Nan lac sap di tal bac akhar Cam di palei Lạc Trị, xã Phú Lạc, huyện Tuy Phong, tỉnh Bình Thuận. Tal bac peih pato di Sang pataom bhap bini di palei Lạc Trị, hu 20 urang tame bac, urang praong thun abih umo jaik 60 saong sit abih jaik 30 thun. Tal bac hu peih tabiak pato di harei 21/10/ 2022 saong meng nan tal harei ini daok hu peih yaok adit 3 var di dom melam som, melam but saong melam suk.
Sa-ai Qua Đình Nhất Hạnh (lac gru pato), yaom lac tavak bruk pato luac harei, min melam mai, sa-ai rami ramik bruk hit dalam sang piah hu mbaok di tal bac akhar Cam. Sa-ai Hạnh brei thau, drei anek Cam bo oh thau akhar Cam lac duisa hong muk kei bangsa drei.
Ong Qua Đình Lang, urang pato akhar Cam di palei Lạc Trị brei thau, meng harei tal bac hu peih tabiak, dom urang bac thei jeng chreih chrai nao bac piah thau.
Dahlau di nan, tal bac akhar Cam jeng hu peih pato di Sang agama Balamon di urang Cam xã Phan Hiệp, huyện Bắc Bình. Pak ini, hu peih pato blaoh 3 mbang bac pachreih hu jaik 70 urang tame bac. Tukvak sa khoa bac lac 3 bilan saong jaik di abih lac tal bac paglong birau tamat di puac bilan 10 thun 2022.
Sa-ai Đặng Ngọc Vỹ, daok di palei Bình Hiếu, xã Phan Hiệp, huyện Bắc Bình brei thau, lac urang Cam, min sa-ai oh thau akhar Cam meng sit mai, nan ye tuk thau hu tal bac akhar Cam, sa-ai tut angan tame bac. Biak lagaih lac tal bac tuk melam, ini lac tuk lahei. Tapa tal bac nan, urak ini sa-ai Vỹ thau bac, thau vak akhar Cam.
Sa-ai Vỹ daok brei thau, ini lac bruk bui sambai saong hadah mbaok meta ka panuac ndem, akhar vak di bangsa drei.:005
Oh lac urang Cam daok di xã Phan Hiệp bo tal bac daok pachreih hu urang Cam daok di xã Phan Thanh, Phan Hoà. Meng 40 tiet bac yaok khoa, dom urang hu bac tui dom kadha yau: Sakawi Cam; angan je dom pakat dalam sang saong but pajaih; palei Cam di Bình Thuan; dom labik inem krung bimon Cam saong bhum palei negar.
Gru Lâm Quốc Thanh, sa urang Cam ngak gru pato min padeih hưu mai pato akhar Cam di Sang agama Balamon brei thau, mai haong tal bac ini, gru caong khin patoa veik taong abih dom ilamu ka akhar Cam bo drei thau ka urang bac. Meng nan, daong dom ayut meda bac hu, vak hu akhar Cam biak cambaic laic, gam hong nan daong ka urang bac hu thau cambaic jang ka yaom ilamu meng kan di bangsa drei.
Gam haong dom tal bac kayua dom urang ilamu Cam dang tabiak peih ngak, tukvak tapa, gah pato megru tỉnh Bình Thuan hu ba akhar Cam tame danak dak pato ka anek saih bac pakat tieu hoc, labik hu rilo anek saih Cam.
Ong Nguyễn Minh Tân, Akok Mban Bangsa tỉnh Bình Thuận brei thau, kuhria rah tapa yaok thun bac, hu labaih 8.500 anek saih Cam pakat bac tieu hoc. “Bruk pato akhar Cam urak ini daok pato di 12 sang bac ngan haong 129 tal bac di 3 huyen: Bắc Bình, Tuy Phong saong Hàm Thuận Bắc”.
Yau nan min, bruk pato pakai danak dak sap Cam di dom sang bac tieu hoc gaok biak rilo kan kandah. Langiu di bruk kurang gru pato hu tanut chuan, ye tapuk piah pato saong bac akhar Cam oh pabak sumu.
Piah pasiam dom bruk daok kurang nan, harei 27/01/2022, Rajaei tabiak sarak 142 ka Danak dak “ Paglong asar pato bac dom mon sap bangsa takik dalam danak dak pato megru vaktu 2021 -2030”. Bruk pamong tal di Danak dak brei parabha dua vaktu: Vaktu kasa meng thun 2021 tal thun 2025, vaktu ka 2 meng thun 2026 tal thun 2030. Tui nan tal thun 2025, brei ngak salah tapuk bac, tai lieu pato bac ka pakat tieu hoc ngan haong 8 sap bangsa takik, dalam nan hu sap Cam.
Gru Kinh Duy Trịnh, dahlau diah ngak gru pato di Sang bac tiểu học Lạc Trị, xã Phú Lạc, huyện Tuy Phong, tỉnh Bình Thuận, sa dalam dom urang akaok meti pato akhar Cam brei thau, mikva Cam biak chreih chrai anak bruk nan brei mboh “ jalan ngak di Đảng, njuak hatai bhap bini”.
Urak ini, lac Chủ biên tapuk akhar Cam, gru Trịnh haong 4 urang karei daok harei melam vak, ngak. Gru Trịnh daok brei thau lac.
Khik ramik panuac ndem, akhar vak di bangsa Cam, oh lac padeih di bruk peih tal pato bac akhar Cam hu bruk biak sangka di dom sang bac tieu hoc di bhum palei hu rilo urang Cam daok, bo yaok puk, yaok palei, mikva Cam njauk jak gauk ba tangin tame khik ramik.
Viết bình luận