Dalam tỉnh Thừa Thiên Huế urak ini hu 44 inem mek pambuak tal ilamu Campa, dalam nan hu 17 bimon, kalan; 3 thành lũy saong rilo kubo, bia giếng klaak meng kan. Klau labik hu brei angan lac inem mek pakat negar, lac: Tháp đôi Liễu Cốc; bimon Phú Diên saong Thành Lồi.

Tỉnh Thừa Thiên Huế jeng hu 251 pandap Campa hu yaok pataom, ngak harak gar hồ sơ khoa học, dalam nan hu sa Bảo vật pakat negar. Jaik abih dom inem mek Campa di dalam tỉnh kayua tukvak biak lavik, langik tasik kan kandah saong mesruh metak palai pajoa daok jeng labik klaak saoh. Dom pandap urak ini daok di rilo labik, dalam taneh ia saong jeng hu di negar langiu, ta-eng dalam tỉnh jeng kayua rilo kapul nyaom, rilo jabat khik, piah. Kayua yau nan ye, njauk pataom mai veik sa labik, hu jalan piah khik ramik saong ba tabiak parang iek, duh ka tuai ravang iek. Ong Phan Tiến Dũng, Chủ tịch Hội Khoa học Lịch sử tỉnh Thừa Thiên Huế mboh lac: “Piah khik ramik ilamu Campa, tui dahlak, dahlau di abih brei ieu pataom phun jien, dom prein khang piah khik ramik dom yaom glaong di dom danak dak. Kayua tapa yaok rabau thun, urak ini tok daok veik dom inem mek saong dom phế tích. Nan lac bruk bo kol drei njauk caik hatai sangka”.

Thừa Thiên Huế bhian lac sa bhum taneh daok dalam taneh ia Campa di abap ka II tal akaok abap XIV. Inem krung ilamu Campa lac sa tal pataom veik ilamu saong lac sa dalam dom kadha hu labik dang biak praong dalam bruk ngak jeng ilamu Huế. Tui urang roh duah ilamu Huế Nguyễn Xuân Hoa, ilamu Campa di Thừa Thiên Huế karei jang dom labik karei, kayua bhum taneh Thuận Hóa meng kan, tỉnh Thừa Thiên Huế saong Quảng Trị harei ini lac pandap bo patao Campa Chế Mân alin hadiah nhà Trần piah lakhah Công chúa Huyền Trân.

Nao gam haong taneh, urang Cam daok pak nan hu daok veik haong urang Việt bahrau mai daok, ba tal bruk daok haong gauk di urang Việt haong urang Cam, blaoh hu bruk lakhah caga di urang Việt haong urang Cam, urang Cam haong urang Việt, ngak jeng bruk lai tame gauk gah ilamu. Thừa Thiên Huế oh lac bruk daok veik di rilo janih gah inem mek, inem krung di ilamu Campa bo rilo ilamu phi vật thể yau hatai jia tapa dom adat cambat tanarakun, mbang huak, sap ndom panuac puac, bruk ngak mbang… jeng hu urang Huế taduan mek saong patagok lagaih haong ilamu mbiah tal harei ini. Urang roh duah Nguyễn Xuân Hoa lac:  “Njauk lac tal tuk Huế brei padang Miuyim ilamu Campa di Huế, min lac miuyim ilamu Campa hu gam dom pandap yau ye rup patau, dom linga, dom Yoni, bo daok hu gam phi vật thể atau dom rilo ilamu karei.”

Dom thun tapa, gah ilamu saong dom puk palei hu taong yaom, yaok pataom dom inem mek ka ilamu Campa di dalam tỉnh, brei số hóa dom pandap, duah pataom dom yaom ilamu phi vật thể pambuak tal. Gah ilamu jeng hu ba tabiak đề tài ka yaok pataom saong padang bản đồ dom inem mek Campa di Thừa Thiên Huế. Ini lac cơ sở dữ liệu nền piah meda yam tal ba tame hệ thống dữ liệu di tỉnh saong di taneh ia, piah ba pandar saong patagok hu kein laba di inem mek.

  Ilamu Campa di Thừa Thiên Huế lac sa kadha praong ngak jeng ilamu bangsa Việt. Bruk khik ramik saong patagok dom inem mek saong pandap panda meda ngak brei kaya meda jang gilang ilamu taneh ia, saong tapa nan, daong paglaong bruk thau tal ilamu di bhap bini, ngak jeng dom labik dui pachreih tuai damuai tuk mai tal bhum taneh Thừa Thiên Huế./.