Di thun 2020, Ninh Thuận hu 2 kaya pandap negar dalam inem krung ilamu Cam hu pok angan lac điêu khắc Mukhalinga - yoni Pô Romê pok kakuh dalam bimaong Pô Romê di palei Hậu Sanh, xã Phước Hữu, huyện Ninh Phước. Kaya pandap negar ka 2, lac bia ký Hoà Lai hu meng abap ka 9. Urak ini, bia ký Hoà Lai daok hu khik ramik saong parang iek, duh ka tuai mai ravang iek di Miuyim tỉnh Ninh Thuận.

Kaya pandap negar Mukhalinga - yoni Pô Klong Garai hu ngak meng patau sa thạch, hu mbaok Yoni, gai Linga hu mbaok Po yang hu urang Cam kakuh dalam bimaong Pô Klong Garai di phường Đô Vinh, ban Phan Rang – Tháp Chàm. Sa-ai Bá Văn Quyết, palei Hậu Sanh, xã Phước Hữu, huyện Ninh Phước lac: " Mukhalinga - yoni Pô Klong Garai hu vaktu ugama 16 -17 nyu hu biak rilo gheih ghang..."

Kaya pandap Negar bia Phước Thiện hu duah mboh thun 1992 di palei Phước Thiện, xã Phước Sơn, huyện Ninh Phước. Angaok dua mbaok blah bia hu sarak akhar Cam klak, tui asal kadha di akhar sarak, dom urang ilamu mboh lac bia Phước Thiện hu meng puac abap ka 8. Urak ini bia Phước Thiện daok hu khik piah, parang iek duh ka tuai mai ravang iek di Miuyim tỉnh Ninh Thuận. 

Ong Thành Nhảy, Phaok Yam ndok Miuyim Ninh Thuận brei thau: abih dua janih tượng thờ Mukhalinga - yoni Pô Klong Garai saong bia ký Phước Thiện bahrau hu Thủ tướng Rajaei pok brei angan lac kaya pandap negar jeng hu parang iek saong khik piah di Miuyim Ninh Thuận piah duh ka tuai ravang iek.

Meng 4 kaya pandap negar di inem krung ilamu Cam hu pok brei angan, gam haong dom inem mek pakat negar saong dom inem krung ilamu phi vật thể taneh ia, ini lac bruk piah ka Ninh Thuận dui pachreih urang buh jien tame ngak mbang, cakrok bruk du lịch bhap bini, duah thau inem krung ilamu Cam./.