng kan, hu jeng dom urang bangsa Cam tuk cuk tagok rup blah khan  ao meng kan di mikva. Langiu di nan, daok hu dom pandap yau kon tangin, talei takoi, parik tangi, phen, kadung teik…jeng hu mikva urang Cam labik ini ngak biak gheih, biak mekre.  

Urak ini, meng hu kong nghe birau nan ye bruk ngak tabiak khan bai hu mbuan lagaih, samar  jang, ong Mohamad daok khik bruk menyim meng kan yau sa bruk khik iek dom ilamu di urang Cam, yaom lac khan bai palei yaom glong jang khan bai menyim meng mac. Ong Nguyễn Văn To, Pho Akok UBND xã Châu Phong, ban sit Tân Châu daok brei thau lac: “ Palei menyim khan bai di bhap bini Cam hu meng lavik rai mai, ngak jeng ilamu siam gheih, karei di bhap bini bangsa, dalam tukvak tapa, hu bruk sangka di urang jakar ngak praong dom pakat hu daong ka palei ngak jeng yau labik menyim di ong Mohamad piah khik bruk ngak, cakrok patagok, pabak prein khang piah dui pachreih tuai mai rivang ma-in. Gam haong nan, labik di sa-ai Mohamad ini jeng lac labik pasak piah patagok dulich dalam tukvak anak tal, piah  ngak brei cak rok patagok  dulich jit vu, jeng yau khik ramik palei ngak ini dalam tukvak anak tal hu siam jang”.

Harei 06/03/2023, Mentri Ilamu, The thao saong Dulich patabiak Sarak  480 ka bruk brei ba tame angan Inem krung phi vat the pakat negar, tui nan bruk menyim khan bai di urang Cam xã  Châu Phong, ban sit Tân Châu, tỉnh An Giang hu pok brei angan lac inem krung ilamu oh mboh di meta pakat negar. Ini lac bruk hadah mbaoh meta di bhap bini Cam di tỉnh An Giang. Ong Mohamad - Po labik menyim khan bai meng kan di  xã Châu Phong, ban sit Tân Châu khan lac: “ Tuk hu pok brei angan blaoh, khol dahlak  sahaneng brei yaih khan praong tabiak ralo jang dom pandap khan bai menyim di urang Cam daok di tỉnh An Giang di drei, eng dahlak  mboh lac njauk sahaneng atau ba abih prein yawa duah thau sahaneng  ngak brei hu rilo mau ma gheih jnag, piah yaih khan ka dom tuai damuai anak tal”.

Tapa hadom tuk trun tagok, bruk menyim khan bai Cam meng kan hu daong ka dom urang abih hatai jai, kham merat khik veik bruk ngak hu lagaih piah patagok, paglong  jien mek tame saong tuk bruk menyim khan bai di urang Cam  xã Châu Phong, ban sit Tân Châu, tỉnh An Giang hu pok angan inem krung ilamu oh mboh di meta pakat negar meda lac hu lagaih piah bruk ngak meng kan ini daok hu khik ramik, patagok yau dahlau daih, rik daong khik ramik, patagok ilamu siam gheih di bhap bini bangsa Cam Châu Phong, ban sit Tân Châu./.