Taphia bruk bui sambai praong, bruk taduan raok angan je ini jeng caik tabiak trách nhiệm oh sit nan lac ngak habar piah khik ramik saong patagok yaom inem krung, khik hu bruk ngak meng kan saong patagok jien mek tame meng bruk ngak du lịch pambak tame inem krung. Kadha vak di Đoàn Sĩ – Urang vak di rayo sap ndom VN daok di TP.HCM hu khan brei thau ka bruk nna di palei Hamu Traok tỉnh Ninh Thuận:

Thun ini yam tapa umo 70, Nghệ nhân Trượng Thị Gạch daok di palei Hamu Traok jeng daok kak kajap haong bruk ngak di ong akaok ong kei. Kadha bo amuk Gạch sangka di abih nan lac bruk pato ilamu ngak lan ka anek taco di drei: "Caong khin anek taco drei nyu ranam bruk ngak meng kan ini, nyu bac megru piah ngak hu bruk ini. Drei kham merat tacei pato gilac ka anek taco di drei. Ngak habar njauk khik hu bruk ngak meng kan di ong amuk drei caik veik, amaik pato veik ka drei, drei pato veik ka anek taco drei, yau nan pato veik miat miat".

Palei ngak lan Hamu Traok hu daok tal harei ini nan kayua hu bruk khik ramik ilamu ngak lan di dom urang dalam sang, meng rai ini tapa rai diah. Kadha biak karei di lan am Cam nan lac oh pandar kapal pa-yeng piah ngak jeng bingu la bo hu ngak meng palak tangin gheih ghang di  urang ngak piah bluh suan yava tame taneh. Ini lac kadha biak karei brei mboh bruk tari tareng di urang kamei Cam. Dom bingu hala meng kan yau jalan tagei cagaik hình xoắn, bingu la di phun kayau... hu ngak jeng meng kanduh  sò saong dom janih pandap panda hu pandar dalam ngak mbang, ngak huak yaok harei di mikva.

Meng janih biak karei nan, thun 2017, Mentri Ilamo – Padhih saong rivang ma-in hu pok ilamu ngak lan meng kan di urang Cam tame dalam talei angan inem krung ilamo oh mboh di meta pakat negar. Bahrau di abih, harei 29/11/2022, ilamu ngak lan di urang Cam hu UNESCO pok angan lac inem krung ilamo oh mboh di meta njauk pacang khik samar drah. Urak ini, palei ngak lan Hamu Craok daok pataom tame patagok bruk du lịch, rivang ma-in bhap bani pambak tame inem krung ilamo oh mboh di meta, gam daong ngak ka rai diuk di bhap bani hu tani tanat, gam khik ramik ilamo hadah krah di urang Cam labik ini.

Dalam nan, danak dak cak rok patagok bruk rivang ma-in bhap bani  pambak tame inem krung di palei ngak lan Hamu Craok kayua Hội đồng Anh daong jien peih ngak iek di thun thun 2018 saong hu ba mai jak jeng ka palei ngak lan Hamu Craok. Kapul nyaom, manuac urang mai rivang iek palei ngak lan dak harei dak rilo jang, ba mai kein laba hu mboh di anak meta.

Ong Đàng Chí Quyết, Bí thư Chi bộ gam ngak Akaok Mban Khik iek khu phố Bàu Trúc, ban sit Phước Dân, huyện Ninh Phước, tỉnh Ninh Thuận brei thau, piah palaghaih ka mikva ngak bruk du lịch, Mban du lịch bhap bani di palei ngak lan Hamu Craok hu padang tagok, dalam nan hu 15 urang.

 "Hu dom nyaom yau: Nyaom ngak pandap mbang huak, nyaom ngak lan, nyaom daoh tamia, nyaom duah thau ka ilamo Cam (Halau janeng) daok dalam mBan du lịch bhap bani meng thun 2018 tal ini. Oh lac tok ngak di palei, bo dom nyaom ini daok hu nao ngak di ban Phan Rang – Tháp Chàm tuk tuai damuai caong khin".

 Amuk Đàng Sinh Ái Chi, Phaok Akaok UBND ban sit Phước Dân, huyện Ninh Phước, tỉnh Ninh Thuận daok brei thau lac, palei daok pataom tame padang bhum nguyên liệu, pato pakai urang ngak lan saong menuac ngak du lịch.  

" Bruk pambuak haong du lịch di ini hu rilo jalan ngak, sarak yau peih bruk pathram ka dom adei di palei ngak lan ini thau jalan ngak du lịch. Gam haong nan lac dom danak dak pato pakai ka thuyết minh, urang tacei jalan rivang ma-in, meyaih khan pandap panda palei ngak. Urak ini, tuai damuai mai rivang iek di palei ngak dak harei dak rilo, dalam nan hu palei ngak lan".

Pren dui pachreih di lan am Cam ngan haong tuai damuai atah jaik tukvak tapa brei mboh kadha bui sambai meng bruk pambuak rivang ma-in haong dom palei ngak meng kan. Bruk hu jeng “Inem krung ilamo oh mboh di meta njauk pacang khik samar drah ", hu UNESCO pok brei angan, meda peih tabiak jalan ka bruk khik ramik saong patagok yaom glaong inem krung meng kan di bangsa Cam./.