Dom harei bilan 5, langik pandiak yau apui, dalam labik sit giniuk di Sang Ilamo palei Lâm Giang (Yang Mau), xã Hàm Trí, huyện Hàm Thuận Bắc, tỉnh Bình Thuận jeng daok yava tagok sap Ghi-năng meng tal pato alat ragam meng kan di urang Cam kayua Muyim tỉnh Bình Thuận peih tabiak.

Dom urang bac nan lac anek kamuan urang Cam daok di palei Yang Mau umo daok ranaih min biak takre sap Ghi-năng. Yaok mbang megei trun tagok di palak tangin hu ngak tabiak jeng dom sap yava karei di gauk.

Mã Văn Hon lac  urang bac sit abih (umo 14 thun) dalam tal bac Ghi - năng bui sambai khan lac, yaok thun tuk palei peih ngak Rija Negar ye hu mehit veik sap Ghi-năng. “Adei biak caong hu bac taong Ghi-năng, piah pabak ka dom harei rija, roya dalam puk palei…”

Daok urang bac angan Đặng Xuân Tình brei thau, yaom lac biak jan van haong bruk ngak mbang, min kayua takre alat ragam meng kan, nan ye sa-ai rami ramik bruk ngak hu mbaok tame tal bac: “Di pak pak sang dalam tuk ngak yang, dom cei, dom wa bhian taong Ghi-năng, yuk kadet Saranai,..”

Taphia dom urang bac lac dom nghệ nhân umo mangaok 70 thun jeng daok abih hatai tacei pato. Meng rilo sap yava glaong biar karei di gauk, dom alat ragam hu ngak jeng bản hoà tấu chreih chai, brei mboh bruk anit ranam rai diuk saong hatai gul pataom di bhap bani Cam tapa rilo rai rah.

Ong Mã Châu Sa, daok di xã Hàm Trí, huyện Hàm Thuận Bắc, tỉnh Bình Thuận, lac sa dalam dom urang dang pato alat ragam meng kan di urang Cam di tal bac ini brei thau: “lac urang dang pato, dahlak biak mboh hadah mbaok mata…”

Daok Nghệ nhân Ưu tú Lâm Tấn Bình, daok di xã Phan Hiệp, huyện Bắc Bình, tỉnh Bình Thuận, jeng lac urang dang pato alat ragam Cam brei thau, dahlau diah abih sa thun meng pato hu abih 72 ragu Ghi-năng piah duh ka dom bruk ngak dat cambat meng kan di urang Cam:“Tapa 20 harei peih tal pato alak ragam meng kan di urang Cam pak palei Lâm Giang ini…”

Ini lac tal bac akaok mereip dalam 6 tal kayua Muyim tỉnh Bình Thuận peih tabiak, daok dalam Danak dak bruk ngak negar cak rok patagok kinh tế - xã hội bhum urang bangsa takik thun 2024 di tỉnh Bình Thuận. Hu mbaok tame tal bac, meng harei 19/4 tal harei 10/5, 21 urang bac nek kamuan urang Cam hu dom nghệ nhân tacei pato, pathram ma-in piah ma-in hu 15 dalam 72 ragu Ghi-nang saong 9/9 ragam Saranai. 

Bruk tacei pato jalan pandar dom janih alat ragam meng kan di urang Cam lac oh mbuan, urang bac brei hu năng khiếu âm nhạc saong hu hatai takre. Bruk ngak ini piah pasiam veik, khik ramik saong cak rok patagok dom yaom ilamo meng kan siam mekre di bhap bani urang bangsa takik, plaih lahik nao, duh ka rai diuk, ka bruk mbang angui di bhap bani saong rik daong tame cak rok patagok bruk rivang ma-in.

Langiu di bruk pathram, megru, dom urang bac daok hu nao duah thau tapa, saong hu taom gaok, ndom biai nao mai haong dom nghệ nhân alat ragam Cam di labik inem mek bimon Pô Klaong Garai di tỉnh Ninh Thuận.

Ong Mã Ngọc Thuần, halaw janeng Cam Awar, daok di xã Hàm Trí, huyện Hàm Thuận Bắc, tỉnh Bình Thuận hu mbaok di van tamat tal bac alat ragam meng kan di urang Cam pak palei Yang Mau bui sambai brei thau, ini lac jalan piah ka alat ragam meng kan di urang Cam hu dom nghệ nhân ranaih patui khik patui ma-in, duh ka bruk ngak adat cambat, bruk ngak ilamo: “Miuyim tinh mai pak ini peih tal pato piah ka anek kamuan urang Cam pak ini tui bac…”

Bình Thuận lac sa dalam 2 tỉnh hu rilo urang Cam daok, haong labaih 42.000 menuac.. Urang Cam daok pataom gauk di 4 xã harat, nan lac: Phan Thanh, Phan Hoà, Phan Hiệp, Phú Lạc saong 9 palei daok pablak gauk gauk dalam 6 huyện, lac: Tuy Phong, Bắc Bình, Hàm Thuận Bắc, Hàm Thuận Nam, Hàm Tân saong Tánh Linh. Urang Cam di labik ini daok khik hu rilo rija roya meng kan,  haong rilo adat cambat brei hu dom alat ragam meng kan di urang Cam.