Patagok bruk ngak mbang kinh tế di palei Cam tuk halei jeng lac bruk kan ngan saong urang jakar xã Suối Dây, huyện Tân Châu, tỉnh Tây Ninh tuk mikva rilo meng raong, pala sit sot saong ngak pah, baoh sang kathaot tuk halei jeng daok di tanut glaong. Meng hatai kham merat ngak brei salih bahrau mbaok meta palei pala, pagam pambak tame taneh rilo siam lagaih haong rilo janih phun pala, urang jakar haong rahra labik ini hu peih bruk salih janih phun pala, athur raong, pambuak haong bruk patagok KTXH khang kajap.

Labaih pluh thun dahlau, sang ong Chàm Him tok ngak padai, pala bei, pala tabau, jien mek tame takik saong oh tani tanat. Tuk kapul urang ngak nong xã Suối Dây khan brei thau bruk pala phun cao su, tapa tổ tiết kiệm ong mesraiy 30 triệu đồng phun jien yaom laba lap di Gilang pariak sarak karja . Meng yaom jien ini, ong Chàm Him blei phun pajaih cao su pala di mangaok taneh praong 3ha di sang drei. Meng sangka glang iek njauk jalan, kuah mek katak njauk ilamu kỹ thuật, nan ye bein cao su tamuh siam. Meng 3ha cao su tuk camereip, 5 thun hadei ong blei taneh peih praong bruk pala cao su, pambuak haong pala bei plom. Ong Chàm Him chreih chrai khan lac, urak ini 5ha cao su saong bei plom hu ba jien tame tani tanat: “Dahlau daih ngak sa janih padai ye sang kan kandah, meng tuk pala cao su saong bei ye sang hulin hu tagok”.

Mboh lac taneh riya di palei Cam lagaih piah raong pabe saong drei pabe jeng lagaih haong sang raong sit sot, Kapul urang ngak nong xã Suối Dây hu jak ba saong daong ka mikva mesraiy phun jien piah raong haong yaom jien 30 triệu đồng sa baoh sang. Tapon pabe di palei Chăm samar tagok rilo, tuk tabung glaong dalam palei hu jaik 1.000 drei.

Sang sa-ai Sực Ka Ri Gia lac sang raong pabe hu di abih dalam palei. Thun 2019, mboh rilo sang raong pabe hu jien tame, sa-ai duah thau blaoh ngak tui. Kayua hu takik phun jien, bo daok kurang ilamu, nan ye tuk camereip sa-ai tok raong 5 drei pabe binai. Hadei di meteh thun raong, sa-ai khang hatai nao mesraiy jien di gilang pariak, blei rilo pabe pajaih, padang ngak var ro, blei taneh pala hareik saong radaih ô tô sit piah pajeng pandap mbang. Hu tuk tapon pabe di sang sa-ai tagok tal 200 drei, dalam nan hu pabe palimek saong pabe binai piah ndih tapui, yaok thun jien mek tame hu jaik sa rituh triệu đồng. Urak ini sang sa-ai hu labaih jien ndo, hu jien raong 2 urang anek nao mbang bac:“Dahlau daih tuk oh ka raong pabe ye sang daok kan kandah……”.

Duk haong yaok pluh thun dahlau, raidiuk di rahra palei Cam ini hu salih bahrau khang. Ong Hà Huy Châu, Phaok akaok UB bhap bini xã Suối Dây, huyện Tân Châu brei thau, meng dom danak dak yau padang ngak palei pala bahrau, danak dak 134, 135 hu ngak brei salih karei tuk taong abih jalan di palei Cam hu tuh bê tông saong hu điện truac hadah, taong abih dom baoh sang bhap bini hu ia hacih piah pandar. Jaik abih dom baoh sang jeng hu radaih patuh piah nao mai. Dom dam dara jeng nao ngak công nhân di dom sang mac, xí nghiệp dalam tỉnh. Dom sang ngak mbang hu kaya meda dak harei dak rilo. Oh hu bruk uranaih klaak bac.“Ndom ka sang kathaot, dahlau daih palei Cam dang akaok xã ka sang kathaot, tapa pathau khan, daong ba saong dom danak dak patruh kathaot, tal urak ini palei Cam tok daok sang jaik si kathaot. Dom sang kathaot hu trun tal 90%. Abih di nyu lac ngan saong mikva urang Cam ye xã tuk halei jeng caik hatai sangka, tacei jalan ka mikva patagok bruk ngak mbang, kinh tế. Tal urak ini mikva hu salih bahrau biak siam, sang kaya meda hu rilo”.

Maong tabiak jalan bê tông tapak, samu, atah tal jhung palei, oh daok bruk hajan ye gluh baok, pandiak ye thur mur, sa-ai Asiro – sa urang đảng daok ranaih umo brei thau, raidiuk di mikva dalam palei hu tagok jang dahlau biak rilo:“Urak ini raidiuk mikva hu salih karei biak rilo, jalan nao mai hu tuh bê tông abih, mbuan lagaih ka bruk nao mai di mikva saong pajeng ba kaya nong. Bruk me-in sambai, daoh tamia di mikva biak chreih chrai, abih di nyu lac bruk me-in thể thao biak khang. Palei Cam hu kapul dit blong, taong valei bhian nao pakacah haong palei karei”.

Tuk bruk ngak mbang hu tani tanat, raidiuk hu glaong tagok, mikva chreih chrai hu mbaok tame dom bruk kayua karja palei ba tabiak, yau bruk Taong abih bhap bini jum pataom dak padang raidiuk ilamu di labik daok; kapul urang kumei oh hu bruk taong paoh gauk dalam sang... Amuk Ami Ná, Bí thư chi bộ palei Cam brei thau, an ninh trật tự dahlau daih biak srau kadau, meng tuk xã ba tabiak bruk bhap bini Cam hu mbaok tame khik ramik sron mbon puk palei ye dom tệ nạn xã hội trun hu biak rilo: “Kapul khik ramik sron mbon puk palei Cam hu 23 urang…..”.

Sa thun bahrau daok mai! Ia mbaok di menuac sia palei Cam xã Suối Dây daok hadah tagok bruk bui sambai, uranaih ba gauk me-in sambai, urang taha chreih chrai hatung hatai, dam dara pakacah gauk ngak mbang. Bruk bui sambai nan hu meng bruk jum pataom gauk, kham merat yam tagok di yaok urang, gam haong dom sarak di Đảng, Karja, urang Cam daok ba gauk rik prein yava tame dak padang puk paga, palei negar dak harei dak siam mekre, kaya meda./.