Urang paneh, urang daoh Hán Văn Trà ndih tapui thun 1993, lac anek di palei Cam Palao, xã Phước Ninh, huyện Thuận Nam, tỉnh Ninh Thuận. Meng tuk daok sit, sa-ai Hán Văn Trà hu pang saong njom tame dalam ralow darah dom kadha daoh ru di amaik saong mboh biak takre, pambuak saong alat ragam Cam. Bruk paneh saong daoh, yaom lac oh hu bac megru gah ragam ragu di sang bac yau urang, min Hán Văn Trà tuk halei jeng kham merat, pasram patia, bac megru di dom urang paneh, urang daoh nao dahlau, meng nan duah tabiak jalan paneh kadha daoh gheih karei di drei. Yaom lac daok ranaih umo, min sa-ai hu panehtabiak rilo kadha daoh hu urang takre pang.

Tapa dom kadha daoh ndung bak ragu daoh bhap bini Cam di sa-ai Trà rilo urang pang mbuan thau hu hatai anit ranam ilamo bangsa. Kayua yau nan ye, dom kadha daoh bo sa-ai paneh tabiak hu palih ruah ba tame daoh di dom harei Kate, Ramưwan, dom bruk daoh tamia di urang Cam dalam saong langiu tỉnh.

Langiu dom kadha daoh ka rija, roya, ka bruk meyut meyau, ka hatung hatian di dom urang anek nao ngak mbang atah palei,… rapaneh Hán Văn Trà daok hu paneh tabiak dom kadha daoh ka dom bimaong kalan Cam yao klak ribau thun, urak ini jeng daok dang kajap anak pandiak, ngin di bhum taneh Paduraga.